Kay Kita Gihigugma Pag-ayo sa Dios
Kita gihigugma pag-ayo sa Dios nga gipadala Niya ang Iyang Bugtong Anak—dili aron sa pagsilot nato, apan sa pagluwas nato.
“Kay gihigugma pag-ayo sa Dios ang kalibotan ug tungod niini gihatag niya ang iyang bugtong Anak, aron ang tanan nga motuo kaniya dili malaglag kondili makabaton hinuon sa kinabuhing dayon” (Juan 3:16). Sa unang higayon nga namatikdan nako kini nga bersikulo, wala ko sa simbahan o sa family home evening. Ako nagtan-aw og kalihokan sa sport diha sa telebisyon. Dili igsapayan kon unsa kadto nga estasyonan ang akong gitan-aw, ug unsa kadto nga duwa, basta adunay usa ka tawo nga naggunit og karatula nga mabasa ang “Juan 3:16.”
Ganahan usab ko sa bersikulo 17: “Kay wala ipadala sa Dios ang iyang Anak nganhi sa kalibotan aron pagsilot; kondili aron pagluwas niini.”
Ang Dios mipadala ni Jesukristo, ang Iyang Bugtong Anak diha sa unod, aron ihatag ang Iyang kinabuhi alang sa matag usa nato. Kini Iyang gibuhat tungod kay Siya nahigugma nato ug naghimo og plano aron ang matag usa nato makabalik ngadto Kaniya.
Apan dili kini matang sa plano nga pangkinatibuk-an, apilon tanan, usahay molampos ug usahay dili. Kini personal, gitakda sa mahigugmaong Langitnong Amahan, kinsa nasayod sa atong mga kasingkasing, atong mga ngalan, ug sa unsay Iyang kinahanglang ipabuhat nato. Nganong motuo man kita niini? Tungod kay kita gitudloan niini diha sa balaang mga kasulatan.
Si Moises balikbalik nga nakadungog sa mga pulong nga gisulti sa Langitnong Amahan nga “Moises, akong anak” (tan-awa sa Moises 1:6; tan-awa usab sa mga bersikulo 7, 40). Si Abraham nasayod nga siya anak sa Dios, gipili alang sa iyang misyon bisan sa wala pa siya gipakatawo (tan-awa sa Abraham 3:12, 23). Pinaagi sa gahom sa Dios, si Ester gibutang sa usa ka makaimpluwensiya nga kahimtang aron sa pagluwas sa iyang katawhan (tan-awa sa Ester 4). Ug ang Dios misalig sa usa ka batan-ong babaye, usa ka sulogoon, nga mopamatuod bahin sa usa ka buhing propeta aron si Naaman mamaayo (tan-awa sa 2 Mga Hari 5:1–15).
Ganahan kaayo ko nianang buotan nga tawo, mubo ang pamayhon, nga misaka sa kahoy aron makakita ni Jesus. Ang Manluluwas nasayod nga anaa siya didto, mihunong, mihangad ngadto sa mga sanga, ug militok niini nga mga pulong: “Saqueo, … kanaog dayon” (Lucas 19:5). Ug dili nato malimtan ang 14 anyos nga batang lalaki nga miadto sa kakahoyan ug nakakat-on kon unsa gayod ka personal ang plano: “[Joseph,] kini mao ang Akong Hinigugmang Anak. Paminaw Kaniya!” (Joseph Smith—Kasaysayan 1:17).
Mga kaigsoonan, kita mao ang pokus sa plano sa Langitnong Amahan ug ang rason alang sa misyon sa atong Manluluwas. Matag usa nato, sa tagsa-tagsa, mao ang Ilang buhat ug Ilang himaya.
Para nako, walay basahon sa kasulatan nga naghulagway niini nga mas klaro kay sa akong pagtuon sa Daang Tugon. Kapitulo human sa kapitulo kita makadiskobre og mga ehemplo kon sa unsang paagi nga ang Langitnong Amahan ug si Jehova nalambigit gayod sa atong kinabuhi.
Kita bag-o lang nga nagtuon mahitungod ni Jose, ang pinanggang anak ni Jacob. Sukad sa iyang kabatan-on, si Jose paborito gayod sa Ginoo, apan nakasinati siya og grabeng mga pagsulay sa kamot sa iyang mga igsoong lalaki. Duha ka semana ang milabay, daghan nato ang natandog kon giunsa ni Jose sa pagpasaylo ang iyang mga igsoong lalaki. Diha sa Dali, Sunod Kanako atong mabasa: “Sa daghang mga paagi, ang kinabuhi ni Jose susama kang Jesukristo. Bisan tuod ang atong mga sala mihatag Kaniya og hilabihan nga kasakit, ang Manluluwas nagtanyag og kapasayloan, nagluwas kanatong tanan gikan sa kapalaran nga mas grabe pa kay sa kagutom. Nagkinahanglan man kita nga modawat og kapasayloan o maninguha niini––sa umaabot nga panahon tanan kita nagkinahanglan nga buhaton ang duha––ang ehemplo ni Jose nagtudlo nato ngadto sa Manluluwas, ang tinuod nga tinubdan sa pagkaayo ug pagpasig-uli.”1
Ang usa ka leksiyon nga akong ganahan niana nga asoy naggikan sa igsoon ni Jose nga si Juda, nga adunay bahin sa personal nga plano sa Dios alang ni Jose. Sa dihang si Jose giluiban sa iyang mga igsoong lalaki, si Juda mikombinser nila nga dili patyon si Jose apan ibaligya siya ngadto sa pagkaulipon (tan-awa sa Genesis 37:26–27).
Daghang katuigan ang milabay, si Juda ug ang iyang mga igsoong lalaki kinahanglang modala sa ilang kinamanghuran, si Benjamin, ngadto sa Ehipto. Sa sinugdanan ang ilang amahan misupak. Apan si Juda misaad ni Jacob—dad-on niya og balik si Benjamin.
Didto sa Ehipto, ang saad ni Juda gisulayan. Ang batan-ong si Benjamin sayop nga naakusahan og krimen. Si Juda, matinud-anon sa iyang saad, mitanyag nga mao lang ang bilanggoon imbis nga si Benjamin. “Kay,” siya miingon, “unsaon ko man sa pag-adto sa akong amahan kon wala ang bata uban kanako?” (tan-awa sa Genesis 44:33–34). Si Juda determinado nga motuman sa iyang saad ug midala og balik ni Benjamin sa luwas nga paagi. Gibati na ba ninyo sa uban ang gibati ni Juda ngadto ni Benjamin?
Dili ba ingon man niini ang gibati sa mga ginikanan sa ilang mga anak? Unsay gibati sa mga misyonaryo sa mga tawo nga ilang giserbisyohan? Unsay gibati sa mga lider sa Primary ug sa kabatan-onan niadtong ilang gitudloan ug gihigugma?
Dili igsapayan kon kinsa kamo o ang inyong mga kahimtang karon, adunay usa ka tawo nga mibati gayod niini nganha ninyo. Adunay usa ka tawo nga gustong mobalik ngadto sa Langitnong Amahan uban ninyo.
Ako mapasalamaton niadtong wala gayod mobiya nato, nga padayong nangaliyupo diha sa pag-ampo alang nato, ug padayong nagtudlo ug nagtabang nato nga mahimong takos nga makabalik ngadto sa atong Amahan sa Langit.
Bag-ohay lang usa ka minahal nga higala ang naospital og 233 ka adlaw tungod sa COVID-19. Nianang higayona, gibisitahan siya sa iyang namatay na nga amahan, nga mihangyo nga ipaabot ang usa ka mensahe ngadto sa iyang mga apo. Bisan sa pikas bahin sa tabil, kining buotan nga apohang lalaki nagtinguha nga motabang sa iyang mga apo nga makabalik ngadto sa ilang langitnong panimalay.
Nagkadaghan, ang mga disipulo ni Kristo naghinumdom sa “mga Benjamin” sa ilang kinabuhi. Sa tibuok kalibotan sila naminaw sa klaro kaayo nga panawagan sa buhi nga propeta sa Dios, si Presidente Russell M. Nelson. Ang mga batan-ong lalaki ug mga batan-ong babaye miapil sa batalyon sa Ginoo sa kabatan-onan. Ang mga indibidwal ug mga pamilya mitabang diha sa diwa sa pagpangalagad—sa paghigugma, pagpaambit, ug pagdapit sa mga higala ug mga silingan nga moduol ngadto kang Kristo. Ang kabatan-onan ug mga hamtong naghinumdom ug naningkamot sa pagtuman sa ilang mga pakigsaad—nagpuno sa mga templo sa Dios, nangita sa mga ngalan sa namatay na nga mga sakop sa pamilya, ug nagdawat og mga ordinansa alang nila.
Ngano nga ang plano sa Langitnong Amahan nga gipahaom sa atong pagkatawo naglakip man sa pagtabang sa uban nga makabalik ngadto Kaniya? Tungod kay mao kini ang paagi nga kita mahisama ni Jesukristo. Sa kataposan, ang asoy bahin ni Juda ug Benjamin nagtudlo nato mahitungod sa sakripisyo sa Manluluwas alang nato. Pinaagi sa Iyang Pag-ula, Siya mihatag sa Iyang kinabuhi aron dad-on kita og balik. Ang mga pulong ni Juda nagpahayag sa gugma sa Manluluwas: “Unsaon ko man sa pag-adto sa akong amahan kon wala [kamo] uban kanako?” Isip mga tigpundok sa Israel, mao usab kana ang atong mga pulong.
Ang Daang Tugon naglangkob og mga sugilanon bahin sa mga milagro ug malumo nga mga kalooy nga mao ang timaan sa plano sa Langitnong Amahan. Diha sa 2 Mga Hari 4, ang hugpong sa mga pulong nga “nahitabo sa usa ka adlaw” gigamit og tulo ka higayon aron sa paghatag og gibug-aton ngari nako nga ang importante nga mga panghitabo mahitabo sumala sa gitakda nga panahon sa Dios ug walay detalye nga gamay kaayo alang Niya.
Ang akong bag-o nga higala nga si Paul mipamatuod bahin niini nga kamatuoran. Si Paul nagdako sa usa ka panimalay nga usahay adunay pag-abuso ug kanunay nga dili mauyonon bahin sa relihiyon. Samtang nag-eskwela sa base sa militar didto sa Germany, nakamatikod siya og duha ka sister nga daw adunay espirituhanong kahayag. Ang pagpangutana kon nganong lahi sila nagdala og tubag nga sila sakop sa Ang Simbahan ni Jesukristo sa mga Santos sa Ulahing mga Adlaw.
Wala madugay si Paul misugod sa pagpakigkita sa mga misyonaryo ug gidapit ngadto sa simbahan. Pagkasunod Dominggo, pagkanaog niya sa bus, nakamatikod siya og duha ka lalaki nga nagsul-ob og puti nga polo ug nagkurbata. Siya nangutana kanila kon sila mga elder ba sa Simbahan. Sila mitando, mao nga misunod si Paul nila.
Atol sa pagsimba, ang tigsangyaw mitudlo og mga tawo sa kongregasyon ug midapit nila aron mopamatuod. Human sa matag pagpamatuod, ang usa ka drummer motugtog sa drum sa pagsaludo ug ang kongregasyon mosinggit og, “Amen.”
Sa dihang ang tigsangyaw mitudlo ni Paul, siya mibarog ug miingon, “Ako nasayod nga si Joseph Smith usa ka propeta ug ang Basahon ni Mormon tinuod.” Walay tugtog sa drum sa pagsaludo o mga amen. Si Paul sa kadugayan nakaamgo nga naadto siya sa sayop nga simbahan. Wala madugay, si Paul nakakita ra sa saktong lugar ug nabunyagan.
Sa adlaw sa bunyag ni Paul, usa ka miyembro nga wala niya mailhi miingon niya, “Giluwas nimo ang akong kinabuhi.” Sa milabayng pipila ka semana, kini nga tawo nakadesisyon nga mangita og laing simbahan ug mitambong sa miting nga adunay mga drum ug mga amen. Sa dihang ang tawo nakadungog ni Paul nga nagpamatuod bahin ni Joseph Smith ug sa Basahon ni Mormon, iyang naamgohan nga ang Dios nakaila niya, nasayod sa iyang mga kalisod, ug adunay plano alang niya. Alang kang Paul ug sa tawo, kini “nahitabo sa usa ka adlaw,” sa pagkatinuod!
Kita usab nasayod nga ang Langitnong Amahan adunay personal nga plano sa kalipay alang sa matag usa nato. Tungod kay ang Dios mipadala sa Iyang Gihigugma nga Anak alang nato, ang mga milagro nga atong gikinahanglan “[mahitabo] nianang adlawa [gayod]” nga kinahanglanon aron ang Iyang plano matuman.
Ako mopamatuod nga niining tuiga kita makakat-on og dugang pa mahitungod sa plano sa Dios alang nato diha sa Daang Tugon. Kanang sagrado nga mga kasulatan nagtudlo sa tahas sa mga propeta diha sa mga panahon nga walay kasigurohan ug sa impluwensiya sa Dios diha sa usa ka kalibotan nga naglibog ug sa kanunay mabingkilon. Kini mahitungod usab sa mapaubsanong mga tumutuo nga matinud-anong naghulat sa pag-anhi sa atong Manluluwas, sama sa atong paghulat ug pag-andam alang sa Iyang Ikaduhang Pag-anhi—ang Iyang dugay na nga gipanagna, nga mahimayaong pagbalik.
Hangtod nianang adlawa, kita tingali dili makakita gamit ang atong kinaiyanhon nga mga mata sa plano sa Dios alang sa tanang aspeto sa atong kinabuhi (tan-awa sa Doktrina ug mga Pakigsaad 58:3). Apan mahimo natong hinumdoman ang tubag ni Nephi sa dihang nag-atubang og usa ka butang nga wala niya masabti: bisan siya wala masayod sa kahulogan sa tanang butang, siya nasayod nga ang Dios nahigugma sa Iyang mga anak (tan-awa sa 1 Nephi 11:17).
Kini mao ang akong pagsaksi niining matahom nga kabuntagon sa Igpapahulay. Unta mapatik kini sa atong mga kasingkasing ug motugot niini nga mopuno sa atong mga kalag og kalinaw, paglaom, ug mahangtorong kalipay: Kita gihigugma pag-ayo sa Dios nga gipadala Niya ang Iyang Bugtong Anak—dili aron sa pagsilot nato, apan sa pagluwas nato. Sa ngalan ni Jesukristo, amen.