“Jacob ug Esau,” Mga Istorya sa Daang Tugon (2022)
“Jacob ug Esau,” Mga Istorya sa Daang Tugon
Genesis 25–27
Jacob ug Esau
Duha ka managsoong lalaki ug usa ka katungod sa pagkapanganay
Si Isaac ug si Rebeca may kaluhang mga batang lalaki, si Jacob ug si Esau. Si Esau usa ka hanas nga mangangayam. Si Jacob mipuyo og usa ka yanong kinabuhi ug misunod sa Ginoo.
Si Esau natawo og una. Ang unang natawo sa kasagaran makadawat sa panalangin sa katungod sa pagkapanganay gikan sa iyang amahan. Ang katungod sa pagkapanganay mipasabut nga siya mangulo sa pamilya ug makapanag-iya og mas daghang yuta ug mga hayop aron sa pagtabang og amuma sa pamilya. Apan si Esau mas nag-amuma sa iyang kaugalingon kay sa iyang pamilya, ug masinupakon siya sa iyang mga ginikanan ug sa Ginoo.
Usa ka adlaw niana mibalik si Esau gikan sa pagpangayam. Gutom kaayo siya ug nagpakilooy ni Jacob sa pagpakaon kaniya. Ang Ginoo gusto ni Jacob nga makaangkon sa katungod sa pagkapanganay tungod kay si Esau dili takus niini. Gihangyo ni Jacob si Esau nga ibaylo kaniya ang katungod sa pagkapanganay alang sa pipila ka pagkaon. Miuyon si Esau ug iyang gibaylo ang iyang katungod sa pagkapanganay ngadto ni Jacob.
Genesis 25:23, 29–34; Mga Hebreohanon 11:20
Gusto ni Rebeca ug Isaac ang unsay labing maayo alang sa ilang mga anak. Naguol sila nga si Esau mipadayon sa pagbuhat og mga butang nga iyang gusto ug dili ang unsay gusto sa Ginoo.
Si Isaac nahimong tigulang ug nabuta. Sa wala pa siya mamatay, gisugo niya si Esau sa pagpangayam ug sa pagluto og hayop nga iyang kan-on ug tagamtamon.
Si Rebeca nahibalo nga panahon na kadto alang ni Isaac sa paghatag sa panalangin sa katungod sa pagkapanganay.
Gisugo ni Rebeca si Jacob sa pagkuha og duha ka mga hayop aron iyang lutuon ang pagkaon sa dili pa moabut si Esau. Niana madawat ni Jacob ang panalangin.
Si Jacob nagtakuban nga sama ni Esau ug gidala ang pagkaon ngadto sa iyang amahan. Gihatag ni Isaac kang Jacob ang panalangin sa katungod sa pagkapanganay. Sa dihang mibalik si Esau, hilabihan ang iyang kasuko ni Jacob. Apan ang katungod sa pagkapanganay naadto ni Jacob tungod kay siya misunod sa mga sugo sa Ginoo ug si Esau wala.