Pagpangita og kasulbaran sa Problema sa Inyong Kaminyoon
Ang tagsulat nagpuyo sa Utah, USA.
Talagsaong mga panalangin moabut gumikan sa pagsulbad sa mga problema kon naa ang paghigugmaay sa usag usa.
Mga paghulagway pinaagi ni Sally Wern Comport
Si Matt ug Margaret (tanang ngalan giusab) mipalong sa telebisyon human sa pagtapos sa sesyon sa kinatibuk-ang komperensya. Ang mga mensahe makadasig, ug nalipay sila sa maayo kaayong palibut nga misanap sa ilang panimalay nianang katapusan sa semana.
Walay makalabaw sa kasagmuyo ni Matt ug Margaret dihang wala dangti og 24 oras human niadto, grabe ang ilang panaglalis mahitungod sa bonus ni Matt nga wala nila dahumang moabut, kon ila ba kining tigumon o gastuhon para sa sinina nga pang-eskwela sa magulang nga mga anak. Wala masulbad ang panaglalis, ug giatubang na lang ni Matt ug Margarett ang laing buluhaton nga daw wala magkasinabut.
Aron makamugna og malungtaron, malipayong kaminyoon, ang magtiayon kinahanglang makakat-on unsaon pagsulbad og mga problema aron ang matag usa mobati nga nasabtan ug mahimo ang mga desisyon nga naglakip og panag-uyon.
Espiritwal nga Pasidaan ug Giya
Ang mga kasulatan ug mga pulong sa propeta ug mga apostoles naghatag og igong mga pahimangno mahitungod sa panagbingkil. Sa 3 Nephi atong mabasa, “Siya nga may espiritu sa panagbingkil dili gikan kanako, apan gikan sa yawa, kinsa mao ang amahan sa panagbingkil” (3 Nephi 11:29). Si Elder M. Russell Ballard sa Korum sa Napulog Duha ka mga Apostoles mitudlo nga si Satanas “naningkamot nga magkasumpaki ang amahan ug inahan. Nag-agni siya sa mga anak nga mahimong supakan sa ilang mga ginikanan. … Nasayud si Satanas nga ang pinakasigurado ug epektibong paagi sa pagbabag sa buhat sa Ginoo mao ang pagpaminus sa kaimportante sa pamilya ug kabalaan sa panimalay.”1
Ang panaglahi sa opinyon, kinaiya, o kaagi dili kapugngan, apan may igo kitang mga kapanguhaan aron matabangan kita unsaon kini sa pagsulbad. Ang mga doktrina ug instruksyon nga gitudlo sa Dominggo nga pagsimba ug ang mga publikasyon sa Simbahan makatabang ug pweding masuportahan og maayong kalidad nga impormasyon kon gikinahanglan. Makakat-on ang mga magtiayon og mga pamaagi unsaon sa pagsulbad ang problema. Ang inspirasyon mosangput sa kausaban sa kasingkasing nga mopahumok sa matag magtiayon gikan sa sulod.
Mipahimangno si Presidente Thomas S. Monson: “Ang uban sa atong labing dakong mga oportunidad sa pagpakita sa atong gugma anaa sa sulod sa atong kaugalingong panimalay. Ang gugma kinahanglang mao ang sentro sa kinabuhi sa pamilya, apan usahay dili ingon niini. Adunay sobra ka walay pasensya, sobra nga panaglalis, sobrang panag-away, sobrang hinilakay.”2
Kon magpadayon ang kasamok ug moguba sa kinabuhing pamilya, magkagrabe ang epekto sa problema, lakip ang kakulang sa maturidad, pagkahakog, tinguhang makaangkon og gahum, ug garbo. Mitudlo si Presidente Gordon B. Hinckley (1910–2008) nga, “Dugay na akong mibati nga ang labing dako nga hinungdan, sa usa ka malipayong kaminyoon mao ang pagpakabana alang sa kahupayan ug pagkatawo sa kapikas. Kasagaran ang kahakog mao ang nag-unang hinungdan nga makaingon sa panaglalis, panagbulag, diborsyo, ug masulub-ong mga kasingkasing.”3
Si Elder Marvin J. Ashton (1915–94) sa Korum sa Napulog Duha ka mga Apostoles mikomentaryo: “Kon ikonsiderar sa usa ka tawo ang dili maayong pagbati ug ang pagkadili makahimuot gumikan sa panagbingkil, maayong ipangutana ang, ‘nganong moapil man ko?’ …
“… Importante ang pagkahibalo nga kita ang nagpili sa atong kinaiya. Ang gamut niini nga isyu mao ang karaan nang problema sa garbo.”4
Bisan unsa pa ang hinungdan, gikinahanglan nato ang pagkat-on og bag-ong mga kahanas ug pahumukon ang atong kasingkasing kon magpadayon man ang problema.
Mga Hinungdan sa Problema
Dunay daghang hinungdan sa problema, magsugod sa personal nga opinyon ngadto sa naandan nang estilo sa komunikasyon. Dugang sa pagbuntog sa kahakog ug kakulang sa maturidad, atubangon sa magtiayon ang ubang komon nga hinungdan sa problema sama sa mosunod:
-
Pagkat-on pag-adjust sa usag-usa nga estilo sa bag-ong magtiayon
-
Natural nga kalahian tali sa lalaki ug babaye
-
Tensyon gumikan sa kakapoy
-
Managlahing opinyon kon unsaon sa pagpadako ang mga anak o pagdumala sa panalapi
-
Reaksyon bahin sa mga bata nga nagkat-on sa paggamit sa kabubut-on
-
Magkalahi sa butang nga gusto ug dili gusto
-
Nanubrang reaksyon sa kakapoy
-
Kakulang sa pagsabut o kakulang sa kahanas sa pagsulbad sa problema
Mga Pahimangno mahitungod sa Kasuko
Daghang problema sa kaminyoon o pamilya motumaw tungod sa walay kontrolar nga kasuko. Kon dili kita mag-amping, masundan nato ang kasuko sa pagsigi og hunahuna kon unsay gihimong sayop sa atong kapikas ngari nato. Kon magkataas ang atong paghambin nga gisaypan kita mas magkadaghan ang matigum natong ikapangatarungan. Kining padayon nga negatibong hunahuna magpugong sa atong pagkalma, ug kon ang sunod nga bul-og sa kasuko motumaw sa dili pa masulbad ang una, ang bug-at nga pagbati modugang sa kapungot.
Sama pananglit, sa sesyon sa pagsabut-sabut, gihulagway ni Marilyn ang kangil-ad sa pagbati nga mihigda sa higdaanan human siya ug ang iyang bana nagkasininggitay. “Nasayud kong ako ang husto,” miingon siya. “Nasayud kong pasigaon ra niya ang suga ug mangayo’g pasaylo, apan wala. Sa akong pagsigi og hunahuna niini, misamot ang akong kalagot. Dihang nagsugod siya sa paghagok, wala ko kapugong—mibarug ko ug gisinggitan na usab nako siya’g kadaghan dayon nanaog ko. Makatuo ka ba nga wala gihapon siya mangayo’g pasaylo?” Ang ehemplo ni Marilyn usa ka maayong ehemplo sa dili kamao nga mopugong sa kasuko.
Ang naandang kinaiya, bisan ang mga ginagmay, ingon og lisud wagtangon. Apan ang mga magtiayon makakat-on og mga kahanas nga makatabang. Aniay pipila ka makatabang nga kinaiya:
7 ka mga Tip alang sa Pagpakalma
Diha-diha dayon susiha ang imong mga hunahuna. Sa atong sanglitanan, mahimo rang ingnon ni Marilyn ang iyang kaugalingon, “Daw ako ang husto, apan over-acting ra kaayo ko. Ang akong relasyon sa akong bana mas importante kanako kay sa among gilalisan.”
Tuguti nga mokalma ang imong pagbati sa dili pa nimo paningkamutan ang pagsulbad og problema. Paabuta nga mawagtang na ang nag-impluwensya nga kasuko sa imong utok.
Pangita og lahi nga butang nga ikapuli. Pilia ang paghunahuna og laing butang o maglakaw-lakaw.
Isulat ang imong mga hunahuna. Para sa uban, makatabang kini nga makamatngon ka sa imong kaugalingon.
Ipagawas ang imong pagbati sa mabungahon nga pamaagi. Ang pagsinggit sa imong mga pagbati dili makatabang “nga mawala kana nga mga pagbati.” Kon padayon nimong ipagawas kini sa masuk-anong paagi, mas magkangil-ad ang imong mga pagbati.
Paminaw og makapakalma nga musika o pagbasa og makabayaw nga literatura.
Sugdi og usab. Hununga dayon sa pagsugod pa lang sa panaglalis. Ang research nagpakita nga ang unang tulo o lima ka minutos nga pag-istoryahanay maoy sinugdanan kon unsay mosunod. Ingna, “Nagpadulong na kini sa hiwi nga direksyon. Magsugod ta og lahi.”
Mga Lakang sa Pagsulbad sa Problema
Strengthening Marriage [Pagpalig-on sa Kaminyoon], ang usa ka manwal sa LDS Family Services, nagrekomendar og tulo ka lakang sa pagsulbad og problema: (1) pagpahayag sa mga opinyon, (2) pagsuhid sa mga problema, ug (3) pagpili og mga sulbad para sa managtiayon.5 Kini nga mga lakang gibasi sa komunikasyon ug matang sa pagpaambit nga naglakip sa kooperasyon ug hisgutan ang mga isyu sa tanan nga adunay labut.
1. Pagpahayag sa mga Opinyon
Ang matag indibidwal mopaambit og mga panglantaw sa matinuoron apan dili sa bangis nga paagi. Usahay ang mahunahunaong pagpamalandong makasulbad sa problema kon maklaro nga ang pagkasumpaki naggikan lamang sa sayop nga pagsabut. Sama pananglit, ang usa ka asawa kinsa nagtuo nga kaugalingon ray gihunahuna sa iyang bana sa pagpugos nga pakuyugon siya sa pagtan-aw og high school basketball game imbis manggawas para sa dinner date, tingali makasabut nga ang iyang bana dili kaayo interesado sa basketball kondili aron makita nga gihatagan niya’g pagtagad ang usa ka player nga wala na motambong sa iyang Sunday School class.
2. Pagsuhid sa mga Problema
Ang magtiayon mosuhid sa mga problema sa mas lawom nga lebel. Ang focus anaa sa pagsabut ug pagdawat sa problema sa usag usa. Sa pagpadayon sa sanglitanan mahitungod sa basketball, ang asawa, samtang misabut sa kabalaka sa iyang bana para sa estudyante, tingali nagtuo nga ang iyang bana dunay pattern nga kanunay niyang unahon ang panginahanglan sa uban kay sa ilang kaminyoon. Niining sitwasyuna, ang mas mahunahunaong diskusyon kinahanglang himoon diin ang matag usa mopahayag sa ilang mga pagbati sa masinabtanong paagi ug ang panagsumpaki mapulihan og kooperasyon.
3. Pagpili og mga Sulbad para sa Managtiayon
Ang managtiayon magtambayayong sa pagpangita’g maayong mga solusyon. Ang tutukan mao ang unsay mahimo sa matag usa aron mahatagan og tubag ang mga problema kay sa unsay mahimo sa ilang kapikas. Ang ingon niana nga negosasyon maoy pagsulay sa maturidad ug pailub apan, sa ngadto-ngadto, mosangput sa pagtuo nga ang kasiguroan anaa pinaagi sa pagpahayag sa mga pagbati ug kamasaligon nga ang mga tinguha sa tawo mahatagan ra diay og kasulbaran. Ang magtiayon sa gigamit nato nga sanglitanan pwede ra untang magsabut nga mogahin og usa ka Biyernes sa gabii nga magkuyog sa dula sa basketball, usa ka Biyernes sa gabii diin ang bana mag-inusarang moadto sa dula, ug duha ka Biyernes sa gabii nga maghimo og mga kalihokan ang magtiayon. Dili kaayo sama kaimportante kon giunsa pagpili sa magtiayon ang paggahin sa Biyernes sa gabii kay sa makatagbaw nga kalidad sa proseso sa paghimo og desisyon tali nilang duha.
Mga Resulta sa Pagsulbad sa Problema
Talagsaong mga panalangin moabut gumikan sa pagsulbad sa mga problema kon naa ang paghigugmaay sa usag usa. Maglakip kini sa seguridad; personal nga kalamboan, nga moresulta sa malinawon nga pagbati; naglambo ang pagtuo; naglambo nga kinaiya; ug personal nga pagkamatarung.
Kon ang problema nasulbad na, bag-ong mga pattern ang mopuli. Dayon moabli ang mga pultahan para mapahayag sa mga magtiayon ang positibong mga hunahuna ug ikapakita ang pagsuportahay. Si Sister Jean B. Bingham, Kinatibuk-ang Presidente sa Relief Society, miingon: “Ang mga pulong adunay makatingala nga gahum, kini mao ang pagdasig ug ang pagpaluya. Tingali mahinumduman natong tanan ang negatibong mga pulong nga magpaluya kanato ug ang uban litukon uban sa gugma nga makadasig sa atong espiritu. Ang pagpili nga positibo ra ang isulti—ug ang uban—mobayaw ug molig-on sa mga anaa sa palibut kanato ug makatabang sa uban sa pagsunod sa pamaagi sa Manluluwas.”6
Ang mga magtiayon nga nakahimo’g taas og tagal nga kalamboan sa pagsulbad sa problema miani og madanihong mga ganti. Usa ka bana nga kanhi adunay gubot nga relasyon miingon, “lisud hunahunaon ang paghinumdom sa nanghitabo kaniadto ug tuohan nga kadto tinuod. Nganong nahimo man nako ang pagtratar og sama niadto sa akong asawa? Nagpasalamat ko sa Espiritu nga mitabang nako nga akong matagad ang akong asawa ug sa pailub nga gipakita sa akong asawa kanako.”
Panapos
Ang pagbuntog sa problema nagkinahanglan og mahunahunaong paningkamot ug paglihok. Ang pinakaangay nimong sunod nga isulti o buhaton makasugod og positibong mga pattern sa komunikasyon sa inyong kaminyoon. Ikaw usab makaani og mga bunga sa Espiritu sama sa nasinati sa mga Nephite: “Walay panagbingkil diha sa yuta, tungod sa gugma sa Dios nga anaa sa mga kasingkasing sa mga katawhan.
Ug wala nay mga kasina, ni panagbangi, ni kagubot … ; ug sa pagkamatuod wala nay mga katawhan nga labaw pa ka malipayon sa tanan nga mga katawhan” (4 Nephi 1:15–16).