Sa Unsang Paagi Makausab sa Imong Kinabuhi ang Mensahe sa Komperensya

Ni Hadley Griggs

Ang tagsulat nagpuyo sa Utah, USA.

Sa tinuod ikaw mahimong sama kang Jesukristo. Kini nga mga paagi makatabang aron imong makita kon unsaon.

desk with laptop and general conference issue

Mibati ka ba nga daw kulang sa espirituhanong kalagsik? Nagtuo nga makagamit ka og gamay rang espirituhanong direksyon? Nan, swerte ka kay ang kinatibuk-ang komperensya mao nay imong gipangita! Si Elder Robert D. Hales sa Korum sa Napulog Duha ka mga Apostoles miingon: “Sa batan-ong mga miyembro sa Simbahan, mosaad ko nga kon kamo maminaw [sa kinatibuk-ang komperensya], bation gayud ninyo ang Espiritu diha kaninyo. Sultihan kamo sa Ginoo unsay Iyang gusto nga inyong buhaton sa inyong kinabuhi.”¹

Ug kana dili matapos sa katapusang semana sa komperensya—makapadayon ka sa pagbati sa espiritu pinaagi sa pagtuon sa mga pakigpulong pagkahuman usab niini!

Makatabang kanato sa daghang paagi ang komperensya. Tingali ang pinakaimportante, magpaduol kini kanato sa Manluluwas pinaagi sa pagtudlo kanato sa unsang paagi nga mas mahisama kita Kaniya. Usa ka talagsaong paagi sa pagkat-on og daghan sa komperensya mao ang paghatag og pihong atensyon sa mga pagtulun-an mahitungod sa mga hiyas nga sama kang Kristo—atol man sa broadcast o samtang tun-an nimo ang mga pakigpulong inigkahuman. Samtang paminawon o basahon sa walay pagduha-duha ang mga hiyas nga sama kang Kristo diha sa imong hunahuna, ang mga pulong ug ang Espiritu makatabang nga imong makat-unan unsaon sa pagkahimong mas sama kang Kristo.

Mahimo kang mokuha niining mubo nga quiz aron makita asa nga kinaiya (hiyas) o duha ka hiyas ang gusto nimong matutukan samtang tun-an nimo ang mga mensahe sa komperensya. (Para sa mas makapamalandong nga quiz, susiha ang Oktubre 2016 nga New Era o chapter 6 sa Isangyaw ang Akong Ebanghelyo.)

Alang sa tanang siyam ka mga hiyas nga sama kang Kristo sa ubos, pilia ang pamahayag nga naghulagway kanimo.

Pagtuo:
1. Dili ko sigurado kon Manluluwas ba nako si Jesukristo.
2. Mituo ko kang Jesukristo ug gidawat Siya isip akong Manluluwas.
3. Manghinaot ko nga si Jesukristo akong Manluluwas.
Paglaum:
1. Mibati ko og kalinaw ug kasigurado sa akong kaugmaon.
2. Ang kaugmaon nakapalisang kanako!
3. Sa kasagaran gibaliwala ra nako ang umaabut—kon kini dili nako hunahunaon, dili ko mabalaka niini.
Gugmang Putli ug Gugma:
1. Gisulayan nako sa paghigugma ang ubang tawo apan naay pipila ka tawo nga daw makalagot.
2. Busy kaayo ko sa paningkamot sa kaugalingon nakong kinabuhi nga wala na koy panahon sa paghunahuna sa uban.
3. Nagtinguha ko sa mahangturong kaayohan ug kalipay sa ubang mga tawo.
Hiyas:
1. “Ang pagbaton og limpyo nga hunahuna ug buhat.” Kana dili kaayo makalingaw!
2. Limpyo ko ug putli og kasingkasing.
3. Naglisud kaayo ko sa pagpabiling limpyo ug putli.
Kahibalo:
1. Daghan pa kaayo ko’g buhaton nga wala gyud koy panahon nga makapangita og tubag sa akong mga pangutana.
2. Ay. Magtuon? Usahay laay kaayong bation ang pagsulay nga magkat-on og mga butang.
3. Dako ang akong tinguha nga makasabut sa kamatuoran ug makakita og tubag sa akong mga pangutana.
Pailub:
1. Makahulat ra ko sa mga butang nga walay pagkasuko o kasagmuyo.
2. Sa akong tan-aw makahulat ra ko sa mga butang, apan mura og mapungot ko bahin niini.
3. Ang paghulat og mga butang ang pinakangil-ad. Gusto kong naa dayon ang tanan karon.
Pagpaubos:
1. Gusto kong makasiguro nga mabuhat nako ang tanan nga ako ra.
2. Mosalig ko sa Ginoo para sa tabang.
3. Kon magtrabaho ko, sa kasagaran makalimot ko nga mahimo diay kong mangayo og tabang sa Langitnong Amahan.
Kakugi:
1. Akong gigahin ang hapit tanan nakong panahon sa pagtan-aw og TV, pakigkuyog sa mga higala, ug paglikay sa responsibilidad!
2. Sa kasagaran maglisud ko sa pag-focus sa importanting mga butang sa akong kinabuhi apan naningkamot ko.
3. Gigahin nako ang akong panahon ug kusog sa pinakaimportanting mga butang.
Pagkamasulundon:
1. Andam kaayo kong mosunod sa tambag sa akong mga lider ug ginikanan.
2. Ako ang kaugalingon nakong boss sa kasagaran—kanunay kong maglisud sa pagpaminaw sa uban.
3. Mosunod ko sa tambag sa akong mga lider ug ginikanan, apan moreklamo ko niini usahay.

Karon tan-awa ang imong mga tubag. Asa nga mga hiyas ang gusto nimong trabahoon? Aron makat-on unsaon sa pagpalambo niini, mahimo kang magpili og usa o duha ug hatagi kini sa imong atensyon samtang maminaw ka sa komperensya.

Ug kon mitubag ka nga maayo kaayo ang imong nahimo sa tanan, ipadayon kini! Mahimo ra gihapon kang magpili og usa o duha nga importante kaayo kanimo atol sa quiz ug tutukan kana atol sa imong pagtuon sa komperensya. Bisan asa ka man sa imong panaw sa pagkahimong Kristohanon, makaadto ka ra kanunay sa mga pagtulun-an sa atong mga lider aron matabangan ka sa pagpadayon.

Kon dili ka makadesisyon sa usa ka hiyas karon, ayaw kabalaka! Mapaminaw ra nimo kanunay ang komperensya ug makita unsay daw importante kaayo kanimo.

Kon makapili ka na og hiyas nga gusto nimong matutukan, mahimo nimo kining isulat aron maandam ka sa pagdawat og pagpadayag mahitungod niini samtang maminaw ka sa komperensya o samtang magtuon ka sa mga pakigpulong inigkahuman. Samtang maminaw ka ug magtuon, tuguti nga ang Espiritu mogiya kanimo sa pipila ka pihong mga paagi nga matrabaho nimo ang mao nga hiyas. Susiha kini nga ehemplo sa ubos!

Gugma para sa Lima ka Bag-ong Higala

Sa eskwelahan dunay gamayng pundok sa mga bata diin gituohan sa kadaghanang estudyante nga “mga tawong walay pulos” kay lagi lahi sila. Wala ko maanad nga makig-istorya nila. Dili ko bati og batasan, apan dili sab ko maayo.

Dihang akong nadungog si Presidente Dieter F. Uchtdorf, Ikaduhang Magtatambag sa Unang Kapangulohan, nga namulong sa “Ang Maloloy-on Magadawat og Kalooy,” (Abril 2012 nga kinatibuk-ang komperensya), dunay nausab. Miingon siya nga dunay usa ka butang nga angay natong buhaton kon maghisgot kita og paghukom: “Hununga kini!” Ang iyang pakigpulong nakatabang nga akong maamguhan nga imbis hukman ang mga bata sa eskwelahan, pulihan nako ang bati nakong mga hunahuna ug pagbati inubanan sa “kasingkasing nga puno sa gugma alang sa Dios ug sa Iyang mga anak.”

Nianang pagka-Lunes sa pag-adto nako sa eskwelahan, imbis moadto sa naandan nakong mga higala, giadto nako ang pundok nga gituohan sa mga tawo nga “walay mga pulos”. Nagsugod mi sa pag-istorya ug akong namatikdan nga kining mga tawhana walay kalainan kay ni bisan kinsa. Dihang migahin ko og panahon kuyog nila, nakapalambo ko og lig-ong relasyon kanila. Nakahimo ko og bag-ong lima ka higala.

Akong naamguhan nga ang bag-o nakong mga higala dili diay “mga walay pulos”—para sa Dios kanunay silang adunay bili. Nalipay kaayo ko nga nakakat-on og dugang mahitungod sa gugma sa Dios para sa Iyang mga anak.

Holly H., edad 19, California, USA

Pagpalambo og Gugmang Putli Diha sa Klase sa Orchestra

Atol sa Oktrubre nga 2015 nga kinatibuk-ang komperensya, usa ka pakigpulong daw importante kaayo kanako. Si Elder Dale G. Renlund sa Korum sa Napulog Duha ka mga Apostoles namulong sa gitawag og “Pinaagi sa Panan-aw sa Dios.” Gihisgutan niya ang mahitungod sa kaimportante sa pagtan-aw ngadto sa ubang tawo nga susama sa pagtan-aw sa mahigugmaong mga ginikanan. Dihang nadungog nako kana, gibati nako nga kinahanglan kong mohimo og dugang pang paningkamot nga higugmaon nako ang mga anaa sa akong palibut.

Usa ka buntag human sa komperensya, naniid ko’g maayong panahon nga makalipay ko og usa ka tawo. Miadto ko sa akong klase sa orchestra ug nakakita og batang lalaki nga wala kaayo nako mahatagi og pagtagad. Nasayud kong duna siyay kasagmuyo, mao nga miduol ko niya ug gipangutana kon kumusta ang iyang adlaw. Dili kaayo siya tabian, mao nga gipangutana nako siya kon ganahan ba siya sa klase sa orchestra. Giingnan ko niya nga wala kaayo siya kahibalo sa music ug nabalaka mahitungod sa concert. Mitanyag ko nga akong tukaron uban niya, ug tukaron namong duha. Nindot kaayong paminawon! Human niana, nagsugod mi og istorya mahitungod sa among mga instrumento. Mas nagkasuod mi, ug nalipay kaayo ko nga nakagahin ko og panahon nga makig-istorya niya.

Christa M., edad 12, Texas, USA