“Hari David,” Mga Istorya sa Daang Tugon (2022)
“Hari David,” Mga Istorya sa Daang Tugon
1 Samuel 18–19; 31; 2 Samuel 1; 5; 11–12
Hari David
Ang mga paningkamot sa usa ka hari
Si Hari Saul, ang hari sa Israel, midayeg sa kadaugan ni David batok ni Goliath. Gihimo ni Saul si David nga pangulo sa iyang mga kasundalohan.
Si David nahigugma sa Ginoo ug kanunay nga gustong mobuhat unsay matarung. Ang mga katawhan sa Israel nahigugma ni David.
Si Saul nahimong nasina ug naninguha sa pagpatay ni David. Apan si David misunod sa Ginoo, ug ang Ginoo mipanalipod kaniya gikan ni Saul.
Nakig-away ang mga Israelihanon og daghang mga gubat. Usa ka adlaw niana si Saul ug ang iyang anak nga mga lalaki namatay sa gubat. Nahigugma si David kanila ug nagsubo pag-ayo nga nakadungog sa ilang mga kamatayon. Karon ang mga Israelihanon nagkinahanglan og usa ka bag-ong hari. Gipili sa Ginoo si David nga mahimong hari. Malipayon kaayo ang mga katawhan.
1 Samuel 31:2–6; 2 Samuel 1:11–12; 5:1–5
Gipanalanginan sa Ginoo si Hari David ug gigiyahan siya. Uban sa panabang sa Ginoo, ang kasundalohan ni David mibuntog sa ilang mga kaaway.
Usa ka adlaw niana sa dihang si David gikinahanglan nga moadto sa gubat, mipabilin siya sa panimalay. Nakakita siya og usa ka maanyag nga babaye. Ang iyang ngalan mao si Bath-sheba, ug si David gustong mangasawa kaniya. Apan minyo na siya ngadto ni Uria, usa ka sundalo sa kasundalohan ni David.
Gusto ni David nga mangasawa ni Bath-sheba, busa gipadala niya ang iyang bana nga si Uria ngadto sa usa ka makuyaw nga gubat aron nga si Uria mamatay.
Wala madugay nadungog ni David nga si Uria namatay sa gubat. Gisugo ni David ang iyang mga sulugoon sa pagdala ni Bath-sheba ngadto sa iyang panimalay, ug gipangasawa siya.
Apan ang Ginoo wala malipay sa unsay nabuhat ni David. Gipadala sa Ginoo si Nathan, usa ka propeta, sa pagsulti ni David unsa ka bug-at ang iyang sala. Nahimong nagsubo og maayo si David tungod sa unsay iyang nabuhat ngadto ni Uria ug Bath-sheba. Nag-ampo siya ug nagpuasa alang sa kapasayloan gikan sa Ginoo.