Pebrero 28–Marso 6

Genesis 28–33

“Sa Pagkamatuod ang Dios Ania Niining Dapita”

Samtang ikaw nagbasa sa Genesis 28–33, pamalandunga kon unsa ang imong nakat-unan gikan sa mga ehemplo ni Jacob ug sa iyang pamilya. Isulat ang bisan unsa nga mga impresyon nga imong madawat.

Irekord ang Imong mga Impresyon

Mga Kapitulo 28 ug 32 sa Genesis nagsaysay kabahin sa duha ka espiritwal nga mga kasinatian nga si propeta Jacob aduna. Ang duha nahitabo didto sa kamingawan apan ubos sa lahi kaayo nga mga sitwasyon. Sa unang kasinatian, si Jacob nagpanaw ngadto sa yutang natawhan sa iyang inahan aron sa pagpangita og pangasaw-unon ug, sa pagpadulong ngadto, nagpabilin sa kagabhion nga nag-unlan og mga bato. Tingali siya wala magdahum nga makaplagan ang Ginoo sa ingon ka mingaw nga dapit, apan ang Dios mipadayag sa Iyang Kaugalingon ngadto ni Jacob sa usa ka makapausab sa kinabuhi nga damgo, ug mipahayag si Jacob, “Sa pagkamatuod ang Ginoo ania niining dapita; ug ako wala mahibalo” (Genesis 28:16). Mga tuig milabay, nakaplagan ni Jacob ang iyang kaugalingon nga didto na usab sa kamingawan. Niini nga panahon, siya nagpadulong balik ngadto sa Canaan, nag-atubang og may kalagmitang makuyaw nga panaghiusa og balik [reunion] sa iyang nasuko nga igsoong lalaki, si Esau. Apan nahibalo si Jacob nga kon siya nanginahanglan og panalangin, makapangayo siya sa Ginoo, bisan diha sa kamingawan (tan-awa sa Genesis 32).

Mahimong makaplagan nimo ang imong kaugalingon diha sa kaugalingon nimong kamingawan nagtinguha og panalangin gikan sa Dios. Tingali ang imong kamingawan usa ka malisud nga relasyon sa pamilya, ingon nga si Jacob aduna. Tingali gibati nimo nga nalayo gikan sa Dios o gibati nga ikaw nanginahanglan og panalangin. Usahay ang panalangin moabut nga wala damha, sa ubang mga panahon kini giunhan og usa ka pakigbisog. Bisan unsa ang imong kinahanglanon, ikaw makadiskubre nga bisan diha sa imong kamingawan, “ang Ginoo ania niining dapita,”

Mga Ideya alang sa Personal nga Pagtuon sa Kasulatan

Genesis 28; 29:1–18

Ako gisaaran sa mga panalangin ni Abraham didto sa templo.

Sa iyang pagpadulong ngadto sa Haran sa pagpangita og pangasaw-unon, gidamgo ni Jacob ang usa ka hagdan nga nagkataas gikan sa yuta ngadto sa langit, nga ang Dios nagbarug ibabaw niini. Diha sa damgo, gisulti pag-usab sa Dios ngadto ni Jacob ang samang mga pakigsaad nga Iyang gihimo uban ni Abraham ug Isaac (tan-awa sa Genesis 28:10–17; tan-awa usab sa Genesis 12:2–3; 26:1–4). Gipakigbahin ni Presidente Marion G. Romney kini nga hunahuna mahitungod sa unsay mahimong girepresentahan sa hagdan: “Naamguhan ni Jacob nga ang mga pakigsaad nga iyang gihimo uban sa Ginoo dihay mga ang-ang sa hagdan nga siya sa iyang kaugalingon mismo kinahanglan nga mosaka aron maangkon ang gisaad nga panalangin––mga panalangin nga maghatag kaniya og katungod sa pagsulod sa langit ug sa pakig-uban sa Ginoo. … Ang mga templo mao ang ngari kanatong tanan unsa ang Bethel mao ang ngadto ni Jacob” (“Temples—The Gates to Heaven,” Ensign, Mar. 1971, 16).

Unsa ang ubang mga pulong ug mga hugpong sa mga pulong sa Genesis 28:10–22 ang nagsugyot kanimo og koneksyon tali sa kasinatian ni Jacob ug sa mga panalangin sa templo? Samtang ikaw nagbasa niini nga mga bersikulo, hunahunaa ang mga pakigsaad nga imong gihimo, unsa nga mga impresyon ang miabut nganha kanimo?

Samtang ikaw nagbasa sa Genesis 29:1–18, pamalandunga kon unsa ang kaminyoon ni Jacob ngadto ni Raquel ka importante ngadto sa pakigsaad nga gisulti pag-usab ngadto ni Jacob didto sa Bethel (“balay sa Dios”; tan-awa sa Genesis 28:10–19). Hinumdumi kini nga kasinatian samtang ikaw nagpadayon sa pagbasa mahitungod sa kinabuhi ni Jacob sa Genesis 29–33. Sa unsa nga paagi ang balay sa Ginoo mas nakapaduol kanimo ngadto sa Dios?

Tan-awa usab sa Yoon Hwan Choi, “Ayaw Pagtan-aw sa Palibut, Hangad!” Liahona, Mayo 2017, 90–92.

Genesis 29:31–35; 30:1–24

Naghinumdom kanako ang Ginoo sa akong mga pagsulay.

Bisan tuod og si Raquel ug si Lea nagpuyo sa usa ka panahon ug kultura nga lahi sa ato, tanan kita makasabut sa pipila ka mga pagbati nga sila aduna. Samtang ikaw nagbasa sa Genesis 29:31–35 ug sa 30:1–24, pangita og mga pulong o mga hugpong sa mga pulong nga naghulagway sa kalooy sa Dios ngadto ni Raquel ug ni Lea. Pamalandunga kon giunsa sa Dios nga “natan-aw na ang [imong] kasakit” ug “nahinumdum” kanimo (Genesis 29:32; 30:22).

Kini importante usab sa paghinumdom nga bisan tuod ang Dios nakadungog kanato, diha sa Iyang kaalam Siya dili kanunay mohatag kanato sa eksakto sa unsay atong gipangayo. Hunahunaa ang pagtuon sa mensahe ni Elder Brook P. Hales “Mga Tubag sa Pag-ampo” (Liahona, Mayo 2019, 11–14) aron sa pagkat-on mahitungod sa lainlaing mga paagi ang Langitnong Amahan nagtubag kanato.

Alang sa dugang pa mahitungod sa kultural nga kaagi niini nga istorya, tan-awa sa Manwal sa mga Estudyante sa Daang Tugon: Genesis–2 Samuel (2003), 86–88.

Paghulagway ni Jacob ug Esau nga nagginaksanay, ni Robert T. Barrett

Genesis 32–33

Ang Manluluwas makatabang kanato sa pagbuntog sa dili pagsinabtanay sa atong mga pamilya.

Samtang si Jacob mibalik ngadto sa Canaan, siya “nahadlok sa hilabihan gayud ug nagsubo” mahitungod kon unsaon pagdawat ni Esau kaniya (Genesis 32:7). Samtang ikaw nagbasa sa Genesis 32–33 mahitungod sa pakigkita ni Jacob kang Esau ug sa iyang mga pagbati nga nagdala ngadto niini, mahimo kang mamalandong sa imong kaugalingong mga relasyon sa pamilya–tingali sa usa nga nanginahanglang ayuhon. Tingali kini nga istorya makadasig kanimo sa pagtabang sa usa ka tawo. Mga pangutana sama niini makatabang og giya sa imong pagbasa:

• Giunsa ni Jacob pagpangandam ang pakigkita ni Esau?

• Unsa ang tataw nganha kanimo mahitungod sa pag-ampo ni Jacob diha sa Genesis 32:9–12?

• Unsa ang imong nakat-unan mahitungod sa pagpasaylo gikan sa ehemplo ni Esau?

• Sa unsang paagi ang Manluluwas makatabang kanato sa pag-ayo og mga relasyon sa pamilya?

Tan-awa usab sa Lucas 15:11–32; Jeffrey R. Holland, “Ang Pangalagad sa Pasig-uli (Reconciliation),” Liahona, Nob. 2018, 77–79.

Mga Ideya alang sa Pamilya nga Pagtuon sa Kasulatan ug Family Home Evening

Genesis 28–33.Gamita ang “Jacob ug Iyang Banay” (sa Mga Istorya sa Daang Tugon) sa pagtabang sa mga bata pagsabut sa mga hitabo gikan niini nga mga kapitulo. Tingali ang mga sakop sa pamilya makahunong kadiyut sa matag hulagway ug ilhon unsa ang gitudlo, sama sa importansya sa kaminyoon, mga pakigsaad, buhat, ug pagpasaylo.

Genesis 28:10–22.Makagamit ka og hagdan (o usa ka hulagway) sa pagsulti mahitungod kon unsaon sa atong mga pakigsaad nga sama sa usa ka hagdan. Unsa nga mga pakigsaad ang atong nahimo, ug giunsa niini pagdala kanato nga mas maduol ngadto sa Dios? Mahimong ang mga sakop sa pamilya malingaw sa pagdrowing sa damgo ni Jacob, nga gihulagway sa Genesis 28:10–22.

Ang himno “Mas Magpaduol Ko Dios, Kanimo” (Mga Himno, nu. 55) nadasig sa damgo ni Jacob. Mahimong makakanta ang imong pamilya niini nga awit ug maghisgot unsa ang gitudlo sa matag bersikulo.

Genesis 32:24–32.Mahimong ikaw adunay mga sakop sa pamilya kinsa gustong makiglayog. Nganong ang “pakigbisog” usa ka maayong paagi sa paghulagway sa nagtinguha og mga panalangin gikan sa Ginoo? Unsa ang gisugyot sa Enos 1:1–5; Alma 8:9–10 mahitungod sa unsa ang kahulugan sa “pakigbisog … sa atubangan sa Dios”?

Genesis 33:1–12.Human sa daghang mga tuig sa kasuko, si Jacob ug si Esau nagkahiusa og balik. Kon si Jacob ug si Esau makasulti kanato karon, unsa kaha ang ilang isulti sa pagtabang kanato kon adunay panagbingkil sa atong pamilya?

Alang sa dugang nga mga ideya sa pagtudlo sa mga bata, tan-awa sa latid [outline] karong semanaha sa Dali, Sunod Kanako—Alang sa Primary.

Gisugyot nga awit: “Pinalangga nga mga Anak, ang Dios duol Kaninyo,” Mga Himno, nu. 50.

Pagpalambo sa Personal nga Pagtuon

Pangitaa si Jesukristo. Ang Daang Tugon nagpamatuod ni Jesukristo pinaagi sa mga istorya ug mga simbolo niini. Hunahunaa ang pagtimaan o pagmarka sa mga bersikulo nga nagpasabut ngadto sa Manluluwas ug ilabi ka makahuluganon nganha kanimo.

Jacob’s Dream at Bethel [Damgo ni Jacob didto sa Bethel], ni J. Ken Spencer