Paghulagway ni Jose sa Ehipto sulod sa bilanggoan, ni Jeff Ward

Marso 7–13

Genesis 37–41

“Ang Ginoo Diha Nag-uban kang Jose”

Samtang ikaw nagbasa sa Genesis 37–41, pag-ampo nga ang Espiritu Santo motabang kanimo nga makahibalo kon giunsa sa mga tudling sa kasulatan pakiglabut nganha sa imong kinabuhi. Irekord ang bisan unsang mga panabut nga imong madawat.

Irekord ang Imong mga Impresyon

Usahay ang dili maayong mga butang mahitabo sa maayong mga tawo. Ang kinabuhi tataw nga nagtudlo kanato niana nga leksyon, ug ingon man ang kinabuhi ni Jose, ang anak nga lalaki ni Jacob. Manununod siya ngadto sa pakigsaad nga gihimo sa Dios uban sa iyang mga amahan, apan siya gikasilagan sa iyang igsoong mga lalaki ug gibaligya ngadto sa pagkaulipon. Midumili siya sa pagbutang sa iyang katarung sa makuyaw sa dihang miduol kaniya ang asawa ni Potiphar ug mao nga gibalhug sa bilanggoan. Kini ingon og kon mas magmatinud-anon siya, mas daghang mga kalisud ang iyang atubangon. Apan tanan niini nga kasakit dili timaan nga wala mouyon ang Dios. Sa tinuod, ngadto sa tanan niini, “ang Ginoo diha nag-uban kaniya.” (Genesis 39:3). Ang kinabuhi ni Jose usa ka pagpakita niining importanting kamatuoran: Ang Dios dili mobiya kanato. “Ang pagsunod sa Manluluwas dili makakuha sa tanan ninyong mga pagsulay,” mitudlo si Presidente Dieter F. Uchtdorf. “Hinoon, mokuha kini sa mga babag tali kaninyo ug sa tabang nga gustong ihatag sa inyong Langitnong Amahan. Ang Dios magauban kaninyo” (“Tinguha alang sa Panimalay,” Liahona, Nov. 2017, 22).

Mga Ideya alang sa Personal nga Pagtuon sa Kasulatan

Genesis 37:1–28; 39; 41:9–45

“Ang Ginoo diha nag-uban ni Jose” sa iyang kasakit.

Matag karon ug unya, ang maayong kapalaran ingon og mibiya ni Jose, apan ang Ginoo wala gayud. Samtang ikaw nagbasa sa istorya ni Jose, pamalandong og mga pangutana sama niini: Unsa ang gibuhat ni Jose sa pagpabilin nga duol sa Ginoo sa mga panahon sa iyang mga pagsulay? Sa unsa nga paagi ang Ginoo “nag-uban kaniya”? (Genesis 39:2–3, 21, 23).

Mahimo ka usab nga mangutana og susama nga mga pangutana mahitungod sa imong kinabuhi. Unsa nga ebidensya ang imong nakita nga ang Ginoo wala mobiya kanimo sa imong mga panahon sa pagsulay? Hunahunaa kon unsaon nimo pagpakigbahin ang imong mga kasinatian ngadto sa mga sakop sa imong pamilya ug sa umaabut nga mga henerasyon (tan-awa sa 1 Nephi 5:14). Unsa ang imong mahimo karon sa pag-andam sa imong kaugalingon nga magpabiling matinud-anon kon ikaw mag-atubang og mga pagsulay sa umaabut?

Tan-awa usab sa Juan 14:18; Mga Taga-Roma 8:28; Alma 36:3; Doktrina ug mga Pakigsaad 121:7–8; D. Todd Christofferson, “Ang Hingpit nga Kalipay sa mga Santos,” Liahona, Nob. 2019, 15–18.

Genesis 37:5–11; 40; 41:1–38

Kon ako matinud-anon, ang Ginoo mogiya ug modasig kanako.

Gitudlo ni Elder David A. Bednar, “Ang mga pagpadayag gihatag sa nagkalain-laing paagi, lakip, sama pananglit, sa mga damgo, mga panan-awon, pakigsinultihanay uban sa langitnong mga mensahero, ug inspirasyon” (“Ang Espiritu sa Pagpadayag,” Liahona, Mayo 2011, 88). Migamit ang Ginoo og mga damgo sa pagpadayag og mga kamatuoran ngadto ni Jose, kang Paraon nga magbalantay sa vino ug magbubuhat sa tinapay, ug ni Paraon. Mipadayag usab ang Ginoo ngadto ni Jose kon unsaon sa paghubad niini nga mga damgo. Unsa ang imong makat-unan gikan sa Genesis 37:5–11; 40:5–8; 41:14–25, 37–38 mahitungod sa pagdawat ug pagsabut sa pagpadayag gikan sa Ginoo? Sama pananglit, unsa ang imong nakat-unan gikan sa ehemplo ni Jose sa dihang ang pagpadayag ingon og malisud nga sabton? (tan-awa sa Genesis 40:8; 41:16).

Joseph Interpreting the Butler and Baker’s Dreams [Jose Naghubad sa mga Damgo sa Magbalantay sa Vino ug Magbubuhat sa Tinapay], ni François Gérard

Pamalandunga giunsa sa Ginoo pagpadayag sa Iyang kabubut-on nganha kanimo. Unsa ang imong gibuhat sa paglihok sa pagpadayag nga gihatag sa Ginoo kanimo? Giunsa nimo pagpangayo og dugang nga paggiya gikan Kaniya?

Tan-awa usab sa Russell M. Nelson, “Pagpadayag alang sa Simbahan, Pagpadayag alang sa atong mga Kinabuhi,” Liahona, Mayo 2018, 93–96; Michelle Craig, “Espirituhanong Kapasidad,” Liahona, Nob. 2019, 19–21.

Genesis 38; 39:7–20

Uban sa tabang sa Ginoo, ako makalayas sa tintasyon.

Kon ikaw pagatintalon, ang ehemplo ni Jose makahatag kanimo og pag-awhag ug kalig-on. Samtang ikaw nagbasa mahitungod sa iyang kasinatian sa Genesis 39, tan-awa ang mga butang nga gihimo ni Jose sa pagbuntog sa tintasyon. Sama pananglit:

• Siya “nagdumili” sa mga pagdani sa asawa ni Potiphar (bersikulo 8).

• Iyang naila nga ang pagpakasala makapasuko sa Dios ug sa uban (mga bersikulo 8–9).

• Siya “wala magpatalinghug” ngadto sa tintasyon, bisan tuod kini mipadayon “adlaw-adlaw” (bersikulo 10).

• Iyang “gibiyaan ang iyang bisti … ug mikalagiw, ug migula ngadto sa gawas” (bersikulo 12).

Maghinumdom sa ehemplo ni Jose, paghunahuna sa paghimo og plano alang sa paglikay ug pagsugakod sa tintasyon. Sama pananglit, makahimo ka sa paghunahuna og usa ka tintasyon nga imong giatubang, pagsulat og mga sitwasyon sa paglikay, ug paghimo og plano sa pagsalig diha sa Langitnong Amahan kon ang tintasyon moabut (tan-awa sa 2 Nephi 4:18, 27–33).

Tintasyon:

Mga sitwasyon nga likayan:

Plano sa pag-atubang:

Kini nga asoy sa kalig-on ni Jose kon nag-atubang og tintasyon giunhan sa lahi kaayo nga asoy mahitungod sa iyang magulang nga igsoong lalaki si Juda, nga makaplagan sa Genesis 38. Unsa ang mga kapitulo 37, 38, ug 39, kon ipunon, nagtudlo kanimo mahitungod sa kaputli?

Tan-awa usab sa 1 Mga Taga-Corinto 10:13; 1 Nephi 15:23–24; 3 Nephi 18:17–18.

Mga Ideya alang sa Pamilya nga Pagtuon sa Kasulatan ug Family Home Evening

Genesis 37.Kon ikaw nahimong usa sa igsoong mga lalaki ni Jose, unsa kaha ang imong mahimo sa pagpugong sa kasina nga mohuyang sa imong relasyon ngadto kaniya? Unsaon niini pagtabang kanato sa “pagsulti nga makigdaiton” ngadto sa usag usa? (bersikulo 4).

Genesis 39. Makakanta ka og dungan sa “Maninguha Kong Mahimong Mahisama Kang Jesus” (Songbook sa mga Bata, 40–41) ug pangita og tambag nga ikapakigbahin sa imong pamilya ngadto ni Jose samtang siya nagsinati sa iyang mga pagsulay.

Genesis 39:7–12.Ang pagbasa niini nga mga bersikulo makahatag og oportunidad sa paghisgot sa balaod sa kaputli uban sa imong pamilya. Ania ang pipila ka mga kapanguhaan nga makatabang niini nga panaghisgutan: Jacob 2:28; Alma 39:3–9; “Sekswal nga Kaputli” (sa Alang sa Kalig-on sa mga Kabatan-onan [2011], 35–37).

Genesis 41:15–57.Unsa ang atong makat-unan gikan niini nga mga bersikulo mahitungod kon sa unsa nga paagi gipanalanginan sa Ginoo ang mga katawhan sa Ehipto pinaagi ni Jose? Unsa ang atong makat-unan mahitungod sa pagpangandam alang sa umaabut nga kalit nga mga hitabo? Paghisgot kon unsa ang inyong buhaton nga mahimong mas maayong makapangandam isip usa ka pamilya. Alang sa mga ideya, tan-awa ang Gospel Topics, “Emergency Preparedness [Pagpangandam alang sa Emerhensiya],” topics.ChurchofJesusChrist.org.

Alang sa dugang nga mga ideya sa pagtudlo sa mga bata, tan-awa sa latid [outline] karong semanaha sa Dali, Sunod Kanako—Alang sa Primary.

Gisugyot nga awit: “Si Jesus ang Atong Mahigugmaong Higala,” Songbook sa mga Bata, 37.

Pagpalambo sa Personal nga Pagtuon

Ipahisama ang mga kasulatan sa imong kinabuhi. Samtang ikaw nagbasa, hunahunaa kon sa unsa nga paagi ang mga istorya ug mga pagtulun-an sa mga kasulatan magamit sa imong kinabuhi. Sama pananglit, unsaon sa pagkamatinud-anon ni Jose pagdasig kanimo nga magpabiling matinud-anon ngadto sa Ginoo bisan pa sa kasakit?

Paghulagway sa igsoong mga lalaki ni Jose nga mikuha sa iyang kupo, ni Sam Lawlor