“Marso 14–20. Genesis 42–50: ‘Ang Tuyo sa Dios alang sa Kaayohan,’” Dali, Sunod Kanako—Alang sa mga Indibidwal ug mga Pamilya: Daang Tugon 2022 (2021)
“Marso 14–20. Genesis 42–50,” Dali, Sunod Kanako—Alang sa mga Indibidwal ug mga Pamilya: 2022
Paghulagway ni Jose sa Ehipto, ni Robert T. Barrett
Marso 14–20
Genesis 42–50
“Ang Tuyo sa Dios alang sa Kaayohan”
Ang pagbasa sa mga kasulatan nagdapit sa Espiritu. Paminaw alang sa Iyang mga pag-aghat samtang ikaw nagbasa, bisan kon kini dili ingon og direkta nga kalabut ngadto sa unsay imong gibasa.
Irekord ang Imong mga Impresyon
Kini mga 22 na ka tuig sukad gibaligya si Jose ngadto sa Ehipto sa iyang igsoong mga lalaki. Siya miantus og daghang mga pagsulay, lakip ang sayop nga pagpasangil ug pagkabilanggo. Sa dihang sa katapusan nakita niya ang iyang igsoong mga lalaki pag-usab, si Jose mao ang gobernador sa tibuok Ehipto, ikaduha lamang sa paraon. Sayon unta kaayo kaniya ang pagpanimalos kanila, ug kon hunahunaon unsa ang ilang gibuhat ngadto ni Jose, kana ingon og masabtan. Ug bisan niana gipasaylo ni Jose ang iyang igsoong mga lalaki. Dili lamang kana, gani gitabangan niya sila sa pagtan-aw sa balaang katuyoan sa iyang pag-antus. “Ang tuyo sa Dios alang sa kaayohan” (Genesis 50:20), misulti siya kanila, tungod kay kini mibutang kaniya sa kahimtang nga maluwas ang “tanan sa panimalay sa iyang amahan” (Genesis 47:12) gikan sa kagutom.
Sa daghang mga paagi, ang kinabuhi ni Jose susama kang Jesukristo. Bisan tuod ang atong mga sala mihatag Kaniya og dakong kasakit, ang Manluluwas nagtanyag og kapasayloan, nagluwas kanatong tanan gikan sa kapalaran nga mas grabe pa kay sa kagutom. Nagkinahanglan man kita nga modawat og kapasayloan o maninguha niini––sa umaabut nga panahon tanan kita nagkinahanglan nga buhaton ang duha––ang ehemplo ni Jose nagtudlo kanato ngadto sa Manluluwas, ang tinuod nga tinubdan sa pakaayo ug pagpasig-uli.
Mga Ideya alang sa Personal nga Pagtuon sa Kasulatan
“Ang Dios nagpadala kanako sa pag-una kaninyo aron sa pagbantay kaninyo.”
Samtang ikaw nagbasa mahitungod ni Jose, nakamatikod ka ba og mga pagkasusama tali sa iyang istorya ug sa maulaong misyon ni Jesukristo? Mahimo kang mamalandong kon sa unsa nga paagi ang tahas ni Jose diha sa iyang pamilya susama ngadto sa tahas sa Manluluwas diha sa pamilya sa Dios. Unsa nga mga pagkasusama ang imong nakita tali sa mga kasinatian ni Jose ug sa misyon sa Manluluwas, kinsa gipadala “sa pagluwas [kanato] pinaagi sa dako nga pagluwas”? (Genesis 45:7).
Ang pagpasaylo nagdala og pagkaayo.
Ang pagbasa mahitungod sa pagpasaylo ni Jose sa iyang igsoong mga lalaki alang sa grabing mga butang nga ilang gihimo ngadto kaniya mahimong moaghat kanimo sa paghunahuna mahitungod sa usa ka tawo nga sa karon ikaw nanlimbasog sa pagpasaylo. O tingali sa usa ka malisud nga pagsulay sa pagpasaylo anaa sa imong umaabut. Bisan hain nga paagi, kini mahimong makatabang kanimo sa pagpamalandong kon nganong si Jose nakahimo sa pagpasaylo. Unsa ang mga ilhanan mahitungod sa kinaiya ug batasan ni Jose ang imong makita sa Genesis 45; 50:15–21? Sa unsa nga paagi kaha ang iyang mga kasinatian nag-impluwensya kaniya nga mahimong mas mapasayloon? Unsa ang gisugyot sa ehemplo ni Jose mahitungod sa unsaon nga ikaw mahimong mas mapasayloon uban sa panabang sa Manluluwas?
Tan-awa usab ang mga panalangin nga miabut sa pamilya ni Jose tungod sa iyang pagpasaylo. Unsa nga mga panalangin ang imong nakita gikan sa pagpasaylo? Gibati ba nimo ang kadasig sa pagtabang ngadto sa usa ka tawo kinsa nakasala kanimo?
Tan-awa usab Genesis 33:1–4; Doktrina ug mga Pakigsaad 64:9–11; Larry J. Echo Hawk, “Maingon nga si Kristo Nakapasaylo Kaninyo, Nan Kinahanglan Kamo Usab Magapasaylo,” Liahona, Mayo 2018, 15–16.
Unsa ang kahulugan sa simbolismo sa mga panalangin ni Jacob?
Ang mga panalangin ni Jacob ngadto sa iyang kaliwatan naglangkob ug tataw nga paghulagway, apan ang pipila ka mga mambabasa mahimo usab nga makakita niini nga malisud sabton. Sa mapasalamatong paagi, ang gipahiuli nga ebanghelyo naghatag kanato og pipila ka dugang nga pagpasabut. Kon ikaw magbasa sa panalangin ngadto ni Jose sa Genesis 49:22–26, basaha usab ang mosunod nga mga bersikulo, ug tan-awa unsa nga mga panabut ang gihatag niini: 1 Nephi 15:12; 2 Nephi 3:4–5; Jacob 2:25; Doktrina ug mga Pakigsaad 50:44.
Samtang ikaw nagbasa mahitungod sa panalangin ni Juda sa Genesis 49:8–12, hinumdumi nga si Haring David ug si Jesukristo mga kaliwat ni Juda. Unsa nga mga pulong ug mga pundok sa mga pulong niini nga mga bersikulo ang nagpahinumdom kanimo sa Manluluwas? Kon ikaw magtuon sa panalangin ni Juda, makatabang usab ang pagbasa sa Pinadayag 5:5–6, 9; 1 Nephi 15:14–15; Doktrina ug mga Pakigsaad 45:59; 133:46–50.
Kon ikaw gusto nga makakat-on pa mahitungod sa anak nga mga lalaki ni Jacob ug sa mga tribo ni Israel kinsa mga kaliwat nila, adunay tala alang sa matag usa diha sa Ang Giya ngadto sa mga Kasulatan (scriptures.ChurchofJesusChrist.org).
Genesis 50:24–25; Hubad ni Joseph Smith, Genesis 50:24–38 (Ang Giya ngadto sa mga Kasulatan)
“Usa ka manalagna ang Ginoo nga akong Dios mopasanay.”
Pinaagi sa mga damgo ni Jose (tan-awa sa Genesis 37:5–11) ug sa iyang mga paghubad sa ubang mga damgo (tan-awa sa Genesis 40–41), mipadayag ang Ginoo og mga butang nga mahitabo sa mga adlaw o mga tuig nga umaabut. Apan mipadayag usab ang Ginoo ngadto ni Jose unsa ang mahitabo sa umaabut nga mga siglo. Sa piho gayud, iyang nahibaloan ang gipanagna nga propetikanhong mga misyon nila ni Moises ug Joseph Smith. Samtang ikaw nagbasa sa mga pulong ni Jose sa Genesis 50:24–25 ug sa Hubad ni Joseph Smith, Genesis 50:24–38 (diha sa Giya ngadto sa mga Kasulatan), pangutan-a ang imong kaugalingon kon sa unsa nga paagi ang pagkanahibalo niini nga mga butanga nagpanalangin ni Jose ug sa mga anak sa Israel. Sa imong hunahuna ngano kahang importante alang sa Ginoo ang pagpahiuli niini nga panagna pinaagi ni Joseph Smith? (tan-awa usab sa 2 Nephi 3).
Giunsa pagtuman ni Joseph Smith ang mga panagna diha sa Hubad ni Joseph Smith, Genesis 50: 27–28, 30–33? (tan-awa sa Doktrina ug mga Pakigsaad 1:17–23; 20:7–12; 39:11; 135:3).
Paghulagway ni Jose sa Ehipto, ni Paul Mann
Mga Ideya alang sa Pamilya nga Pagtuon sa Kasulatan ug Family Home Evening
-
Genesis 42–46.Ang imong pamilya mahimong malingaw sa pag-aksyon sa istorya ni Jose nga nagkighiusa sa iyang igsoong mga lalaki. Kalingaw niini––gamit og mga sinina ug mga prop kon gusto nimo. Awhaga ang mga sakop sa pamilya sa pagsulay og sabut sa mga pagbati ug mga panan-aw sa mga karakter. Mahimo kang mopunting ilabi na sa mga pagbati ni Jose ngadto sa iyang igsoong mga lalaki ug diha sa unsa kaha ang ilang mga gibati sa dihang sila gipasaylo niya. Kini makagiya ngadto sa usa ka panaghisgot mahitungod kon unsaon sa pagpasaylo nga makapanalangin sa inyong pamilya.
Sa dihang nagkita og usab si Jose ug ang iyang igsoong mga lalaki human sa daghang mga katuigan, giunsa nila pagpakita nga sila nausab sukad sa katapusan niyang pagkakita kanila? Unsa ang atong makat-unan mahitungod sa paghinulsol gikan sa ilang mga kasinatian?
-
Genesis 45:3–11; 50:19–21.Naila ni Jose nga bisan tuod ang iyang kasinatian sa Ehipto nahimong malisud, “ang tuyo sa Dios alang sa kaayohan” (Genesis 50:20). Nakasinati ba ang imong pamilya og bisan unsa nga mga pagsulay nga gibali sa Dios ngadto sa mga panalangin?
Usa ka himno mahitungod sa kaayo sa Dios atol sa mga panahon sa pagsulay (sama sa “Unsa Kalig-on ang Tukuranan” [Mga Himno,nu. 44]) makapalambo niini nga panaghisgot. Unsa nga mga detalye gikan sa mga kasinatian ni Jose ang nagpakita unsa ang gitudlo sa himno?
-
Genesis 49:9–11, 24–25.Unsa ang makaplagan nato dinhi niini nga mga bersikulo nga nagtudlo kanato mahitungod sa tahas ug misyon ni Jesukristo? (Alang sa tabang sa pagsabut niini nga mga hugpong sa mga pulong dinhi niini nga mga bersikulo, tan-awa ang materyal mahitungod sa Genesis 49 sa “Mga Ideya alang sa Personal nga Pagtuon sa Kasulatan ”)
Alang sa dugang nga mga ideya sa pagtudlo sa mga bata, tan-awa sa latid [outline] karong semanaha sa Dali, Sunod Kanako—Alang sa Primary.
Gisugyot nga awit: “Unsa Kalig-on ang Tukuranan,” Mga Himno, nu. 44.
Pagpalambo sa Atong Pagtudlo
Paggamit og musika. Tabangi ang mga sakop sa pamilya sa pagpangita og mga kamatuoran sa ebanghelyo diha sa mga pulong sa mga himno ug sa mga awit sa Primary. Pangita og mga paagi sa paghimo sa sagrado nga musika nga usa ka kanunay nga bahin sa imong pagtuon sa ebanghelyo.
Jacob Blessing His Sons [Jacob Nagpanalangin sa Iyang Anak nga mga Lalaki], ni Harry Anderson