Nagpalambo sa Akong Negosyo nga Bibingka

Lordita Yagomyom

Misamis Occidental, Philippines

Paghulagway pinaagi ni Carolyn Vibbert

Gusto nakong makamisyon ang akong anak nga lalaki, apan ang pagbaligya og usa ka kilo (2 lbs.) nga bibingka (rice cakes) sa usa ka semana dili makasuporta kaniya sa misyon.

Ang akong anak mitabang sa pinansyal sa pamilya ug nabalaka kaayo sa among pinansyal nga kahimtang nga dili siya komportable nga mobiya. Kanunay nga lisud ang pagpangita og kwarta sa pamilya. Mapasigarbuhon ko sa 25 anyos nakong anak sa matarung niyang tinguha nga moserbisyo sa Ginoo, apan akong namatikdan nga nagkinahanglan pa mi og mga milagro aron matuman ang iyang pangandoy nga makamisyon.

Miapil ko og grupo sa self-reliance. Pinaagi sa paglihok ug paggamit sa akong pagtuo, nasayud kong mapanalanginan ang akong pamilya. Atol sa usa ka miting, naaghat ko nga moadto sa merkado. Didto, akong nakita ang daghang babaye nga naninda og mga pang-snacks. Nakigsabut ko sa usa ka babaye. Giingnan nako siya nga magbilin ko og mga itinda inig-kabuntag ug kolektahon nako ang ganansya inig-kahapon. Maayo ang sabut para namong duha. Wala madugay nakakita pa gyud ko og mas daghang mobaligya. Ang akong negosyo milambo ngadto sa 10 ka tigbaligya atol sa akong panahon sa grupo sa self-reliance.

Nakakat-on ko sa paglain sa akong personal nga kwarta gikan sa akong negosyo ug gi-swelduhan nako ang akong kaugalingon. Giundang nako ang paggahin og panahon sa paghimog mga produkto nga dili kaayo mahalin ug gitutukan nako kon asa ko makaganansya. Nakakat-on pud ko sa pagpamaligya gamit ang social media. Ang akong action partner sa grupo sa self-reliance mitabang nako nga makahimo ko og Facebook account. Sugod niadto, nakakat-on mi mahitungod sa branding (pagkailado) ug pagpamutos. Sa kadugayan milambo ang akong negosyo sa punto nga ang akong bana mahimo nang moundang sa iyang hago kaayo nga trabaho ug motrabaho uban nako.

Bag-o lang may nangutana nako kon kumusta ang akong halin. Mapasigarbuhon kaayo kong miingon niya nga karon makabaligya ko og 12 ka kilos (25 lbs.) nga bibingka.

Ang “12 ka kilo sa usa ka semana maayo kaayo!” miingon siya.

“Dili brother,” miingon ko. “Makabaligya ko og 12 kilos kada adlaw.”

Wala madugay giingnan ko sa akong anak nga nalipay siya nga karon ang akong negosyo makasangkap na sa among panginahanglan.

“Daw makaserbisyo na ko og full-time nga misyon karon,” miingon siya.

Karon nagserbisyo siya sa Phillipines San Pablo Mission. Nagpasalamat kaayo ko sa inisyatibo sa self-reliance. Tinuod gayud ang gisulti sa Ginoo dihang miingon Siya, “Kini ang akong katuyoan sa paghatag sa akong mga santos” (D&P 104:15).