Si Sarah ug ang MRI
Ang tagsulat nagpuyo sa Colorado, USA.
Tingali ang Espiritu Santo makatabang ni Sarah nga dili mahadlok.
“Si Kristo misaad sa dinhi pa’s yuta nga ang Espiritu Santo Iyang ipadala, ato Siyang higala” (Songbook sa mga Bata, 56).
“Morag si Sarah magkinahanglan og MRI sa iyang likod,” miingon si Dr. Frank. Mipahiyum siya ni Sarah. “Mag-iskedyul ko og usa ugma. Mobalik ra ko dayon.”
Taud-taod nang nagsakit ang likod ni Sarah. Sa dihang nahigmata siya nianang buntag, misakit pag-ayo nga naglisud siya sa pagbarug, ug hapit dili siya makalakaw. Si Sarah ug ang iyang mama nakigkita ni Dr. Frank aron masusi unsay diperensya.
“Laing MRI?” pangutana ni Sarah, nagtan-aw sa iyang Mama. Nakasulay na siya og MRI kausa kaniadto. Nakahinumdom siya sa iyang gibati nga nahadlok pag-ayo sa dako nga tube nga nagkuha og mga litrato sa sulod sa iyang lawas.
“Pasayloa ko Sarah,” miingon si Mama. “Apan ang mga litrato makatabang ni Dr. Frank nga makahibalo unsay sakit sa imong likod. Nasayud ko nga makahimo ka niini. Ug nia ko uban nimo.” Gipislit ni Mama ang kamot ni Sarah.
“Apan dili ka makakuyog uban nako sa sulod,” miingon si Sarah. Miduko ang iyang ulo, ug dunay luha nga miagas sa iyang aping. Si Mama makauban niya sa kwarto, apan kon si Sarah mosulod na sa makina, siya na lang.
Gigakos ni Mama si Sarah. “Tinuod kana, apan kahibalo ka ba kinsa ang makaadto aron sa paghupay kanimo?”
Nakahinumdom si Sarah sa ngalan nga iyang nadunggan alang sa Espiritu Santo: ang Maghuhupay. Tingali ang Espiritu Santo makatabang ni Sarah nga dili mahadlok.
“Ang Espiritu Santo?” Nangutana si Sarah.
Mitando si Mama. “Husto kana. Makaampo ka alang sa Espiritu Santo nga motabang kanimo. Si Papa ug ako mag-ampo usab alang kanimo.”
Nakahatag kana og talagsaong ideya ni Sarah. “Makapangayo ba ko og panalangin ni Papa?”
Mipahiyom si Mama. “Siyempre. Kahibalo ko nga ganahan siya nga mobuhat niana.”
Nianang gabhiona gipandong ni Papa ang iyang mga kamot sa ulo ni Sarah ug mihatag kaniya og panalangin sa priesthood. Sa dihang iyang gipanalanginan si Sarah nga siya hupayon sa Espiritu Santo, mibati siya og kainit sa lawas. Ang pagbati nagpabilin kaniya sa tibuok gabii.
Pagkasunod adlaw si Sarah naghigda sa bangko nga modailos ngadto sa dako nga tube sa makina sa MRI. Iyang gibalik-balik sa iyang hunahuna ang mga pulong nga gigamit ni Papa atol sa pagpanalangin kaniya: Ang Espiritu Santo anaa sa paghupay kanimo. Gipislit ni Sarah og hugot ang kamot ni Mama. Dayon ang nurse mipadailos niya ngadto sa tube.
Ang makina sa MRI dunay kataw-anan nga mga tingog samtang nagkuha og litrato sa iyang likod. Kinahanglang dili maglihok si Sarah aron ang litrato dili hanap. Gikuyawan siya sa makadiyot, apan gibati niya ang kainit pag-usab. Morag gigakos siya ni mama. O sa usa ka init-init nga habol. Nasayud siya nga OK ra ang tanan. Wala siya makahibalo, nga ang MRI nahuman na!
Didto sa opisina ni Dr. Frank, gipakita niya kang Sarah ug Mama ang mga litrato sa likod ni Sarah. “Buotan kaayo ka nga wala maglihok didto,” gisultihan ni Dr. Frank si Sarah samtang nagluhod siya sa iyang kiliran. “Kini nga mga litrato sa imong likod nagpakita nga kinahanglan kang operahan aron makatarung ka sa paglakaw.”
Nakapanlad-ok si Sarah.
“Gusto nato nga buhaton dayon ang operasyon,” miingon si Dr. Frank, nagtan-aw sa mama ni Sarah. Dayon mitan-aw siyag balik ngadto kang Sarah. “Tingali molungtad og pipila ka semana nga ikaw makabalik sa imong naandan nga pagka-ikaw pag-usab, apan human makakita nimo karon, nasayud ko nga makahimo ra ka.”
Naghunahuna si Sarah sa tanang mga butang nga iyang mahimo human maayo ni Dr. Frank ang iyang likod. Makahimo ko sa pagdagan ug paglangoy ug pag-ambak diha sa dakong tapok sa mga dahon. Gimingaw siya niadtong mga butanga. Apan ang operasyon mas makahahadlok pa kay sa MRI! Dayon nakahinumdom si Sarah sa iyang mga pag-ampo ug sa iyang espesyal nga panalangin. Gipadad-an siya sa Langitnong Amahan ug Maghuhupay. Motabang Siya kaniya pag-usab.
Mitan-aw siya ni Dr. Frank. “Dayon ako makalukso diha sa dakong tapok sa mga dahon?” nangutana siya.
Mingisi siya. “Dayon makalukso ka diha sa dakong tapok sa mga dahon.”