Mogunit og Hugot
Ang tagsulat nagpuyo sa Utah, USA.
Ang mga higala makahatag og dakong kalainan kon unsa kasayon—o kalisud—sa pagsunod sa atong mga sumbanan.
Nagtubo ko uban sa mga higala nga miyembro sa Simbahan, ug naghinam-hinam ko nga magpabunyag ug mahimong usa ka miyembro mismo. Sa dihang mibalhin ko gikan sa probinsiya aron magkolehiyo, misugod ko sa pagdawat og mga leksyon gikan sa mga misyonaryo. Subo lang, ang pagpamugos sa mga bag-o nakong kaubanan nakapahimo nako nga naglisud sa pagsunod sa mga sumbanan sa ebanghelyo. Ang akong isig ka-freshmen migahin og daghang panahon sa mga party sa pag-inom og ilimnong makahubog. Wala pa gayud ako sukad nakasulay og ilimnong makahubog, pero ang akong bag-ong mga higala kanunay mipugos nako sa pag-inom niini.
Nasayud ako nga tinuod ang ebanghelyo, apan lisud makigbatok sa tintasyon gikan sa akong mga kaubanan.
Misugod ko sa pag-ampo sa Langitnong Amahan alang sa kalig-on sa paghimo og matarung nga desisyon. Wala pako mipaubos sa akong mga sumbanan, apan nahadlok ko nga wala koy kalig-on sa pagbalibad sa sunod higayon nga idalit ang ilimnong makahubog. Gimingaw ko sa akong mga higala nga mipakigbahin sa susamang mga hiyas.
Usa ka Sabado sa gabii miadto ko sa usa ka party kauban sa mga tawo sa akong gipuy-an. Diha-diha dayon nanag-inom ang tanan nakong mga higala ug miawhag nako sa pagtilaw sa unang higayon sa ilimnong makahubog.
Natintal ko. Akong gidawat ang baso sa beer nga gitunol ngari nako. Gipaduol ko kini ngadto sa akong baba, dili ko komportable apan nalipay ko sa pagtagad sa akong mga higala. Dayon si Nick, usa ka inilang lalaki nga palainom, miduol sa among tapok.
“Wala ka moinom niana, di ba?” nangutana siya.
“Wala pa,” mitubag ko.
“Kon imo kanang buhaton,” miingon si Nick, “magbasol ka matag adlaw sa tibuok nimong kinabuhi.”
Nakuratan ko. Nasayud ko nga husto siya. Dili ko gusto nga moinom. Gusto kong mahimong sakop sa Simbahan. Akong giuli ang baso ug mibiya sa party, mapasalamaton nga wala ko mihimo og dautan nga desisyon.
Pagkasunod adlaw, miadto ko sa simbahan, nakita ang mga misyonaryo, ug nakigsabot sa petsa alang sa akong bunyag. Sukad nianang adlawa nagpalayo nako sa mga party nga naay ilimnong makahubog. Mihimo ko og bag-ong mga higala sa simbahan nga mipakigbahin sa susama nako og mga hiyas ug sumbanan. Kauban gihapon nako akong mga higala sa akong gipuy-an, apan akong gihimong klaro ang akong mga sumbanan. Sa dihang ilang nahibaloan unsa kaimportante ang mga hiyas alang nako, mirespeto sila ug miundang sa pagpamugos nako. Ilang nabantayan ug mirespeto niini kon mobiya ko sa dihang nanan-aw sila og dili maayo nga mga salida o naminaw sa dili maayo nga musika.
Nalig-on ang akong pagpamatuod pinaagi niini nga kasinatian, ug maningkamot ko nga dili gayud ipaubos ang akong mga sumbanan tungod sa pagpamugos sa kaubanan. Nasayud usab ako nga ang labing maayong paagi sa pag-atubang sa lisud nga mga desisyon mao ang pag-ila sa inyong mga sumbanan ug mogunit og hugot ngadto niini gikan sa sinugdanan.
Nasayud ako nga ang Langitnong Amahan mitubag sa akong mga pag-ampo alang sa kalig-on sa pagbatok sa mga tintasyon. Mapasalamaton ko nga ang Espiritu Santo miawhag nako sa paghimo og matarung nga desisyon. Nasayud ko nga ang mga sumbanan sa Simbahan gihimo aron maprotektahan kita, ug mapasalamaton ko nga ang pagpili nga mosunod niini nakatabang nako sa pagpili nga magpasakop sa Simbahan.