Ang Langitnong Amahan Naghunahuna sa Akong Negosyo
Buyisile Zuma
KwaZulu-Natal, South Africa
Paghulagway pinaagi ni Allen Garns
Isip nag-inusara nga inahan sa lima ka anak, gibati nako ang bug-at nga responsibilidad sa pagsangkap sa akong pamilya. Usa ko ka katabang [domestic worker], apan ang akong kinitaan dili paigo alang sa akong pamilya. Miapil ko sa self-reliance group aron makat-on ko unsaon sa pagpalambo sa akong sitwasyon.
Nadasig ko sa “Starting and Growing My Business” nga grupo ug nakahukom nga makatahi ug makabaligya og mga bag nga pangputos para sa slow cookers. Manahi ko og mga bag sa lawom nga gabii human makapauli gikan sa akong trabaho sa adlaw.
Usa ka gabii nanahi ko sa daghang mga order nga kinahanglang mahuman pagkasunod buntag sa dihang ang akong makina naguba. Tungang gabii na, wala nay mekaniko nga makatabang. Ang makina dunay tool kit, apan wala gayud ako makaayo og makina kaniadto. Wala koy ideya asa magsugod.
Dayon ang leksyon sa My Foundation nga manwal nga giulohan og “Pagpakita og Hugot nga Pagtuo diha ni Jesukristo” miabut sa akong hunahuna. Nianang higayuna, nasayud ko nga kinahanglang mopakita ko sa akong pagsalig sa Ginoo. Miluhod ko ug nangamuyo: “Langitnong Amahan, palihug tabangi ko nga maayo kini nga makina aron mahuman ang order sa akong kustomer nga kuhaon sa pagkabuntag. Langitnong Amahan, palihug tabangi ko!”
Dayon duna koy talagsaong impresyon sa pagkuha sa screwdriver gikan sa tool kit ug gamiton kini sa pagduot sa usa ka pisa sa makina sa pagtahi. Gibuhat nako, nagsalig sa hingpit sa akong hugot nga pagtuo. Gipugngan nako ang akong gininhawa samtang akong gipaandar pag-usab ang makina. Miandar kini!
Nahuman nako ang order. Nadiskubrihan nako kon unsa ka nindot nga himoon ang Langitnong Amahan ug si Jesukristo isip kasosyo sa negosyo. Nasayud ko nga padayon akong panalanginan samtang maningkamot ko sa pagpangita og mga oportunidad sa paggamit unsay akong nakat-unan sa self-reliance group.