Dili Kinahanglang Mosunod sa “Kasagarang Gibuhat sa mga Batan-on”
Kalimti ang gisulti sa kalibutan. Unsa may pagtan-aw sa Langitnong Amahan kanimo? Mahimo kang magpakabuhi sa unsay Iyang nakita nga imong potensyal.
Daghan kaayo’g ikasulti ang kalibutan mahitungod sa mga tin-edyer karon. Tingali nahibalo ka sa mga pagkalahi-lahi o nakadungog og tawo nga mireklamo mahitungod sa “mga kabataan karong mga panahona.” May daghan usab nga pagtuon ug mga statistics mahitungod kanimo—sa imong mga kinaiya sa social media, unsay imong gipamalit, gani unsa ka mubo ang imong lahutay sa pagpaminaw [attention span].
Apan si Presidente Russell M. Nelson, Presidente sa Korum sa Napulog Duha ka mga Apostoles, miingon nga “dili siya komportable” dihang nadungog niya ang mga tig-research nga mihulagway sa ilang mga pagtuon mahitungod sa kabatan-onan. “Ug sa walay lipud-lipod,” miingon siya, “dili kaayo ko interesado kon unsay ikasulti sa mga eksperto kabahin ninyo kay sa unsay gisulti sa Ginoo kanako kabahin ninyo.”1
Wala magkinahanglan ang Ginoo og pagtuon o pagkalahi-lahi aron mailhan kamo. Wala Niya kamo tan-awa isip usa ka bahin sa statistics o isip tawo nga timbang-timbangon kon giunsa kamo sa paghulagway “sa kalibutan”.
“Siya nahigugma ninyo dili lamang kon si kinsa kamo niining adlawa apan sa potensyal ug tinguha usab nga kamo mamahimong tawo nga may himaya ug kahayag,” miingon si Presidente Dieter F. Uchtdorf, Ikaduhang Magtatambag sa Unang Kapangulohan.2
Ang Dios wala lamang basta makakita kanimo; nahigugma Siya kanimo.
Gusto nimong dili mosunod sa pamaagi sa kalibutan? Sugdi ang pagtan-aw sa imong kaugalingon sa paagi kon unsay nakita sa Langitnong Amahan ug sa Iyang mga piniling sulugoon kanimo. Gusto ba nimong lahion unsay gituohan sa uban nga imong maabut? Panahon na karon sa pagsugod ug paglihok! Sa edad nga 12, gipahinumduman ni Kristo ang yutan-on niyang mga ginikanan nga Siya “kinahanglan anhi gayud ako sa balay sa [Iyang] Amahan” (Lucas 2:49).
Dili kaayo Siya ingon niana ka bata, ug mao usab ikaw. Mao nga ang sunod nga pangutana mao kini: Sa unsang paagi ikaw maanaa sa buluhaton sa Langitnong Amahan?
Ang Iyang “buluhaton” tanan mao ang pagpahinabo “sa pagka-imortal ug sa kinabuhi nga dayon sa tawo” (Moises 1:39), busa ikaw maanaa sa buluhaton sa Amahan pinaagi sa paghimo sa imong pinakamaayo aron makab-ot ang imong potensyal ug pinaagi sa pagkahimong tawo kinsa makatabang sa uban nga makab-ot usab ang ilang potensyal.
Karon na ang panahon sa pagkahimong responsable para sa kaugalingon nimong kaugmaon. Unsa man ang imong mahimo karon dayon aron masiguro nga nagpaingon ka sa pagkab-ot sa unsay nahibaloan sa Langitnong Amahan nga imong maabut, dili lang unya sa kahangturan apan niining kinabuhia usab?
Gusto ka bang maminyo sa templo? Desisyuni karon nga mahimong putli sa hunahuna, pulong, ug sa buhat. Nakita ba nimo ang imong kaugalingon nga nag-eskwela sa unibersidad? Palamboa na karon ang maayong abilidad sa pagtuon. Gusto ka bang magmisyon? Idugang ang Isangyaw ang Akong Ebanghelyo sa imong pagtuon sa ebanghelyo (ilabi na sa chapter 3). Gusto ba nimong makasangkap para sa pamilya? Kat-uni unsaon sa pag-budget ug sa pagtuman niini karon.
Mahimo usab nimong tan-awon ang mga butang nga makalipay kanimo karon. Ganahan ka ba og math? Magpatukar og piano? Magsulat og mga istorya? Ipadayon kini! Tan-awa kon may mga paagi ba nga imong mapalambo ang: pag-eskwela, mga online tutorial, mga kompetisyon, workshop, ug uban pa.
Ayaw sunda ang naandan ug paghimo og lahi! Pagtino sa kaugalingon nimong kaugmaon. Unsa may imong gibuhat aron makab-ot nimo ang imong pinakamaayo? Pahibaloa kami pinaagi sa pag-email sa liahona@ldschurch.org o pagbilin og mensahe diha sa LDS Youth Facebook o sa mga page sa Instagram.