Paghulagway ni Moises, ug Aaron sulod sa hukmanan ni Paraon, ni Robert T. Barrett

Marso 28–Abril 3

Exodo 7–13

“Hinumdumi Ninyo Kining Adlawa, nga Niini Mipahawa Kamo Gikan sa Ehipto”

Samtang ikaw nagbasa ug namalandong sa Exodo 7–13, irekord ang mga impresyon nga moabut diha kanimo. Samtang ikaw naghimo niini sa kanunay, ang imong abilidad sa pag-ila sa mga paghagawhaw sa Espiritu Santo motubo.

Irekord ang Imong mga Impresyon

Nagsunod-sunod nga mga kagul-anan misakit sa Ehipto, apan si Paraon sa gihapon midumili sa pagpalakaw sa mga Israelite. Ug gani ang Dios mipadayon sa pagpakita sa Iyang gahum ug naghatag ni Paraon og mga oportunidad sa pagdawat “nga ako mao ang Ginoo” ug “walay usa nga sama kanako sa tibuok nga yuta” (Exodo 7:5; 9:14). Sa mao nga panahon, si Moises ug ang mga Israelite tingali nagtan-aw uban ang kahingangha niini nga mga pagpakita sa gahum sa Dios alang kanila. Sa tinuod kining nagpadayon nga mga timailhan mipanghimatuod sa ilang hugot nga pagtuo sa Dios ug milig-on sa ilang pagkaandam sa pagsunod sa propeta sa Dios. Dayon, human ang siyam nga makalilisang nga mga kagul-anan mipakyas sa pagpalingkawas sa mga Israelite, ang ikanapulo nga kagul-anan––ang pagkamatay sa unang anak, lakip ang unang anak ni Paraon––nga sa katapusan mitapos sa pagkabinihag. Kini ingon og angay tungod kay sa matag sitwasyon sa espiritwal nga pagkabinihag, anaay tinuod nga usa lamang ka paagi sa paggawas. Dili igsapayan kon unsa pa ang nahimo natong nasulayan sa kaniadto, kini nagauban kanato ingon nga kini nagauban sa mga anak sa Israel. Ang sakripisyo lamang ni Jesukristo, ang Unang Natawo––ang dugo sa Nating Karnero nga walay lama––ang moluwas kanato.

Mga Ideya alang sa Personal nga Pagtuon sa Kasulatan

Exodo 7–11

Ako makapili nga himoong humok ang akong kasingkasing.

Hinaut nga ang imong kabubut-on dili gayud ingon ka madramahong mosupak sa kabubut-on sa Dios sama ni Paraon kaniadto. Sa gihapon, kitang tanan adunay mga panahon nga ang atong mga kasingkasing dili sama ka humok ingon nga kini kinahanglang mahimo, busa adunay usa ka butang nga kat-unan gikan sa mga lihok ni Paraon nga girekord sa Exodo 7–10. Samtang ikaw nagbasa mahitungod sa mga kagul-anan dinhi niini nga mga kapitulo, unsa ang importante nganha kanimo mahitungod sa mga tubag ni Paraon? Nakamatikod ka ba og bisan unsa nga pagkasusama nga mga kahilig ngadto sa pagkatig-a og kasingkasing diha sa imong kaugalingon? Pamalandonga unsa ang imong nakat-unan gikan niini nga mga kapitulo mahitungod sa unsay gipasabut sa pagbaton og humok nga kasingkasing.

Timan-i nga ang Hubad ni Joseph Smith sa Exodo 7:3, 13; 9:12; 10:1, 20, 27; 11:10 nagtin-aw nga ang Ginoo wala magpagahi sa kasingkasing ni Paraon—gipagahi ni Paraon ang iyang kaugalingong kasingkasing.

Unsa ang imong nakat-unan gikan sa mosunod nga mga kasulatan mahitungod pagpalambo og usa ka humok nga kasingkasing? 1 Nephi 2:16; Mosiah 3:19; Alma 24:7–8; 62:41; Ether 12:27.

Tan-awa usab sa Michael T. Ringwood, “Kadali ug Kahilig sa Pagtuo,” Liahona, Nob. 2009, 100–102.

Exodo 12:1–42

Ang Pagpalabay nagsimbolo sa Pag-ula ni Jesukristo.

Ang paagi lamang alang sa mga Israelite nga maluwas gikan sa ikanapulo nga kagul-anan, gihulagway sa Exodo 11:4–5, mao ang higpit nga pagsunod sa mga panudlo nga gihatag sa Ginoo ngadto ni Moises sa Exodo 12, usa ka tulumanon nga naila isip ang Pagpalabay. Ang Pagpalabay nagtudlo kanato pinaagi sa mga simbolo nga ingon nga ang Ginoo miluwas sa mga Israelite gikan sa pagkaulipon sa Ehipto, Siya makaluwas usab kanato gikan sa pagkaulipon sa sala. Unsa ang imong nakaplagan diha sa mga panudlo ug mga simbolo nga nagpahinumdom kanimo ni Jesukristo ug sa Iyang Pag-ula? Unsa ang gisugyot niini nga mga simbolo ug mga panudlo nganha kanimo mahitungod kon unsaon pagdawat sa mga panalangin sa Iyang Pag-ula? Sama pananglit, unsa ang girepresentar sa pagbutang og dugo sa nating karnero diha sa mga haligi sa pultahan? (bersikulo 7). Unsa ang kahulugan niini nganha kanimo nga ang “inyong mga sapin sa inyong mga tiil, ug ang inyong mga sungkod sa inyong mga kamot”? (bersikulo 11).

Tan-awa usab sa Doktrina ug mga Pakigsaad 89:21.

Ang sakramento nagtabang kanato sa paghinumdom sa atong Tigluwas, si Jesukristo.

Exodo 12:14–17, 24–27; 13:1–16

Ang sakramento nagtabang kanako sa paghinumdom sa akong pagkaluwas pinaagi ni Jesukristo.

Ang Manluluwas gusto sa mga Israelite sa paghinumdom kanunay nga Siya miluwas kanila, bisan human ang ilang pagkabinihag nahimong usa ka hanap nga panumduman. Kini mao nganong Siya mimando kanila sa pagsaulog sa fiesta sa Pagpalabay matag tuig. Samtang ikaw nagbasa sa Iyang mga panudlo sa Exodo 12:14–17, 24–27; 13:1–16, paghunahuna mahitungod sa unsay imong gibuhat sa paghinumdom sa mga panalangin sa Dios nganha kanimo. Unsaon nimo sa pagpatunhay kana nga handumanan “ngadto sa inyong mga kaliwatan”? (tan-awa sa Exodo 12:14, 26–27).

Unsa nga mga pagkasusama ang imong nakita tali sa mga katuyoan sa fiesta sa Pagpalabay ug sa sakramento? Sa unsa nga paagi nga ang pagbasa mahitungod sa Pagpalabay nagpahinumdom kanimo sa sakramento ug nagdala pa og daghang kahulugan ngadto niana nga ordinansa? Hunahunaa kon unsay imong buhaton nga sa “kanunay mahinumdom” ni Jesukristo (Moroni 4:3; 5:2; tan-awa usab sa Lucas 22:7–8, 19–20).

Ikaw mahimo usab nga mamalandong og ubang mga butang nga ang Ginoo gusto kanimo nga mahinumdom; tan-awa, sama pananglit, sa Helaman 5:6–12; Moroni 10:3; Doktrina ug mga Pakigsaad 3:3–5, 10; 18:10; 52:40.

Tan-awa usab sa Juan 6:54; “Always Remember Him” [“Kanunay Mahinumdom Kaniya”] (video), ChurchofJesusChrist.org; “Ang Sakramento sa Panihapon sa Ginoo,” sa Mga Pagtulun-an sa mga Presidente sa Simbahan: Howard W. Hunter (2015), 225–234.

Mga Ideya alang sa Pamilya nga Pagtuon sa Kasulatan ug Family Home Evening

Exodo 7–12.Tingali human magbasa mahitungod sa mga kagul-anan nga gipadala sa Ginoo ngadto sa mga Ehiptohanon isip mga timaan sa Iyang gahum, ang imong pamilya mahimong makigbahin og mga paagi nga ang Ginoo nagpakita sa Iyang gahum karon.

Exodus 8:28, 32; 9:27–28, 34–35.Kini nga mga bersikulo magamit sa pagsugod sa panaghisgot mahitungod sa importansya sa pagbuhat sa unsay atong gisaad nga buhaton. Tingali ang mga sakop sa pamilya mahimong makigbahin og mga kasinatian sa dihang sila nakakita sa uban nga nagbuhat sa unsay ilang gikauyonan nga buhaton.

Exodo 12:1–42.Human mabasa og dungan ang Exodo 12:1–42, kamo makasulat diha sa mga piraso sa papel og mga butang nga kamo makabuhat isip usa ka pamilya sa paghinumdom sa Pag-ula ni Jesukristo. Tungod kay ang dugo sa nating karnero diha sa mga haligi sa pultahan (tan-awa sa bersikulo 23) mirepresentar sa Manluluwas, mahimo nimong ibutang kini nga mga papel libut sa pultahan diha sa inyong panimalay. Mahimo ka usab nga mokaon sa mga pagkaon nga gikan sa Pagpalabay, sama sa pan [tinapay] nga walay levadura (mga kraker o biskwit) o pait nga mga hisopo (herbs–parsely o horseradish), ug maghisgot kon giunsa sa Pagpalabay pagtabang kanato nga mahinumdom kon giunsa sa Dios pagluwas ang Iyang mga katawhan. Sama pananglit, ang pan [tinapay] nga walay levadura mipahinumdom kanila nga wala nay panahon sa ilang pan [tinapay] sa pagtubo sa dili pa sila molayas sa pagkabinihag. Ang mapait nga mga hisopo mipahinumdom kanila sa kapait sa pagkabinihag.

Exodo 12:14, 24–27.Tingali ikaw makaribyu niini nga mga bersikulo isip usa ka pamilya sa dili pa ang sunod ninyong miting sa sakramento. Sa unsang paagi kini nga mga bersikulo may kalabutan ngadto sa sakramento? Sa unsa nga paagi kita mas hingpit nga makahimo sa sakramento nga usa ka “handumanan” sa unsay nabuhat sa Manluluwas alang kanato?

Alang sa dugang nga mga ideya sa pagtudlo sa mga bata, tan-awa sa latid [outline] karong semanaha sa Dali, Sunod Kanako—Alang sa Primary.

Gisugyot nga awit: “Paghinumdom sa Gilansang,” Mga Himno, nu. 111.

Pagpalambo sa Atong Pagtudlo

Ipaambit ang mga leksyon nga naggamit og butang. Dapita ang mga sakop sa pamilya sa pagpangita og mga butang nga magtabang kanila sa pagsabut sa mga baruganan diha sa mga kasulatan nga imong gibasa. Sama pananglit, humok ug gahi nga mga butang makatabang sa mga sakop sa pamilya sa paghisgot sa kalainan tali sa pagbaton og humok nga kasingkasing ug gahi nga kasingkasing.

Paghulagway sa usa ka panihapon sa Pagpalabay, ni Brian Call