“Marso 21–27. Exodo 1–6: ‘Nahinumduman Ko ang Akong Pakigsaad [Tugon],’” Dali, Sunod Kanako—Alang sa mga Indibidwal ug mga Pamilya: Daang Tugon 2022 (2021)

“Marso 21–27. Exodo 1–6,” Dali, Sunod Kanako—Alang sa mga Indibidwal ug mga Pamilya: 2022

Imahe

Moises ug ang nagsiga nga sapinit

Moses and the Burning Bush [Moises ug ang Nagsiga nga Sapinit], ni Harry Anderson

Marso 21–27

Exodo 1–6

“Nahinumduman Ko ang Akong Pakigsaad”

Sugdi ang imong pagtuon uban sa usa ka pag-ampo, ug paghangyo alang sa tabang nga makakaplag og mga mensahe sa Exodo 1–6 nga kalabut nganha sa imong kinabuhi ug sa imong serbisyo sa gingharian sa Dios.

Irekord ang Imong mga Impresyon

Ang pagdapit nga mopuyo sa Ehipto sa tinuod miluwas sa pamilya ni Jacob. Apan human sa mga gatusan ka mga tuig, ang ilang mga kaliwat giulipon ug gihadlok sa bag-ong paraon “nga wala makaila ni Jose” (Exodo 1:8). Kini natural lang unta sa mga Israelite nga matingala kon ngano nga ang Dios mitugot niini nga mahitabo ngadto kanila, ang Iyang mga katawhan sa pakigsaad. Nakahinumdom ba Siya sa pakigsaad nga Siya mihimo uban kanila? Sila ba mga katawhan pa Niya gihapon? Nakakita ba Siya kon unsa sila ka nag-antus?

Tingali dihay mga panahon nga ikaw mibati nga gustong mangutana og susama nga mga pangutana. Mahimong ikaw matingala, Ang Dios ba nahibalo kon unsa ang akong gisinati? Makadungog ba Siya sa akong mga pangamuyo alang sa panabang? Ang istorya sa Exodo kabahin sa pagkaluwas sa Israel gikan sa Ehipto tataw nga nagtubag sa maong mga pangutana: Ang Dios dili makalimot sa Iyang mga katawhan. Siya naghinumdom sa Iyang mga pakigsaad uban kanato ug motuman niini sa Iyang kaugalingon nga higayon ug paagi (tan-awa sa Doktrina ug mga Pakigsaad 88:68). “Pagatubson ko kamo uban sa bukton nga tinuy-od,” Siya nagpahayag. “Ako ang Ginoo [Jehova] nga inyong Dios, nga nagapagula kaninyo gikan sa ilalum sa [inyong] mabug-at nga lulan” (Exodo 6:6–7).

Alang sa kinatibuk-ang pagsabut sa basahon sa Exodo, tan-awa ang “Exodo, basahon sa” diha sa Giya ngadto sa mga Kasulatan.

Imahe

icon sa personal nga pagtuon

Mga Ideya alang sa Personal nga Pagtuon sa Kasulatan

Exodo 1–2

Si Jesukristo mao ang akong Tigluwas.

Usa sa labing importanting mga tema diha sa basahon sa Exodo mao nga ang Dios adunay gahum sa paglingkawas sa Iyang mga katawhan gikan sa pagdaugdaog. Ang pagkaulipon sa mga Israelite ingon nga gihulagway sa Exodo 1 makita isip usa ka simbolo sa pagkabihag nga kitang tanan magsinati tungod sa sala ug kamatayon (tan-awa sa 2 Nephi 2:26–27; 9:10; Alma 36:28). Ug si Moises, ang tigluwas sa mga Israelite, matan-aw isip usa ka matang, o representasyon, ni Jesukristo (tan-awa sa Deuteronomio 18:18–19; 1 Nephi 22:20–21). Basaha ang Exodo 1–2 uban sa paghinumdom niini nga mga pagtandi. Imong mamatikdan, sama pananglit, nga si Moises ug si Jesus gipanalipdan gikan sa kamatayon sa dihang gagmay pa nga mga bata (tan-awa sa Exodo 1:22–2:10; Mateo 2:13–16) ug nga ang duha migahin og panahon didto sa kamingawan sa wala pa magsugod sa ilang pagpangalagad (tan-awa sa Exodo 2:15–22; Mateo 4:1–2). Unsa ang ubang mga panabut ang imong nakat-unan gikan sa Exodo mahitungod sa espiritwal nga pagkabihag? mahitungod sa pagluwas sa Manluluwas?

Tan-awa usab sa D. Todd Christofferson, “Katubsanan,” Liahona, Mayo 2013, 109–12.

Moses in the Bulrushes [Moises diha Sulod sa mga Banban], © Providence Collection/lisensya gikan sa goodsalt.com

Exodo 3–4

Ang Ginoo naghatag og gahum ngadto niadtong Siya nagtawag sa paghimo sa Iyang buhat.

Karon kita nakaila ni Moises isip usa ka halangdon nga propeta ug lider. Apan si Moises wala magtan-aw sa iyang kaugalingon niana nga paagi sa unang pagtawag sa Ginoo kaniya. “Kinsa ba ako,” natingala si Moises, “aron ako moadto ni Paraon?” (Exodo 3:11). Ang Ginoo, bisan pa niana, nakaila kinsa gayud si Moises kaniadto––ug kinsa siya mamahimo. Samtang ikaw magbasa sa Exodo 3–4, timan-i giunsa sa Ginoo pagpaniguro si Moises ug pagtubag ang iyang mga kabalaka. Unsa ang imong nakaplagan niini nga mga kapitulo nga mahimong modasig kanimo kon ikaw mobati og kakulang? Unsaon sa Ginoo pagpanalangin ang Iyang mga sulugoon og dugang nga gahum sa pagbuhat sa Iyang kabubut-on? (tan-awa sa Moises 1:1–10, 24–39; 6:31–39, 47). Kanus-a ka nakakita sa Dios nga naghimo sa Iyang buhat pinaagi kanimo o sa uban?

Alang sa dugang pa mahitungod sa kinabuhi ug pagpangalagad ni Moises, tan-awa sa “Moises” sa Giya ngadto sa mga Kasulatan.

Exodo 5–6

Ang mga katuyoan sa Ginoo pagatumanon sa Iyang kaugalingong higayon.

Bisan og si Moises maisugon nga miatubang ni Paraon, ingon nga ang Dios misugo, ug misulti kaniya sa pagbuhi sa mga Israelite, midumili ang Paraon. Sa tinuod, gihimo niya ang mga kinabuhi sa mga Israelite nga mas malisud. Si Moises ug ang mga Israelite mahimong natingala nganong ang mga butang wala milampos bisan si Moises mihimo sa unsay gisugo sa Dios kaniya nga buhaton (tan-awa sa Exodo 5:22–23).

Mibati ka ba sukad nga ikaw mibuhat sa kabubut-on sa Dios apan wala makakita sa kalampusan nga imong gipaabut? Ribyuha ang Exodo 6:1–8, mangita sa unsay giingon sa Ginoo nga motabang ni Moises sa paglahutay. Sa unsang paagi ang Ginoo mitabang kanimo nga magpadayon sa pagbuhat sa Iyang kabubut-on?

Exodo 6:3

Kinsa si Jehova?

Ang Jehova usa sa mga ngalan ni Jesukristo ug nagpasabut ngadto sa wala pa dinhi sa yuta nga Manluluwas. Ang Hubad ni Joseph Smith nagklaro nga ang mga propeta Abraham, Isaac, ug Jacob nakaila sa Ginoo pinaagi niini nga ngalan (tan-awa sa Exodo 6:3, footnote c). Kasagaran, kon ang hugpong sa mga pulong “ang Ginoo” makita diha sa Daang Tugon, kini nagpasabut ngadto ni Jehova. Sa Exodo 3:13–15, ang ulohan “AKO MAO” usa usab ka pagpasabut ngadto ni Jehova (tan-awa usab sa Doktrina ug mga Pakigsaad 38:1; 39:1).

Imahe

icon sa pamilya nga pagtuon

Mga Ideya alang sa Pamilya nga Pagtuon sa Kasulatan ug Family Home Evening

Exodo 1–2.Daghang mga babaye mihimo og mahinungdanong mga tahas diha sa plano sa Dios sa pagpasanay og usa ka tigluwas alang sa mga Israelite. Isip usa ka pamilya, makabasa kamo mahitungod sa mga mananabang nga si Sipra ug Pua (Exodo 1:15–20); inahan ni Moises, Jacobed, ug ang iyang igsoong babaye, si Miriam (Exodo 2:2–9; Numeros 26:59); anak nga babaye ni Paraon (Exodo 2:5–6, 10); ug asawa ni Moises si Sepora (Exodo 2:16–21). Giunsa niini nga mga babaye pagpalambo ang plano sa Dios? Sa unsa nga paagi ang ilang mga kasinatian nagpahinumdom kanato sa misyon ni Jesukristo? Makapundok ka usab og mga litrato sa mga paryente nga mga babaye ug mga katigulangan ug makigbahin og mga istorya mahitungod kanila. Sa unsang paagi ka napanalanginan pinaagi sa matinud-anong mga babaye? Mensahe ni Presidente Russell M. Nelson “Usa ka Hangyo ngadto sa Akong mga Sister” (Liahona, Nob. 2015, 95–98) makadugang sa inyong panaghisgot.

Exodo 3:1–6.Sa dihang miduol si Moises sa nagsiga nga sapinit, ang Ginoo misulti kaniya sa paghubo sa iyang sapatos isip usa ka timaan sa balaang pagtahud. Unsaon nato pagpakita og balaang pagtahud alang sa sagradong mga dapit? Sama pananglit, unsa ang atong mabuhat sa paghimo sa atong panimalay nga usa ka sagradong dapit diin ang Espiritu sa Ginoo makapuyo? Unsaon nato pagpakita og mas balaang pagtahud sa ubang sagrado nga mga dapit?

Exodo 4:1–9.Ang Ginoo mihatag ni Moises og gahum sa paghimo og tulo ka mga milagro isip mga timaan aron sa pagpakita sa mga anak ni Israel nga Siya mipadala ni Moises. Unsa ang gitudlo niini nga mga timaan kanato mahitungod ni Jesukristo?

Exodo 5:2.Unsa ang mahimong kahulugan niini alang kanato nga “makaila” sa Ginoo? Unsaon nato nga modangat sa pag-ila Kaniya? (sama pananglit, tan-awa sa Alma 22:15–18). Sa unsa nga paagi ang atong relasyon ngadto Kaniya nag-apekto sa atong tinguha sa pagsunod Kaniya? (tan-awa sa Juan 17:3; Mosiah 5:13).

Alang sa dugang nga mga ideya sa pagtudlo sa mga bata, tan-awa sa latid [outline] karong semanaha sa Dali, Sunod Kanako—Alang sa Primary.

Gisugyot nga awit: “Ang Pagtahud Usa ka Gugma,” Songbook sa mga Bata, 12.

Pagpalambo sa Atong Pagkat-on

Pagtipig og journal sa pagtuon. Mahimong makita nimo nga kini makatabang ang paggamit sa usa ka journal o notebook sa pagsulat sa mga hunahuna, mga ideya, mga pangutana, o mga impresyon nga moabut samtang ikaw nagtuon.