Mga Tubag gikan sa mga Lider sa Simbahan
Unsaon nga Makahibalo alang sa Inyong Kaugalingon
Gikan sa Marso 2017 Face to Face event uban ni Presidente Henry B. Eyring ug Elder Jeffrey R. Holland.
Minahal namong mga kabatan-onan, ang among tinguha alang sa matag usa kaninyo mao nga hinaut nga kamo makahibalo alang sa inyong mga kaugalingon, independente ni bisan kinsa, nga ang Dios sa langit tinuod, nga Siya nakaila kaninyo, ug nga ang Iyang Anak miula sa mga sala sa kalibutan.
Ang among panghinaut mao nga kamo makaangkon alang sa inyong kaugalingon sa dili matarug nga pagpamatuod nga ang ebanghelyo ni Jesukristo gipahiuli sa yuta sa katapusang higayon. Talagsaon ang misyon ni Joseph Smith, apan ang iyang mapainubsanong pag-ampo makatabang nga modelo alang kaninyo ug kanako. Miadto si Joseph sa kakahoyan sa pag-ampo uban ang hugot nga pagtuo nga ang usa ka mahigugmaong Dios motubag sa iyang pag-ampo ug masulbad ang iyang kalibog. Nakaangkon siya niana nga kasiguroan pinaagi sa pagbasa sa pulong sa Dios ug nakadawat og saksi nga kini tinuod. Nag-ampo usab si Joseph uban sa katuyoan dili lamang sa pagpaminaw apan sa pagsunod bisan unsa pa may mahitabo. Determinado siya sa pagbuhat bisan unsa ang isulti sa Dios kaniya.
Niana nga diwa, gusto ko nga mohagit sa kabatan-onan sa Simbahan. Ang hagit mao kini: hibaloi alang sa inyong kaugalingon nga kining mga butanga tinuod. Mahimo ninyo kini pinaagi sa pagsunod sa ehemplo ni Joseph Smith: tun-i ang mga kasulatan, tuguti nga ang mga pulong mosulod diha sa inyong kasingkasing, mamalandong niini pagbalik-balik, ug dayon mangutana sa Dios, uban sa pagkaandam sa pagdawat sa Iyang giya—sa tinuod, ang Iyang kabubut-on mao ang matuman.
Bisan og kini nga hagit ingon og yano nga imbitasyon, mosaad ko ninyo nga kini magkinahanglan og dakong paningkamot. Dili ako makasaad nga ang inyong mga tubag moabut sa usa ka adlaw o sa usa ka semana, apan makasaad ko nga ang Dios makigsulti kaninyo sa Iyang kaugalingong paagi ug sa Iyang kaugalingong panahon, kon mangutana kamo pinaagi sa hugot nga pagtuo. Kon kamo modawat ug mobuhat niini nga imbitasyon, inyong mahibaloan nga dili lamang moabut ang mga tubag, apan makaestablisar usab kamo og sumbanan sa pag-angkon og espirituhanon nga kahibalo nga mopanalangin sa nahibillin sa inyong kinabuhi.