Mensahe sa Visiting Teaching
Paghigugma Niadtong Kinsa Nahisalaag
Tun-i sa mainampuong paagi kining materyal ug tinguhaa ang inspirasyon aron masayud unsay angay nga ipakigbahin. Sa unsang paagi ang pagsabut sa katuyoan sa Relief Society nag-andam sa anak nga mga babaye sa Dios alang sa mga panalangin sa kinabuhing dayon?
“Ang tinuod mao nga walay hingpit nga mga pamilya … ,” miingon si Presidente Dieter F. Uchtdorf, Ikaduhang Magtatambag sa Unang Kapangulohan. “Bisan unsang mga problema ang giatubang sa inyong pamilya, bisan unsay inyong buhaton aron masulbad kini, ang sinugdanan ug ang katapusan nga solusyon mao ang gugma nga putli, ang tiunay nga gugma ni Kristo.”1
Niadtong kinsa wala moapil sa hingpit sa ebanghelyo, si Linda K. Burton, kanhi Kinatibuk-ang Presidente sa Relief Society, miingon: ang “Langitnong Amahan nahigugma sa iyang tanang mga anak. … Bisan asa pa sila—anaa o wala sa dalan—gusto Niya nga makapauli sila.”2
“Bisan unsa man sila ka perwisyo [ang inyong mga anak], … kon ikaw mosulti o makigsulti kanila, ayaw kini buhata sa kapungot, ayaw kini buhata sa kabangis, sa usa ka mapanghimarauton nga espiritu,” maoy gitudlo ni Presidente Joseph F. Smith (1838–1918). “Tarunga sila sa pag-istorya.”3
Si Elder Brent H. Nielson sa Seventy misubli sa instruksyon sa Manluluwas ngadto niadtong dunay 10 ka piraso nga pilak ug nawala ang usa: “Pangitaa hangtud nga makit-an kini. Kon ang nawala mao ang inyong anak nga lalaki o babaye, inyong igsoon nga lalaki o babaye, … human sa tanan natong buhaton, atong higugmaon kana nga tawo sa tibuok natong kasingkasing. …
“Hinaut kamo ug ako makadawat sa pagpadayag aron mahibalo sa labing maayo nga paagi unsaon pag-agni kadtong napahilayo sa atong kinabuhi ug, kon gikinahanglan, magbaton og pailub ug gugma sa atong Amahan sa Langit ug sa Iyang Anak, si Jesukristo, samtang kita naghigugma, nagbantay, ug nagpaabut sa anak nga nawala.”4
Si Presidente Henry B. Eyring, Unang Magtatambag sa Unang Kapangulohan, miingon: “Nag-ampo ko nga may hugot nga pagtuo nga usa sa akong minahal magtinguha ug mabati ang gahum sa Pag-ula. Nag-ampo ko nga may hugot nga pagtuo nga ang mortal nga mga anghel moabut sa pagtabang nila, ug sila miabut.
“Ang Dios mihimo og paagi sa pagluwas sa matag usa sa Iyang mga anak.”5
Dugang nga mga Kasulatan ug Impormasyon
Hugot nga Pagtuo Kahupayan sa Pamilya