Gikan sa Paris ngadto sa Sapporo
Nagpuyo ta sa lain-laing bahin sa kalibutan, apan managsama ang atong gibati kon ang mga templo gitukod sa atong duol!
Ang akong ngalan mao si Rachel. Nagpuyo ko duol sa Paris France Temple.
Ang templo importante kaayo sa akong pamilya. Sa wala pa matukod ang Paris Temple, mobiyahe ang among pamilya ngadto sa Frankfurt Germany Temple makadaghan sa usa ka tuig. Milungtad og 10 ka oras ang pagdrayb padulong didto ug pabalik!
Ganahan mi nga motan-aw nga gitukod ang bag-ong templo. Kada semana human manimba, ang among mga ginikanan moagi aron makakita mi kon unsa na ang pagtukod sa templo. Una nilang giguba ang daan nga building ug mikalot og dakong lungag. Nagkataas ug nagkataas ang pagkatukod sa templo. Sa wala madugay nagbarug na ang balay sa Ginoo!
Ako ug ang akong mga igsoon ganahan nga moadto sa templo sa umaabut. Ang akong magulang nga igsoon, si Esther, ang una nga mohimo sa mga bunyag. Naghinam-himan kaming naghulat sa among turno nga makaadto usab. Gimahal namo ang templo ug malipay nga makabaton og templo sa amo gayud nga kaugalingong siyudad!
Ang akong ngalan mao si Koshi. Nagpuyo ko duol sa Sapporo Japan Temple. Ganahan ko maglingkod sa may bintana sa akong balay ug magtan-aw nga gitukod ang templo.
Atol sa open house, giimbitar nako ang akong suod nga higala nga mouban namo. Miingon siya nga nindot ang tanan.
Gusto kong maghunahuna nga ang pagpahinungod sa templo mao ang iyang adlaw nga natawhan. Kana nga adlaw mao usab ang akong adlaw nga natawhan. Ug kang Presidente Monson usab! Ang akong mga ginikanan ug ako nakaadto sa templo sa dihang gipahinungod kini.
Mapasalamaton kaayo ko nga nagpuyo duol sa templo. Kon duna gani koy problema sa eskwelahan, makalakaw-lakaw ko sa nataran sa akong pag-uli. Gibati nako ang gugma sa Langitnong Amahan alang nako kon tua ko didto. Naghinam-hinam ko nga makasulod aron sa paghimo sa mga bunyag ug dayon maminyo didto.