Ang Dalan sa Pakigsaad: Ang Dalan Padulong sa Kinabuhing Dayon

Ni Elder Adeyinka A. Ojediran

Sa Seventy

Ang dalan sa kahingpitan mao ang dalan sa pakigsaad, ug si Jesukristo mao ang sentro sa tanang ordinansa ug mga pakigsaad.

Usa ka gamhanang hari nagtinguha nga ang iyang anak nga lalaki magmando sa usa sa iyang mga gingharian. Ang prinsipe gikinahanglan nga makat-on ug molambo sa kaalam aron makalingkod sa trono. Usa ka adlaw, ang hari nakigkita sa prinsipe ug misulti sa iyang plano. Sila nagkauyon nga ang prinsipe moadto sa usa ka lain nga lungsod ug moangkon og mga kasinatian. Siya mag-atubang og mga hagit ingon man makatagamtam og daghang maanindot nga mga butang didto. Ang hari mipadala dayon niya ngadto sa lungsod, diin ang prinsipe gilaoman sa pagpruweba sa iyang kamatinud-anon ngadto sa hari ug ipakita nga siya angayan sa pagdawat sa mga pribilehiyo ug mga responsibilidad nga giandam sa hari alang kaniya. Ang prinsipe nahatagan og kagawasan nga makapili sa pagdawat o dili pagdawat niining mga pribilehiyo ug mga responsibilidad, depende sa iyang mga tinguha ug sa iyang pagkamatinud-anon. Segurado ko nga gusto ninyong mahibaloan kon unsa ang nahitabo sa prinsipe. Mibalik ba siya aron mapanunod ang gingharian?

Minahal nga mga kaigsoonan, matag usa kanato usa ka prinsipe o prinsesa. Kita gipadala nganhi sa mortalidad pinaagi sa usa ka Langitnong Amahan aron matagamtam ang panalangin sa usa ka lawas nga mamahimong imortal pinaagi sa Pag-ula ug Pagkabanhaw ni Jesukristo. Kita gilaoman nga mangandam sa pagbalik ngadto sa presensiya sa Dios pinaagi sa pagpruweba nga kita “mobuhat ba sa tanan nga mga butang bisan unsa ang isugo sa Ginoo nga [atong] Dios [kanato]” (Abraham 3:25).

Aron sa pagtabang kanato, ang Manluluwas miabot sa pagtubos kanato ug sa pagpakita sa dalan aron makabalik ngadto sa Dios. Ang mga anak sa Dios gidapit sa pagduol ngadto sa Manluluwas ug mahimong hingpit diha Kaniya. Sa mga kasulatan, atong makit-an ang imbitasyon alang kanato sa pagduol ngadto sa Ginoo nga gibalik-balik og kapin sa 90 ka higayon, sobra sa katunga niini personal nga mga imbitasyon gikan sa Ginoo Mismo. Ang pagdawat sa imbitasyon sa Manluluwas nagpasabot sa pag-ambit sa Iyang mga ordinansa ug pagtuman sa atong mga pakigsaad ngadto Kaniya. Si Jesukristo mao ang dalan, “ang kamatuoran, ug ang kinabuhi” (John 14:6), ug Siya nagdapit kanatong “tanan sa pagduol ngadto kaniya ug sa pag-ambit sa iyang kaayo; ug siya wala maglimod kang bisan kinsa nga moduol ngadto kaniya” (2 Nephi 26:33).

Ang atong pagkat-on ug pagtudlo sa ebanghelyo magpalig-on sa atong pagkakabig ngadto sa Langitnong Amahan ug ni Jesukristo ug magtabang kanato nga mas mahisama Kanila. Bisan og dili tanang butang nga gipadayag kalabot “sa tukma nga panahon ug matang diin ang mga panalangin sa kahimayaan [ma]hatag,” kita hinoon, gipasaligan niini.(M. Russell Ballard, “Paglaom diha kang Kristo,” Liahona, Mayo 2021, 53).

Si Alma ang halangdon nga pari, nagtudlo didto sa yuta sa Zarahemla, miasoy og usa ka talagsaong imbitasyon ni Jesukristo:

“Tan-awa, siya nagpadala og usa ka pagdapit ngadto sa tanan nga mga tawo, kay ang mga bukton sa kalooy gitunol ngadto kanila, ug siya miingon: Paghinulsol, ug Ako modawat kaninyo.

Oo, siya miingon: Duol ngari kanako ug kamo moambit sa bunga sa kahoy sa kinabuhi” (Alma 5:33–34).

Ang Manluluwas Mismo nagdapit kanato sa pagduol ngadto Kaniya ug dawaton ang Iyang yugo ngari kanato nga kita unta makabaton og kapahulayan niining samok nga kalibotan (tan-awa sa Mateo 11:28–29). Kita moduol ngadto ni Kristo pinaagi sa “pagpakita og hugot nga pagtuo diha [Kaniya], paghinulsol sa matag adlaw, paghimo og mga pakigsaad ngadto sa Dios samtang kita modawat sa mga ordinansa sa kaluwasan ug kahimayaan, ug paglahutay hangtod sa kataposan pinaagi sa pagtuman niadto nga mga pakigsaad. (General Handbook: Pagserbisyo diha sa Ang Simbahan ni Jesukristo sa mga Santos sa Ulahing mga Adlaw, 1.2.1, ChurchofJesusChrist.org). Ang dalan sa kahingpitan mao ang dalan sa pakigsaad, ug si Jesukristo mao ang sentro sa tanang ordinansa ug mga pakigsaad.

Si Hari Benjamin nagtudlo nga tungod sa pakigsaad nga atong gihimo, kita nahimong mga anak nga lalaki ug mga anak nga babaye ni Kristo, kinsa sa espirituhanong paagi nanganak kanato, ug ubos niini nga ngalan kita mahimo nga gawasnon, kay “wala nay lain nga ngalan diin ang kaluwasan moabot” (tan-awa sa Mosiah 5:7–8). Kita maluwas kon kita molahutay hangtod sa kataposan pinaagi sa “pagsunod sa panig-ingnan sa Anak sa Buhi nga Dios” (2 Nephi 31:16). Si Nephi mitambag nga ang tanan dili mahuman pinaagi lang sa pagsulod sa higpit ug pig-ot nga dalan; kita kinahanglan gayod nga “mopadayon sa unahan uban ang pagkamakanunayon kang Kristo, magbaton sa usa ka hingpit nga kahayag sa paglaom, ug usa ka gugma sa Dios ug sa tanan nga mga tawo” (tan-awa sa 2 Nephi 31:19–20).

Ang doktrina ni Kristo motabang kanato nga makit-an ug magpabilin diha sa dalan sa pakigsaad, ug ang ebanghelyo gihan-ay pag-ayo aron ang gisaad nga mga panalangin sa Ginoo madawat pinaagi sa sagradong mga ordinansa ug mga pakigsaad. Ang propeta sa Dios, si Presidente Russell M. Nelson nag-awhag kanato diha sa iyang Enero 16, 2018, nga sibya sa “pagpabilin diha sa dalan sa pakigsaad. Ang inyong pasalig nga mosunod sa Manluluwas pinaagi sa paghimo og mga pakigsaad uban Kaniya ug dayon sa pagtuman niadto nga mga pakigsaad moabli sa pultahan ngadto sa tanang espirituhanong mga panalangin ug pribilehiyo nga mahimong maanaa sa mga lalaki, sa mga babaye, ug mga bata bisan asa. … Ang tumong nga gipaningkamotan sa matag usa nato mao ang matugahan og gahom diha sa balay sa Ginoo, masilyo isip mga pamilya, matinud-anon sa mga pakigsaad sa templo nga maghimo kanatong takos sa labing mahinungdanong gasa sa Dios, ang kinabuhing dayon.” (“Samtang Dungan Kita nga Magpadayon sa Unahan,” Liahona, Abr. 2018, 7).

Ang Dios dili mobiya sa Iyang relasyon sa, o mopugong sa Iyang gisaad nga mga panalangin sa kinabuhing dayon gikan ni, bisan kinsang tigtuman sa pakigsaad. Ug samtang kita motahod sa sagradong mga pakigsaad, kita mas mapaduol ngadto sa Manluluwas. Si Elder David A. Bednar nagtudlo kanato kagahapon nga ang mga pakigsaad ug mga ordinansa sa ebanghelyo naglihok diha sa atong mga kinabuhi sama sa compass aron mohatag kanato og tukmang direksiyon ngadto sa pagduol kang Kristo ug mamahimong sama Kaniya.

Ang mga pakigsaad nagmarka sa dalan balik ngadto sa Dios. Ang mga ordinansa sa bunyag ug ang pagdawat sa Espiritu Santo, pag-orden sa pagkapari, ug ang sakramento, modala kanato ngadto sa templo sa Ginoo aron moambit sa Iyang mga ordinansa sa kahimayaan.

Gusto kong maghisgot og duha ka butang nga gihatagan og gibug-aton sa atong Manluluwas aron matabangan kita nga magmatinud-anon sa pagtuman sa mga pakigsaad:

1. Ang Espiritu Santo makatudlo kanato, mopahinumdom kanato sa mga pagtulon-an sa Manluluwas, ug mag-uban kanato sa kahangtoran (tan-awa sa Juan 14:16, 26). Siya mamahimo natong makanunayon nga kauban sa paggiya kanato diha sa dalan sa pakigsaad. Si Presidente Russell M. Nelson nagtudlo nga “sa umaabot nga mga adlaw, dili na posible ang espirituhanong pagsugakod kon wala ang giya, direksiyon, makahupay, ug makanunayon nga impluwensiya sa Espiritu Santo” (“Pagpadayag alang sa Simbahan, Pagpadayag alang sa Atong mga Kinabuhi,” Liahona,” Mayo 2018, 96).

2. Ang Manluluwas mipasiugda sa ordinansa sa sakramento aron kita unta sa kanunay mohinumdom Kaniya ug makabaton sa Iyang Espiritu uban kanato. Ang bunyag mobukas sa ganghaan ngadto sa kinabuhing dayon, ug ang sakramento motabang kanato aron magmakanunayon sa pagpadayon sa unahan subay sa dalan sa pakigsaad. Samtang kita moambit sa sakramento, kini mahimong usa ka pagpamatuod ngadto sa Amahan nga kita kanunayng mohinumdom sa Iyang Anak. Ug samtang kita kanunayng mohinumdom Kaniya ug motuman sa Iyang mga sugo, kita makabaton sa Iyang Espiritu uban kanato. Dugang pa niining saad, ang Ginoo mobag-o sa gisaad nga kapasayloan sa sala kon kita mapainubsanong maghinulsol sa atong mga sala.

Sa pagpabilin nga matinud-anon sa atong mga pakigsaad, kita kinahanglan nga maningkamot aron kanunayng makabaton sa Espiritu aron sa pag-andam kanato nga takos nga moambit sa sakramento, ug, sa samang paagi, kita kanunayng moambit sa sakramento aron kanunayng makabaton sa Espiritu uban kanato.

Sa dihang ang among anak nga babaye nagsingko anyos siya adunay debateriya nga modelo sa trak-trak ug ganahan nga magdrayb niini libot-libot sa balay. Usa ka gabii, miduol siya nako ug miingon, “Papa, ang akong trak-trak dili na modagan. Makakuha ba ta og gas gikan sa imong sakyanan aron ibutang niini aron kini modagan pag-usab? Tingali nagkinahanglan kini og gas sama sa imong sakyanan aron modagan.”

Pagkataud-taud akong naobserbaran nga ang bateriya hinay na, mao nga miingon ko nga ato kining mapaandar sulod sa usa ka oras. Dala sa hilabihan nga kalipay, miingon siya, “Yeyy! Dad-on nato kini ngadto sa gasolinahan.” Gikonektar lang nako ang bateriya ngadto sa kuryente aron makargahan, ug paglabay sa usa ka oras nakadrayb na siya sa trak-trak, gipaandar sa kargado nga bateriya. Gikan niana siya nakakat-on nga importante nga kanunayng pakargahan [recharge] ang bateriya pinaagi sa pagkonektar niini ngadto sa kuryente.

Samtang ang among anak nga babaye nakakat-on sa relasyon tali sa bateriya ug sa enerhiya aron madrayban ang iyang trak-trak, kita usab makakat-on kabahin ni Jesukristo, sa sakramento, ug sa Espiritu. Kita nagkinahanglan sa Espiritu aron sa pagtabang kanato sa pagnabigar latas sa mortalidad samtang kita matinud-anong motuman sa atong mga pakigsaad, ug ang sakramento mao ang modasig sa atong espirituwal nga pagkabinuhat. Ang pagbag-o sa atong pakigsaad sa bunyag ug pag-ambit sa sakramento makapadasig og kamatinud-anon ngadto sa uban pang mga pakigsaad. Usa ka malipayon nga kataposan ang gipanaad samtang kita mainampoon nga magtuon ug motahod sa imbitasyon sa Manluluwas ug motagamtam sa Iyang gisaad nga mga panalangin. Siya nag-ingon, “Ug nga kamo mahimo unta nga labaw nga moamping sa inyong mga kaugalingon nga walay buling gikan sa kalibotan, ug kamo moadto sa balay alampoanan ug mohalad sa inyong mga sakramento diha sa akong balaan nga adlaw” (Doktrina ug mga Pakigsaad 59:9).

Ako mopamatuod nga ang mga tigtuman sa pakigsaad gisaaran og kalinaw niini nga kalibotan ug kinabuhi nga dayon sa kalibotan nga umaabot” (Doktrina ug mga Pakigsaad 59:23). Ako mopamatuod nga samtang kamo kanunayng moambit sa simbolo sa Manluluwas pinaagi sa sakramento, kamo makabaton sa Iyang Espiritu aron mogiya kaninyo diha sa dalan sa pakigsaad ug magpabilin nga matinud-anon sa inyong mga pakigsaad. Sa ngalan ni Jesukristo, amen.