Mga Angay Hibaloan sa Dili Ka Pa Moadto: Mga Pagbunyag sa Templo

Ni Heather J. Johnson

Mga Magasin sa Simbahan

Dili na kinahanglang maghulat. Ang tanang miyembro nga takus, lakip ang mga batan-on ug bag-ong mga miyembro, makaserbisyo sa templo karon.

standing in front of temple doors

“Kinahanglan nga mahimo kitang mga tawo nga matinuoron ug mahigugmaon nga tigtambong og templo,” miingon si Presidente Howard W. Hunter (1907–95). “Kinahanglang moadto kita sa templo kanunay … kon itugot sa personal natong mga kahimtang. Dili lamang kay moadto kita alang sa atong mga patay na nga kaliwat, apan alang usab sa personal nga panalangin sa pagsimba sa templo, alang sa sagrado ug kasiguroan nga anaa sulod sa gibalaan ug gipahinungod nga mga bongbong” (“A Temple-Motivated People,” Ensign, Peb. 1995, 5).

Magamit kini nga tambag sa tanang miyembro sa Simbahan ni Jesukristo sa mga Santos sa Ulahing mga Adlaw—bisan og bag-o ka pa nga miyembro. Basta takus ka lang, dili kinahanglang maghulat pa og panahon aron makasulod sa templo. Human dayon sa imong bunyag ug pagkumpirma, makakuha dayon ka og limited-use nga rekomend sa templo.

Kini nga rekomend magtugot nga makasulod ka sa templo alang sa mga proxy nga bunyag ug pagkumpirma alang sa patay nang mga katigulangan. Sa imong pagserbisyo ug pagsimba sa templo, malig-on nimo ang imong pagpamatuod sa ebanghelyo.

Sa una niyang kasinatian sa templo, si Natalia Lorena Figueroa nga taga Argentina miingon, “Didto sa bunyaganan sa templo, akong nakita ang usa ka brother nga gibunyagan para sa akong lolo ug sa akong mga uyoan. Dayon gibunyagan ko para sa akong lola ug mga iyaan. Dili masabtan ang kalipay nga akong gibati. Mga luha midagayday sa akong mga mata, ug gibati nako ang kainit nga sukad wala nako mabati sa akong dughan.” Ang susamang mga panalangin naghulat niadtong mosarang para sa rekomend sa templo.

Mga Pangutana nga Kanunayng Gipangutana

Unsaon nako sa pagkuha og limited-use nga rekomend?

• Kinahanglan 12 o pataas ang imong edad ug takus ka nga miyembro sa Simbahan. Ang mga lalaki kinahanglang makadawat na sa Aaronic Priesthood, nga sa kasagaran madawat mga usa ka semana human sa ilang bunyag.

• Aron makadawat og rekomend, interbyuhon ka sa imong bishop o branch president. Ang interbyu susama ra sa pag-interbyu kanimo sa wala ka pa bunyagi. Hisgutan ninyo ang imong pagpamatuod sa ebanghelyo ug ang imong pagsunod sa mga sugo.

• Magamit ang rekomend sulod sa usa ka tuig.

Unsa ang ubang mga panalangin sa pagbaton og limited-use nga rekomend?

• Maserbisyuhan nimo ang patay na nimong mga katigulangan ug ang uban nga patay na pinaagi sa paghimo og mga proxy nga bunyag ug pagpakumpirma alang kanila.

• Mapahinumduman ka sa kaugalingon nimong bunyag ug pagkumpirma ug sa mga pakigsaad nga imong gihimo.

• Bisan og dili ka makatambong kanunay sa templo, madala-dala nimo ang imong rekomend isip makanunayong pahinumdom sa templo ug sa imong mga komitment nga mahimong takus nga motambong.

• Ang pagpakabuhing takus alang sa limited-use nga rekomend makatabang nga maandam ka sa pagdawat sa kaugalingon nimong mga ordinansa sa templo mahitungod sa endowment ug pag-seal.

Unsaon nako sa pagplano sa pag-adto sa templo?

• Paghangyo og lider sa ward o branch sama sa ward mission leader o presidente sa Relief Society, alang sa tabang nga maplano ang pagbisita sa templo.

• Ang iskedyul para sa bunyag nga himoon sa templo gi-post sa internet diha sa temples.lds.org. Mahimo usab nga manawag ka sa templo para sa impormasyon.

• Kon unang higayon pa nimo kini nga pagtambong, pwede nimong tawagan ang templo para ma-iskedyul ang appointment. Niining paagiha maandam sila sa pag-abi-abi ug pagpasabut kon unsay buhaton nimo sa templo.

• Isul-ob ang imong sinina nga pangsimba ngadto sa templo.

• Pagdala og ikailis nga puti nga pang-ilalom nga sapaw. Ang ubang templo dunay magamit nga pang-ilalom nga sapaw, apan ang uban wala. Mopagamit ang templo og puti nga isul-ob ug tualya.

Unsa ang akong mapaabut kon motambong ko sa templo sa paghimo og mga proxy nga bunyag ug pagkumpirma?

• Kon mosulod ka sa templo, una moadto ka sa recommend desk. I-check sa temple worker ang imong rekomend.

• Ang mga lalaki ug babaye moadto dayon sa managlahi nga ilisanan. May andam nga pribadong mga locker sa imong pag-ilis sa puti nga jumpsuit.

• Tultulan ka sa mga temple worker asa ka moadto aron mahimo ang mga proxy nga bunyag ug pagkumpirma.

• Ang mga pagbunyag ug pagkumpirma nga imong himoon susama ra sa kaugalingon nimong pagbunyag ug pagkumpirma, apan kini imong gihimo para ug alang sa tawo nga patay na.

• Human nimo mahimo ang mga ordinansa, mobalik ka sa ilisinan ug isul-ob ang kaugalingon nimong sinina.

• Walay angayang ikahadlok ang pagsulod sa templo. Bisan asa anaa ang mga temple worker sa sulod sa templo. Motabang sila nimo.