“Jacob ug ang IyangPamilya,” Mga Istorya sa Daang Tugon (2022)
“Jacob ug ang Iyang Pamlya,” Mga Istorya sa Daang Tugon
Genesis 27–33
Jacob ug ang Iyang Pamilya
Sa unsa nga paagi nagtuman ang Ginoo sa Iyang mga saad
Mibiya si Jacob sa iyang panimalay sa pag-eskapo sa iyang nasuko nga igsoong lalaki nga si Esau. Gipanalanginan si Jacob sa iyang amahan nga makakita ug maminyo sa usa ka babaye kinsa nahigugma sa Ginoo ug nagsunod sa iyang mga sugo.
Samtang si Jacob mibiyahe, ang Ginoo mibisita kaniya sa usa ka panan-awon. Misaad Siya nga sa kanunay magauban ni Jacob. Misaad si Jacob sa paghatag sa Ginoo og ikanapulo sa tanan nga iyang madawat.
Ang Ginoo misaad ni Jacob nga siya makabaton og daghang mga anak. Pinaagi sa mga anak ni Jacob, ang mga pamilya sa yuta mapanalanginan nga makaila sa Manluluwas. Ang pamilya ni Jacob sa ulahing mga adlaw tawgon og ang balay ni Israel.
Genesis 28:3–4, 14; 1 Nephi 10:14
Mibiyahe si Jacob ngadto sa usa ka yuta nga gitawag og Haran. Didto nahigugma siya sa usa ka matarung nga babaye nga gihinganlan og Raquel.
Miuyon si Jacob sa pagtrabaho og pito ka tuig alang sa iyang amahan [ni Raquel], si Laban, kon si Laban motugot kaniya sa pakigminyo ni Raquel. Miuyon si Laban. Mitrabaho si Jacob sulod sa pito ka mga tuig.
Apan gusto ni Laban nga si Lea, ang iyang kamagulangang anak nga babaye, ang maminyo og una. Sa panahon sa kasal, gilingla ni Laban si Jacob ug naminyo hinoon ni Lea. Apan si Jacob nahigugma ni Raquel. Misaad siya sa pagtrabaho og laing pito ka mga tuig kon siya makaminyo usab kaniya. Miuyon si Laban, ug ang pamilya ni Jacob misugod sa pagdaghan.
Genesis 29:28–35; 30:3–13, 17–24; Jacob 2:27–30
Wala mobayad si Laban ni Jacob sa makiangayon nga paagi. Apan ang Ginoo mipanalangin ni Jacob og daghang mga hayop ug misugo ni Jacob sa pagpauli sa ilang panimalay.
Genesis 30:31, 43; 31:1–7, 17–18
Sa iyang pagpadulong sa panimalay, nahibaloan ni Jacob nga ang iyang igsoong lalaki nga si Esau ug 400 ka mga lalaki nagsingabut sa pagsugat kaniya.
Gipakaingon ni Jacob nga si Esau tingali nasuko pa kaniya. Nahadlok si Jacob sa kahilwasan sa iyang pamilya, busa iyang gidala sila ngadto sa usa ka luwas nga dapit ug nag-ampo.
Nag-ampo si Jacob sa tibuok gabii ug hangtud sa buntag. Giduaw sa Ginoo si Jacob ug gipanalanginan siya. Ang Ginoo misulti ni Jacob nga siya mahimong usa ka halangdon nga lider ngadto sa daghan. Giilisan sa Ginoo ang ngalan ni Jacob ngadto sa Israel.
Wala madugay nakaplagan ni Esau ug sa iyang mga tawo si Jacob ug ang iyang pamilya. Si Esau wala na masuko ni Jacob. Midagan siya sa pagsugat ni Jacob ug migakos kaniya. Hilabihan ang iyang kalipay sa pagkakita kaniya ug gihimamat ang iyang pamilya. Nalipay usab si Jacob sa pagkakita ni Esau pag-usab.
Gituman sa Ginoo ang Iyang mga saad ngadto ni Jacob sa tibuok niyang kinabuhi. Miabut si Jacob sa panimalay uban sa iyang pamilya ug nanimuyo didto. Gikan niana, si Jacob gitawag og Israel, ug ang iyang pamilya gitawag og mga Israelihanon. Gipadayon niya ang pagsunod sa mga sugo ug gisimba ang Ginoo.