Pag-angkon og Pagtahud sa Kaugalingon pinaagi sa Self-Reliance

José Alberto Navas (sumala sa gisulti ngadto ni Miriam Sweeney)

San José, Costa Rica

Minyo ko, dunay tulo ka mga anak, ug wala koy trabaho. Ang pagkawalay trabaho nakapawala nako og paglaum. Nabalaka ko sa kasiguroan sa akong pamilya, ug mihunong ko sa pagtuo sa akong kaugalingon.

Ang akong asawa, si Carla, miawhag nako sa pag-apil sa grupo sa self-reliance. Makauulaw nga modawat nga wala koy trabaho, apan miawhag siya nako sa pag-apil sa grupo aron makaatiman ko sa among pamilya.

Nagduha-duha ko pero misulay ko. Samtang nag-apil sa grupo, nakaamgo ko nga ang akong kahanas sa Iningles usa ka bililhong butang sa kalibutan sa panarbaho. Nagtuon kog Iningles sa akong misyon, apan ang akong nahibaloan sa pagsulti mahitungod lang sa relihiyon. Nagpalista ko sa klase sa Iningles nga gitanyag sa Simbahan aron molambo ang akong bokabularyo. Sa dihang mipauli ko gikan sa klase sa Iningles usa ka adlaw, gitunol ni Carla kanako ang telepono.

“Kinsa man ni?” Nangutana ako.

“Wala ko kaila,” mitubag siya. “Iningles ilang sinultihan.”

Ang representante kadto sa human resources gikan sa usa sa labing dako nga mga kompaniya sa Costa Rica miingon nga mointerbyu nako. Nakalitan ko, apan nindot kaayo ang interbyu. Dayon nahibaloan nako nga si Carla ang nagpahigayon sa interbyu.

Nakatrabaho ko, ug nakahinumdom kon giunsa ako sa pagtabang sa grupo sa self-reliance. Dayon naghunahuna ko kon unsaon sa paggamit og maayo sa akong nakat-unan. Nagsugod ko sa pagpangita og mas maayo pa nga trabaho ug nakakita niini. Dayon naningkamot ko sa pagsugod sa akong kaugalingong negosyo sa kontruksyon.

Dili nako mahunahuna kon asa na kaha ang akong pamilya ug ako kon wala ang pagsugod nga gihatag sa inisyatibo sa self-reliance. Nakat-on ko sa pagpaubos ug nangayo sa Ginoo sa tabang. Nakat-on usab ako sa pagtugot niadtong gusto nga motabang nako sa pagpanalangin sa akong kinabuhi. Daghan kaayo kami og mga panalangin. Karon duna na koy pagtahud sa kaugalingon, ug akong mapanalanginan ang akong pamilya sa kwarta nga akong kinitaan. Nasayud ko nga ang Espiritu mopanalangin kanato kon kita mapainubsanon.