Hangtud sa Sunod Natong Panagkita
Motabang og usa ka Tawo Karon
Ni Presidente Thomas S. Monson
Gikan sa “Unsa may Akong Nabuhat alang sa Usa ka Tawo Karon?” Liahona, Nob. 2009, 84–87.
Kita ang mga kamot sa Ginoo. Nagdepende Siya kanato.
DETALYE GIKAN SA SI KRISTO MIAYO SA MASAKITON SA BETHESDA, NI CARL HEINRICH BLOCH, SA MAAYONG KABUBUT-ON SA BRIGHAM YOUNG UNIVERSITY MUSEUM OF ART
Masaligon ako nga maoy intensyon sa matag miyembro sa Simbahan ang pagserbisyo ug pagtabang sa nanginahanglan. Sa bunyag nakigsaad kita sa “pagtambayayong sa usag usa nga mga alantuson, nga [kini] mahimo nga magaan” [Mosiah 18:8]. Pila na ba ka higayon nga natandog ang inyong kasingkasing samtang nakasaksi kamo sa panginahanglan sa uban? Kapila na ba kamo nagtinguha nga maoy motabang? Ug kapila na kaha nga ang inadlaw-adlaw nga pagpakabuhi mibalda ug inyo rang gipasagdan ang uban nga maoy motabang, mibati nga “ah, sigurado nga may tawo ra nga moatiman niana nga panginahanglan.”
“Na-busy kaayo kita sa atong kinabuhi. Hinoon, kon gahinan nato og panahon ang pagpamalandong, ug susihon pagmaayo unsay atong ginahimo, tingali atong makita nga … kasagaran gayud gigahin nato ang kadaghanan sa atong panahon sa pag-atiman sa mga butang nga dili kaayo importante sa kinatibuk-ang plano sa kinabuhi, nga nataligam-an ang importanting mga buluhaton. …
Gilibutan kita sa mga tawo nga nanginahanglan sa atong pagtagad, atong pagdasig, atong suporta, atong paghupay, atong kamabination—mga sakop man sila sa pamilya, mga higala, mga kaila, o mga estranghero. Mga kamot kita sa Ginoo dinhi sa yuta, uban sa mando nga moserbisyo ug motabang sa Iyang mga anak. Nagdepende Siya sa matag usa kanato. …
Unta ang mga pulong sa usa ka pamilyar nga himno motandog sa atong kinahiladman … :
Nakabuhat ba ko’g maayo karon?
May natabangan ba ako?
Nakapalipay ba ko sa masulub-on?
Kon wala, pakyas ako.
May gipas-an ba’ng akong napagaan
Kay andam kong motabang?
Ang subo ug nagluya natabangan ba?
Dihang kinahanglan nila?
[“Have I Done Any Good?” Hymns, nu. 223].
… Ipangutana nato kini sa atong kaugalingon … : “Unsa may akong nabuhat alang sa usa ka tawo karon?” Ang akong tambag sa mga miyembro sa tibuok kalibutan mao ang pagpangita og tawo nga dunay mga kalisud o sakit o nagmasulub-on, ug tabangi siya karon.