Mga Pangutana ug mga Tubag

“Agi’g dugang sa pag-ampo ug pagtuon sa kasulatan, unsa ang labing maayong paagi sa paglig-on sa akong pagpamatuod?”

Ang inyong pagpamatuod tingali dili kini mahitabo diha-diha. Anam-anam kining motubo sa usa ka espirituhanon nga kasinatian—base sa giingon sa kasulatan nga, “pagtulun-an human sa usa ka pagtulun-an, lagda human sa usa ka lagda” (2 Nephi 28:30). Dayon kinahanglan ninyong amumahon ug palig-unon ang inyong pagpamatuod, sama sa nagtubo nga liso (tan-awa sa Alma 32:28–43). Ug sama sa usa ka tanom nga dili makasugakod sa tubig lang, dili kay usa lang ang “labing maayo” nga paagi sa pagpalig-on sa inyong pagpamatuod. Nagkinahanglan kamo og kombinasyon sa mga paagi.

Pag-ampo ug pagtuon sa kasulatan mao ang sigurado nga maayong paagi sa pag-amuma sa inyong pagpamatuod. Kon kamo magtuon sa ebanghelyo ug mag-ampo uban sa tinuod nga katuyoan aron masayud sa usa ka butang nga tinuod, ang Espiritu Santo motabang ninyo nga mabati ang kamatuoran sa ebanghelyo (tan-awa sa Moroni 10:4–5).

Mapalig-on usab ninyo ang inyong pagpamatuod pinaagi sa pagsunod sa mga sugo. Kon inyong gisunod ang usa ka baruganan sa ebanghelyo—sama sa pagpuasa, pagbalaan sa Igpapahulay, pag-ambit sa sakrament—magsugod kamo sa pagbaton og usa ka pagpamatuod sa unsang paagi ug nganong kini tinuod, kay sa nianang basta lang kini tinuod. Si Jesus miingon kon kamo mopili sa, “pagbuhat sa kabubut-on sa Dios, inyong “mahibaloan akong gitudlo” (Juan 7:17).

Laing paagi sa pag-amuma sa inyong pagpamatuod mao ang pagpakigbahin niini. Si Presidente Boyd K. Packer (1924–2015), Presidente sa Korum sa Napulog Duha ka mga Apostoles, miingon, “Ang pagpamatuod angay nga makita diha sa pagpahayag niini!” (“The Candle of the Lord,” Ensign, Ene. 1983, 54; Tambuli, Hulyo 1983, 34). Mahimo ninyong ipakigbahin ang inyong pagpamatuod sa simbahan ug sa seminary, sa balay, ug uban sa mga higala. Kon buhaton ninyo, ang Espiritu Santo makapamatuod nganha kaninyo nga unsay inyong gipakigbahin tinuod.

Samtang kamo nagpalig-on sa inyong pagpamatuod sa daghang mga paagi, molambo ug mapalawman kini, ug kamo mobati og kalinaw ug kalipay.

Makigtambayayong sa mga Misyonaryo

Ang buhat sa misyonaryo maoy labing maayo nga paagi alang nako sa pagpalig-on sa akong pagpamatuod. Sa kada higayon nga makigtambayayong ko sa mga misyonaryo, mabati nako ang gugma ni Kristo.

Joy D., edad 19, Leyte, Philippines

Paningkamot nga Mahimong usa ka Disipulo

Mapalig-on nimo ang imong pagpamatuod pinaagi sa pagpaningkamot nga sa kanunay mahimong tinuod nga disipulo ni Jesukristo. Ang pagkamasulundon sa mga sugo sa Dios makapahimo kanato nga maisug sa atong mga pagpamatuod, ug kana mosangput nga ang atong mga pagpamatuod mas molig-on pa ug maandam alang sa gingharian sa Dios (tan-awa sa D&P 76:79). Mapalig-on usab ninyo ang inyong pagpamatuod pinaagi sa pagpakigbahin niini.

Elder Mule Simon, edad 23, Democratic Republic of the Congo Lubumbashi Mission

Paminaw sa Espiritu Santo

Ang pag-adto sa simbahan, pagbasa sa mga kasulatan, pagpaminaw sa pakigpulong sa komperensya, ug uban pa makatabang lang ninyo nga molig-on ang inyong pagpamatuod kon kamo maminaw sa Espiritu Santo. Siya mopamatuod sa kamatuoran nganha kaninyo. Paminaw kanunay sa Espiritu Santo, tungod kay anaa Siya ug motabang kaninyo sa pagpalig-on sa inyong pagpamatuod.

Alyssa B., edad 16, Virginia, USA

Ipakigbahin Unsay Imong Nahibaloan nga Tinuod

Akong nakat-unan nga usa sa labing nindot nga mga paagi sa pagpalig-on sa akong pagpamatuod mao ang pagpakigbahin niini sa uban. Sa matag higayon akong ipakigbahin ang unsay akong gituohan ug ako nakahibalo nga kini tinuod—bisan unsa ka yano ug gamay—mabati nako ang kainit sulod sa akong dughan, ug gumikan niini moabut ang kumpirmasyon sa akong kasingkasing nga kadtong mga butanga nga akong gisulti tinuod! Sa laing pagkasulti, mabati nako ang pagpamatuod nga nalig-on.

Douglas S., edad 20, São Paulo, Brazil

Moadto og misyon

Ang pag-adto og misyon makapalig-on sa mga pagpamatuod alang sa inyong kaugalingon ug alang sa uban nga inyong matudloan. Sa misyon makakat-on kamo nga hingpit nga mosalig sa Ginoo ug dili sa inyong kaugalingong kusog. Mopalig-on ang misyon kaninyo, ug kon kamo moserbisyo sa Ginoo ug mohimo sa iyang buhat, makapalig-on kini sa inyong pagpamatuod.

Elder Bailey Peaali’I Williams, edad 19, Singapore Mission

Mas Mahisama kang Kristo

Makapalig-on kita sa atong mga pagpamatuod pinaagi sa pagkahimong mas sama kang Kristo. Akong napalig-on ang akong pagpamatuod kon makapadayag sa tinuod nga gugma ni Kristo ug moserbisyo sa uban sama sa nabuhat sa Maluluwas.

Kyung Jin P., edad 17, Seoul, South Korea

Ipakigbahin ang Imong Pagpamatuod

Usa ka maayong paagi sa pagpalig-on sa inyong pagpamatuod mao ang paghatag niini. Usahay kon kamo mopakigbahin sa inyong pagpamatuod, kamo makakaplag niini. Makapuasa usab kamo aron masayud mismo kon tinuod ba unsa ang natudlo. Nahimo nako kining mga butanga, ug nakapalig-on gayud kini sa akong pagpamatuod.

Porter S., edad 12, Idaho, USA

Pagserbisyo sa uban

Gawas sa pag-ampo ug pagtuon sa kasulatan, sa akong hunahuna ang labing maayo sa pagpalig-on sa inyong pagpamatuod mao ang pinaagi sa pagsebisyo. Kon moserbisyo kita sa uban, atong gipakita sa Dios nga nagpakabana kita mahitungod sa Iyang mga anak. Usab, makadawat kita sa Espiritu kon naghimo kita sa buhat sa Dios. Nasayud ko nga daghang mga higayon nga nakadawat ko og kahupay diha sa mga kalisud ug mga tubag sa mga pangutana samtang nagserbisyo.

Caroline J., edad 18, Utah, USA

Ang mga tubag gituyo alang sa tabang ug panglantaw, dili isip opisyal nga mga pamahayag sa doktrina sa Simbahan.

Pag-amuma sa Imong Pagpamatuod

Apan, sama sa nagtubo nga tanom, [ang usa ka pagpamatuod] kinahanglan kini nga alimahon o kini malawos. … Ang pagkamasulundon sa mga sugo kabahin nianang pag-alima nga kinahanglan ninyong isangkap alang sa inyong pagpamatuod.”

Presidente Henry B. Eyring, Unang Magtatambag sa Unang Kapangulohan, “Usa ka Buhing Pagpamatuod,” Liahona, Mayo. 2011, 126–127.

Umaabut nga Pangutana

Sa unsang paagi nga makadapit ako sa Espiritu sa akong panimalay kon ang mga tawo nanag-away ug naglalis?

Isumiter ang imong tubag ug, kon ganahan, klaro kaayo nga litrato hangtud Nobyembre 15, 2017, sa liahona.lds.org (i-klik ang “Submit an Article”) o pinaagi sa email ngadto sa [e-mail].

Palihug ilakip ang mosunod nga impormasyon: (1) kompleto nga pangalan, (2) petsa sa pagkatawo, (3) ward o branch, (4) stake o district, (5) imong sinulat nga pagtugot, ug, kon ikaw ubos sa 18 anyos, ang sinulat nga pagtugot sa imong ginikanan (ang email dawaton) nga imantala ang imong tubag ug litrato.

Ang mga tubag tingali i-edit alang sa gitas-on o sa pagklaro.