Pebrero 28–Marso 6

Genesis 28–33

“Sa Pagkamatuod ang Ginoo Ania Niining Dapita”

Samtang magbasa ka sa Genesis 28–33, pamalandungi sa unsang paagi ang mga istorya ug mga baruganan niini nga mga kapitulo makapanalangin sa mga bata nga imong gitudloan.

Irekord ang Imong mga Impresyon

Dapita ang Pagpaambit

Dapita ang mga bata sa pag-itsa o pagpaligid og usa ka bola ngadto sa usag usa. Kon ang mga bata makasalo sa bola, hangyoa sila sa pagpaambit og butang nga ilang nakat-unan gikan sa Daang Tugon, diha man sa panimalay o sa Primary.

Itudlo ang Doktrina: Mas Gagmay nga mga Bata

Genesis 28:10–22

Ang mga pakigsaad makatabang kanako nga makabalik ngadto sa Langitnong Amahan.

Sa usa ka damgo, si Jacob nakakita og hagdanan nga paingon sa langit. Ang mga ang-ang sa hagdanan makarepresentar sa mga pakigsaad nga atong gihimo uban sa Dios, kay kini nga mga pakigsaad makatabang kanato nga maandam sa pagbalik ngadto sa Iyang presensya.

Posible nga mga Kalihokan

• Basaha ang Genesis 28:12–13 ngadto sa mga bata. Ipasabut nga ang mga ang-ang sa hagdanan makarepresentar sa mga pakigsaad nga makatabang kanato nga makabalik sa Langitnong Amahan. Dapita ang mga bata sa pagpakaaron-ingnon nga sila misaka sa hagdanan samtang maghisgot ka mahitungod sa mga higayon dihang misaad kita nga motuman sa Dios, sama sa atong pagbunyag, pag-ambit sa sakramento, o pag-adto sa templo. Tabangi ang mga bata sa paghunahuna og mga paagi nga sila makapangandam kon sila bunyagan.

• Basaha ang Genesis 28:15 ngadto sa mga bata, nga mopasabut og maayo sa mga pulong nga “Ako magauban kanimo” ug “Ako dili mobiya kanimo.” Ipasabut nga ang Dios misaad nga kanunayng magauban kanato samtang maningkamot kita sa pagpili sa husto. Tabangi ang mga bata sa paghunahuna og mga butang nga ilang mahimo aron mobati nga mas duol sa Langitnong Amahan ug ni Jesukristo.

Genesis 29:16–28

Kinahanglan nga akong tumanon kanunay ang akong mga saad.

Si Jacob miuyon nga magtrabaho para ni Laban sulod sa pito ka tuig aron maminyoan niya ang anak nga babaye ni Laban nga si Rachel. Si Jacob mituman niini nga kasabutan, apan si Laban wala. Ikonsiderar ang paggamit niini nga istorya sa pagtudlo sa mga bata mahitungod sa kaimportante sa pagtuman sa atong mga saad.

Posible nga mga Kalihokan

• Basaha ang Genesis 29:18, 20 ngadto sa mga bata, ug ipasabut nga si Jacob mituman sa iyang saad nga motrabaho og pito ka tuig alang kang Laban aron iyang maminyoan si Rachel, bisan og taas kini nga panahon sa pagtrabaho (tan-awa usab sa “Jacob ug ang Iyang Banay,” diha sa Mga Istorya sa Daang Tugon). Tabangi ang mga bata sa paghunahuna og mga saad nga tingali ilang buhaton ngadto sa ubang tawo. Nganong importante man ang pagtuman sa atong mga saad? Tabangi sila nga makasabut nga ang pakigsaad usa ka sagradong kasabutan tali sa Dios ug sa matag usa kanato. Ihatag ang imong pagpamatuod nga ang Langitnong Amahan ug si Jesukristo kanunayng motuman sa Ilang mga saad.

• Kantaha og dungan ug hisguti ang usa ka awit mahitungod sa pagkamatinuoron, sama sa “Barugan ang Kamatuoran” (Songbook sa mga Bata, 81).

Genesis 33:1–4

Ang Langitnong Amahan ug si Jesukristo makatabang nako sa paghigugma sa akong pamilya.

Kadaghanan sa mga bata nahibalo unsay bation kon masuko sa usa ka igsoon. Ang istorya mahitungod kon giunsa ni Jacob ug ni Esau sa pagbuntog ang ilang kasuko sa usag usa tingali makadasig kanila.

Paghulagway kang Jacob ug ni Esau nga nagginaksanay, ni Robert T. Barrett

Posible nga mga Kalihokan

• Tabangi ang mga bata sa paghinumdom nganong si Esau nasuko kang Jacob (tan-awa sa Genesis 27:41 o sa “Jacob ug Esau,” diha sa Mga Istorya sa Daang Tugon). Hangyoa ang mga bata sa pagpakita diha kanimo unsa ang hitsura sa masuk-anon nga nawong. Ipasabut nga human sa daghang katuigan, si Jacob nahadlok nga mobisita ni Esau. Hangyoa ang mga bata sa pagpakita diha kanimo unsay hitsura sa nahadlok nga nawong. Unsay angay natong buhaton kon kita mahadlok? Dapita ang mga bata sa pagpakaaron ingnon nga nag-ampo samtang basahon nimo unsay gisulti ni Jacob sa iyang pag-ampo (tan-awa sa Genesis 32:11). Dayon basaha diha sa Genesis 33:4 unsay nahitabo dihang nakita ni Esau si Jacob. Hangyoa ang mga bata sa pagpakita kanimo unsa kahay hitsura ni Jacob ug ni Esau dihang nagkita silang duha pag-usab.

• Ipakita ang litrato ni Jacob ug ni Esau nga makita dinhi niini nga outline. Ipahulagway sa mga bata unsay ilang nakita sa litrato. Sultihi sila nga dunay dautang mga pagbati tali niining duha ka managsoon, apan gipili nila ang pagpasaylo sa usag usa. Tabangi ang mga bata sa paghunahuna kon sa unsang paagi sila makapakita og dugang nga gugma ngadto sa usa diha sa ilang pamilya, sama sa gipakita nga gugma ni Jacob ug ni Esau sa usag usa.

Itudlo ang Doktrina: Mas Dagko nga mga Bata

Genesis 28:10–22

Ang mga pakigsaad makatabang kanako nga makabalik ngadto sa Langitnong Amahan.

Pwede nimong gamiton ang damgo ni Jacob bahin sa usa ka hagdanan padulong ngadto sa langit sa pagtudlo sa mga bata nga ang pagtuman sa mga pakigsaad mag-andam kanato sa pagsulod sa presensya sa Dios.

Posible nga mga Kalihokan

• Dapita ang mga bata sa pagbasa sa Genesis 28:10–15 ug dayon sa pagdrowing og litrato sa damgo ni Jacob. Hangyoa sila sa pagpaambit sa ilang gidrowing nga mga litrato. Ipasabut nga ang hagdanan nagrepresentar sa usa ka paagi alang kang Jacob aron makabalik sa Dios. Unsa ang gihatag sa Dios aron matabangan kitang makabalik Kaniya? (tan-awa kini nga pahina sa kalihokan karong semanaha). Pahinumdumi ang mga bata sa ilang pakigsaad sa bunyag. Sa unsang paagi nga ang pagsunod niini nga pakigsaad makapaduol kanato sa Dios?

• Pagpakita og litrato sa templo, ug pagsulat diha sa pisara og mahinungdanong mga pulong gikan sa Genesis 28:15–17, sama sa: “Ako magauban kanimo,” “Ang Ginoo ania niining dapita,” “Ang balay sa Dios,” o “Ang ganghaan sa langit.” Dapita ang mga bata sa pagpangita niining hugpong sa mga pulong. Sultihi ang mga bata mahitungod kon sa unsang paagi ang templo ug ang mga pakigsaad sa templo makatabang nimo nga mobati nga duol sa Ginoo.

Genesis 29:16–30

Nagtuo ako sa pagkamatinuoron.

Si Jacob mituman sa iyang saad nga moserbisyo kang Laban sulod sa pito ka tuig, apan giilad siya ni Laban. Unsaon nimo sa paggamit kini nga istorya aron matabangan ang mga bata nga makasabut sa kaimportante sa pagkamatinuoron bisan kon ang uban dili matinuoron?

Posible nga mga Kalihokan

• Magdungan sa pagbasa sa Genesis 29:16–30, ug tabangi ang mga bata sa pag-summarize sa mga hitabo niini nga mga bersikulo. Unsay reaksyon ni Jacob nga giilad? Unsay atong makat-unan gikan niini nga istorya?

• Diha sa pisara isulat ang Unsay mahitabo kon kita dili matinuoron? ug Unsay mahitabo ko kita matinuoron? Dapita ang mga bata sa pagpangita og mga tubag pinaagi sa pagbasa sa “Pagkamatinuoron ug Kaligdong” (diha sa Alang sa Kalig-on sa mga Kabatan-onan [2011], 19).

Genesis 32:6–11; 33:1–4

Ang Langitnong Amahan ug si Jesukristo makatabang nako sa paghigugma sa akong pamilya.

Si Esau nasuko kang Jacob, ug si Jacob nahadlok nga makigkita kang Esau pag-usab, bisan sa 20 ka tuig na nga panaglagyo. Apan si Jacob nag-ampo og tabang, ug si Esau nakahimo sa pagbuntog sa iyang kasuko. Unsaon nimo sa paggamit kini nga istorya sa pagtudlo sa mga bata sa kaimportante sa paghigugma sa atong mga pamilya?

Posible nga mga Kalihokan

• Pangutan-a ang mga bata unsay ilang nahinumduman bahin sa relasyon tali ni Jacob ug Esau (tan-awa sa Genesis 27:41 o “Jacob ug Esau,” diha sa Mga Istorya sa Daang Tugon). Ipasabut nga human nagkalagyo sulod sa mga 20 ka tuig, si Jacob nakighimamat ni Esau pag-usab. Magdungan sa pagbasa sa Genesis 32:6–11. Unsay gibati ni Jacob? Unsay iyang gihimo aron makakuha og tabang? Ipamatuod nga kita makapangayo og tabang sa Langitnong Amahan kon magkalisud ang atong relasyon sa pamilya. Magdungan sa pagbasa sa Genesis 33:1–4 aron madiskubre giunsa pagtubag sa Ginoo ang pag-ampo ni Jacob.

• Pagpaambit og personal nga kasinatian o usa ka istorya gikan sa magasin sa Simbahan mahitungod kon unsaon sa pagpakita og mas dakong gugma sa atong mga pamilya. Dapita ang mga bata sa pagpaambit usab sa ilang mga kasinatian. Unsay atong mabuhat kon usa ka sakop sa pamilya masuko kanato? Sa pagkat-on bahin sa unsay gitudlo sa Manluluwas nga atong buhaton, tan-awa sa Mateo 5:43–45.

Awhaga ang Pagkat-on diha sa Panimalay

Dapita ang mga bata sa pagpaambit niini nga pahina sa kalihokan karong semanaha uban sa ilang mga pamilya sa pagtabang kanila aron makakat-on ug mahinumdom sa damgo ni Jacob.

Pagpalambo sa Atong Pagtudlo

Mogamit og mga litrato sa pagtabang sa mga bata nga makasabut sa mga istorya sa kasulatan. Ang mga bata sa kasagaran mas makakat-on kon sila makatan-aw sa mga litrato bahin sa mga istorya sa kasulatan o mga pagtulun-an. Sama pananglit, mahimo kang mopakita og litrato gikan sa outline karong semanaha diha sa Dali, Sunod Kanako—Alang sa mga Indibidwal ug mga Pamilya.