Paghulagway kang Jose sa Ehipto nga nabilanggo, ni Jeff Ward

Marso 7–13

Genesis 37–41

“Ang Ginoo Diha Nag-uban kang Jose”

Unsa nga mga kamatuoran gikan sa Genesis 37–41 ang gikinahanglang mas masabtan pa sa mga bata diha sa imong klase? Hatagi og pagtagad ang mga pag-aghat nga moabut kanimo samtang mangandam ka sa pagtudlo.

Irekord ang Imong mga Impresyon

Dapita ang Pagpaambit

Hatagi ang mga bata og pipila ka minuto sa pagdrowing og butang nga ilang nakat-unan mahitungod sa ebanghelyo diha sa panimalay o sa simbahan. Hangyoa ang mga bata sa pagpaambit ug paghisgot mahitungod sa ilang mga gidrowing.

Itudlo ang Doktrina: Mas Gagmay nga mga Bata

Genesis 37

Pwede akong magmabination sa akong pamilya.

Ang mga igsoong lalaki ni Jose nasina kaniya ug dili maayo ang pagtratar kaniya. Unsaon nimo sa pagtabang ang mga bata nga makasabut sa kaimportante sa pagkamabination ngadto sa uban, ilabi na sa mga sakop sa pamilya?

Posible nga mga Kalihokan

• Alang sa pagsugilon sa istorya ni Joseph ug sa iyang mga igsoong lalaki gikan sa Genesis 37, mahimo nimong gamiton ang mga litrato nga naa sa Dali, Sunod Kanako—Alang sa mga Indibidwal ug mga Pamilya o ang “Si Joseph sa Ehipto” (diha sa Mga Istorya sa Daang Tugon). Patabanga ang mga bata pinaagi sa pagpaambit og mga detalye nga ilang nahibaloan mahitungod sa istorya. Pangutan-a sila og sama sa mosunod, “Sa unsang paagi ang mga igsoong lalaki ni Jose wala magmabination kaniya?” Tabangi ang mga bata sa paghunahuna og mga butang nga pwede ra untang buhaton sa mga managsoong lalaki alang sa pagpakita og gugma kang Jose. Unsay angay natong buhaton kon mobati kita og kasuko ngadto sa mga sakop sa atong pamilya?

• Pagpakita og usa ka litrato sa usa ka pamilya (tan-awa sa Libro sa mga Hulagway sa Ebanghelyo, nu. 112), o dapita ang mga bata sa pagdrowing og mga litrato sa ilang mga pamilya. Hangyoa sila sa pagpaambit og mga paagi nga mahimo silang magmabination sa mga sakop sa ilang pamilya.

• Kantaha og dungan ang usa ka awit mahitungod sa paghigugma sa atong mga pamilya, sama sa “Malipayon ang Pamilya” (Songbook sa mga Bata,104). Unsay atong mabuhat sa pagtabang sa atong mga pamilya nga magmalipayon?

• Pakolori sa mga bata kini nga pahina sa kalihokan karong semanaha ug, diha sa dapit nga gihatag, pagdrowing og litrato sa mga sakop sa pamilya nga nagmabination.

Genesis 37:18–28; 39:20–23

Ang Dios makatabang kanako kon ang dautang mga butang mahitabo.

Daghang dautan nga mga butang nahitabo kang Jose, apan mipili siya sa pagtuman sa mga sugo ug ang Ginoo diha nag-uban kaniya. Ang gagmay nga mga bata makakat-on gikan niini nga ang Dios gustong motabang kanila atol niining malisud nga mga panahon sa ilang kinabuhi.

Posible nga mga Kalihokan

• Ihulagway ang pipila ka lisud nga mga butang nga nahitabo kang Jose (tan-awa sa Genesis 37:23–28; 39:20; o sa “Joseph” ug sa “Joseph sa Ehipto,” diha sa Mga Istorya sa Daang Tugon). Human imong masugilon sa mga bata ang mahitungod sa tanang kalisdanan nga giatubang ni Jose, dapita sila sa pagsubli sa, “Ang Ginoo diha Nag-uban kang Jose” (Genesis 39:2).

• Pagpakigbahin og mga litrato sa Manluluwas nga nagtabang og mga tawo nga nag-atubang og mga hagit (tan-awa sa Libro sa mga Hulagway sa Ebanghelyo, mga nu. 40–43). Dapita ang mga bata sa pagpaambit sa unsang paagi ang Manluluwas nagtabang sa katawhan. Ipaambit ang imong pagpamatuod nga ang Ginoo makatabang kanato kon ang dautang mga butang mahitabo kanato.

• Kantaha ang usa ka awit mahitungod sa mapinanggaong pag-amuma sa Manluluwas kanato, sama sa “Si Jesus Ang Atong Mahigugmaong Higala” (Songbook sa mga Bata, 37). Pagpaambit og usa ka kasinatian dihang ikaw mibati sa gugma sa Dios atol sa mahagiton nga mga panahon. Pagpakita og litrato ni Jesus, ug dapita ang mga bata sa pagpaambit unsay ilang gibati mahitungod Kaniya.

Genesis 41:15–36, 47–57

Ang Dios makapasidaan kanako sa peligro.

Ang Dios mitabang nga si Jose makasabut nga ang mga damgo ni Paraon nagpasidaan sa pagpangandam alang sa mga lisud nga panahon nga moabut. Tabangi ang mga bata nga makasabut nga ang Dios makapasidaan kanila sa peligro, lakip sa espiritwal nga peligro.

Si Jose nga Naghubad sa mga Damgo sa Magbalantay sa Bino ug sa Magbubuhat sa Tinapay, ni François Gérard

Posible nga mga Kalihokan

• Pagkatag og mga litrato sa pagkaon libut sa kwarto, ug dapita ang mga bata sa pagpundok niini ug “pagsulod” niini sa usa ka sudlanan. Gamita kini nga kalihokan sa pagsugilon sa mga bata mahitungod kon sa unsang paagi ang Dios mipasidaan ni Paraon sa pagpangandam sa pag-abut sa panahon nga wala nay pagkaon (tan-awa sa Genesis 41:15–36, 47–57). Padrowinga ang mga bata og mga butang nga gidamgo ni Paraon ug dayon gamita ang ilang mga gidrowing nga litrato sa pagtudlo sa ilang mga pamilya diha sa panimalay.

• Pagpakita og litrato sa kasamtangan nga propeta. Sultihi ang mga bata mahitungod sa mga pagtulun-an o mga pasidaan nga gihatag sa Dios kanato pinaagi kaniya. Ipasabut nga kita mapanalanginan ug maprotektahan kon kita mosunod sa propeta. Dapita ang mga bata sa pagdrama-drama sa mga butang nga ilang mahimo sa pagsunod sa tambag sa propeta.

Itudlo ang Doktrina: Mas Dagko nga mga Bata

Genesis 39:1–3, 20–23; 41:38

Kon ako magmatinuoron, ang Dios motabang kanako atol sa lisud nga mga panahon.

Bisan og si Jose dunay lisud nga mga pagsulay, nagpabilin siyang matinud-anon ug “ang Ginoo diha nag-uban kaniya” (Genesis 39:3). Ang iyang mga kasinatian makatabang sa mga bata aron mobati og pagsalig nga ang Dios motabang nila atol sa mga pagsulay.

Posible nga mga Kalihokan

• Hangyoa ang mga bata sa pagpangita og mga pulong o hugpong sa mga pulong diha sa Genesis 39:1–3, 20–23; 41:38 nga nagpakita nga ang Dios diha nag-uban ni Jose atol sa iyang lisud nga mga panahon. Kon mahimo, dapita ang mga bata sa pagbuhat og gamayng sinyas [sign] nga magpakita [displaying] sa usa sa hugpong sa mga pulong nga ilang nakit-an. Awhaga sila sa pagdala sa gibuhat nilang mga sinyas ngadto sa ilang panimalay aron mapahinumduman sila nga ang Ginoo mag-uban kanila atol sa ilang mga pagsulay.

• Dapita ang mga bata sa pagpaambit kon unsa kaha sa ilang hunahuna ang buot ipasabut sa mga pulong nga “ang Ginoo diha nag-uban ni Jose” (Genesis 39:2). Dapita sila sa pagpaambit og mga kasinatian dihang mibati sila nga ang Ginoo diha nag-uban kanila o sa ilang pamilya atol sa lisud nga panahon. Pagpaambit og susama nga mga kasinatian gikan sa imong kinabuhi.

Genesis 37:3–28

Malipay ako kon ang maayong mga butang mahitabo sa uban.

Ang kasina naghatud sa mga igsoong lalaki ni Jose sa paghimo og dili maayong mga pagpili. Ang ilang sayop nga mga pagpili misakit ni Jose ug nakapaguol sa ilang amahan. Kini nga istorya makatabang sa mga bata sa pagpili nga magmalipayon kon ang uban mapanalanginan sa Ginoo.

Posible nga mga Kalihokan

• Dapita ang mga bata sa pagribyu sa Genesis 37:3–11 ug sa pagdrowing og mga litrato sa kupo ni Jose ug sa duha niya ka damgo. Unsay gibati sa igsoong mga lalaki ni Jose mahitungod ni Jose? Sa unsang paagi kaha unta sila misanong sa lahi nga paagi? Hisguti nganong importante nga magmalipayon kon ang maayong mga butang mahitabo sa ubang mga tawo.

• Hangyoa ang mga bata sa pagpaambit og pipila ka sitwasyon diin ang usa ka tawo tingali masina sa uban. Kantaha og dungan ang awit mahitungod sa pagpakita og gugma sa uban, sama sa “Maghigugmaay” (Songbook sa mga Bata, 74). Ipasabut pag-ayo nga ang Langitnong Amahan makatabang kanato nga mahulipan ang mga pagbati sa kasina ngadto sa mga pagbati sa gugma.

Genesis 39:7–12

Uban sa tabang sa Ginoo, ako makapalayo sa tintasyon.

Kon ang mga bata nga imong gitudloan nag-atubang og mga tintasyon sa tibuok nilang kinabuhi, makaangkon sila og kalig-on gikan sa ehemplo ni Jose nga nagpalayo sa tintasyon.

Posible nga mga Kalihokan

• Pagpakita og litrato ni Jose ug sa asawa ni Potiphar (tan-awa sa Libro sa mga Hulagway sa Ebanghelyo, nu. 11), ug ipaambit ang istorya diha sa Genesis 39:7–12. Giunsa ni Jose sa pagbatok ang tintasyon? Tabangi ang mga bata sa pagpangita og mga pulong diha sa Genesis 39:7–12 nga motubag niini nga pangutana—sama pananglit, nahibalo si Jose nga ang pagpakig-uban sa asawa ni Potiphar usa ka “sala batok sa Dios” (bersikulo 9).

• Dapita ang mga bata sa paghunahuna og mga sitwasyon diin ang mga bata nga ilang kaedad tingali tintalon sa paghimo og sayop nga mga pagpili. Hangyoa sila sa pagdrama-drama kon unsaon nila sa pagsunod ang ehemplo ni Jose niini nga mga sitwasyon—sama pananglit, unsa ang ubang mga paagi nga kita mahinumdom sa Dios kon kita tintalon?

• Pagpakita og duha ka magnet, nga nagrepresentar sa Dios ug ni Satanas, ug usa ka gamayng puthaw sama sa kimpit sa papel [paper clip], nga nagrepresentar kanato. Gamita ang mga magnet sa paghulagway nga kon kita mas duol sa Dios, mas magkalig-on ang Iyang impluwensya kanato, ug mao usab kon magpaduol ni Satanas. Unsay atong mabuhat aron maduol sa Dios? Sa unsang paagi makatabang ang Espiritu Santo kanato?

Awhaga ang Pagkat-on diha sa Panimalay

Dapita ang mga bata sa pagpaambit og mga paagi sa pagkompleto sa mosunod nga kapahayag [sentence]: “Ako mamahimong sama kang Jose pinaagi sa .” Hangyoa sila sa pagpaambit uban sa ilang mga pamilya kon giunsa nila sa pagkompleto ang kapayahag.

Pagpalambo sa Atong Pagtudlo

Dapita ang pagpaambit. Samtang maghisgot ka og mga baruganan sa ebanghelyo, hangyoa ang mga bata sa pagpaambit sa ilang mga hunahuna, mga pagbati, ug mga kasinatian. Imong makita nga daghan sila og makahuluganong mga panabut.