Paghulagway kang Moises ug Aaron didto sa korte ni Paraon, ni Robert T. Barrett

Marso 28–Abril 3

Exodo 7–13

“Hinumdumi Ninyo Kining Adlawa, nga Niini Mipahawa Kamo gikan sa Ehipto”

Samtang magbasa ka sa Exodo 7–13, hunahunaa kon sa unsang paagi ang mga kamatuoran dinhi niini nga mga kapitulo makalig-on sa imong pagtuo kang Jesukristo. Unsaon nimo sa pagtabang ang mga bata nga imong gitudloan aron makabaton og susama nga kasinatian?

Irekord ang Imong mga Impresyon

Dapita ang Pagpaambit

Pagbutang og ubay-ubay nga mga litrato nga nagrepresentar og mga butang diha sa Exodo 7–13 (sama sa baki, mga langaw, ug karnero) ilawom sa panapton sa lamesa. Pagdapit og pipila ka bata sa pagkuha og usa sa mga litrato ilawom sa panapton, ug dapita ang klase sa pagpaambit unsay ilang nakat-unan mahitungod niini nga litrato diha sa panimalay karong semanaha.

Itudlo ang Doktrina: Mas Gagmay nga mga Bata

Exodo 7–11

Ang Ginoo adunay gahum sa tanang butang.

Ang mga Israelite anaa sa pagkabihag ug dili makapalingkawas sa ilang kaugalingon, apan ang Ginoo mipakita sa Iyang gahum ug miluwas kanila. Unsaon nimo paggamit kini nga istorya aron matabangan ang mga bata sa pagsalig sa Ginoo ug sa Iyang gahum?

Posible nga mga Kalihokan

• Basaha ang pinili nga mga bersikulo gikan sa Exodo 7–11 aron pagtudlo sa mga bata mahitungod sa napulo ka kasakitan nga gipadala sa Ginoo ngadto sa mga Ehiptuhanon (tan-awa usab sa “Ang Propeta Moses,” diha sa Mga Istorya sa Daang Tugon). Dapita ang mga bata sa pagdrowing og mga litrato nga maghulagway sa pipila ka mga kasakitan. Hangyoa ang mga bata sa pag-isa pataas sa ilang mga litrato samtang imong ribyuhon pag-usab ang mga kasakitan. Basaha ang mga pulong gikan sa Exodo 7:5 ug sa 9:14 sa pagpasabut nganong ang Ginoo mipadala sa mga kasakitan ngadto sa Ehipto.

• Ipaambit ngadto sa mga bata kon sa unsang paagi ang Ginoo mipakita kanimo nga “walay usa nga labaw [Kaniya] sa tibuok nga yuta” (Exodo 9:14). Tuguti nga ang mga bata mopaambit kon sa unsang paagi sila nahibalo nga ang Ginoo gamhanan.

Exodo 12:1–13; 13:10

Ang sakramento makatabang kanako sa paghinumdom kang Jesus.

Ang Pagpalabay [Passover] nakatudlo sa mga Israelite mahitungod sa Manluluwas ug sa sakripisyo nga ugma damlag Iyang buhaton alang kanato. Karon, moambit kita sa sakramento sa paghinumdom sa sakripisyo ni Jesus.

Ang sakramento makatabang kanato sa paghinumdom kang Jesukristo.

Posible nga mga Kalihokan

• Gamit ang Exodo 12:1–13, sultihi ang mga bata unsay gisulti sa Ginoo nga buhaton sa mga Israelite aron sila maluwas gikan sa katapusan nga kasakitan (tan-awa usab sa “Ang Pagpalabay,” diha sa Mga Istorya sa Daang Tugon). Ipakita ang litrato ni Jesus nga Nagdala sa Nawala nga Karnero (Libro sa mga Hulagway sa Ebanghelyo, nu. 64), ug ipasabut ang mga pagkaparehas tali sa karnero nga gigamit sa Pagpalabay ug ni Jesukristo, ang Kordero sa Dios.

• Hangyoa ang mga bata sa pagngalan og mga butang nga atong buhaton sa paghinumdom sa importanting mga hitabo sama sa mga adlawng natawhan ug mga holiday. Basaha ang Exodo 13:10, ug ipasabut nga ang Ginoo mihangyo sa mga anak sa Israel sa pagsaulog sa Pagpalabay matag tuig aron sa pagtabang kanila nga mahinumdom nga Siya miluwas kanila gikan sa mga Ehiptuhanon. Unsa ang pipila ka mga paagi nga kita mahinumdom nga si Jesus miluwas kanato gikan sa sala ug kamatayon?

• Kon posible, adtoa ang lamesa sa sakramento kuyog sa mga bata, ug hisguti kon sa unsang paagi ang sakramento makatabang nato sa paghinumdom kang Jesukristo. Kantaha og dungan ang “The Sacrament” (Children’s Songbook, 72) o laing may balaang pagtahud nga awit mahitungod ni Jesukristo. Tabangi ang mga bata sa pagmatikod sa malinawong pagbati nga ilang gibati sa dihang naghunahuna sila mahitungod sa Manluluwas, ug dapita sila sa pagtinguha niana nga pagbati kon moambit sila sa sakramento.

• Hatagi ang mga bata og mga pirasong papel nga adunay mga pulong nga “Makahinumdom ako ni Jesukristo panahon sa sakramento pinaagi sa …” nga isulat dapit sa ibabaw. Dapita sila sa pagdrowing og mga litrato nga ilang matan-aw panahon sa sakramento aron matabangan sila sa paghinumdom kang Jesus.

Itudlo ang Doktrina: Mas Dagko nga mga Bata

Exodo 7–11

Ang Ginoo adunay gahum sa pagluwas kanako.

Ang mga bata mag-atubang og mga hagit ug nagkinahanglan sa Ginoo nga motabang kanila. Ang istorya mahitungod sa napulo ka mga kasakitan nga gipadala sa Ginoo aron mahaw-as ang mga Israelite makatabang sa mga bata nga makasabut nga Siya usab adunay gahum sa pagtabang kanila.

Posible nga mga Kalihokan

• Hatagi ang matag bata og usa ka papel nga gibahin-bahin ngadto sa napulo ka seksyon, ug dapita ang mga bata sa pagdrowing og mga litrato sa mga kasakitan nga gihulagway dinhi niini nga mga bersikulo: Exodo 7:17–18; 8:1–4; 8:16–17; 8:20–22; 9:1–6; 9:8–9; 9:22–23; 10:4–5; 10:21–22; 11:4–7. Unsa ang gitudlo niini nga mga kasakitan mahitungod sa gahum sa Dios? Nganong importante ang pagkahibalo mahitungod sa Iyang gahum?

• Pangutan-a ang mga bata mahitungod sa mga higayon sa dihang gibati nila ang panginahanglan sa tabang sa Ginoo. Sa unsang paagi Siya makatabang nato niini nga mga sitwasyon? Awhaga sila sa paghisgot mahitungod sa mga panahon sa dihang sila o ang ilang pamilya nakasinati sa gahum sa Ginoo diha sa ilang kinabuhi. Ihatag ang imong pagpamatuod nga ang Ginoo adunay gahum sa pagtabang kanato.

Exodo 8:28–32; 9:7

Ang Ginoo makatabang kanako nga makabaton og humok nga kasingkasing.

Si Paraon mipili nga mopatig-a sa iyang kasingkasing sa dihang ang Ginoo misulti kaniya sa pagbuhi sa mga anak sa Israel. Unsaon nimo sa pagdasig ang mga bata nga imong gitudloan sa pagpili aron makaangkon og humok nga kasingkasing aron andam sila nga moserbisyo sa Ginoo ug mobuhat sa Iyang kabubut-on?

Posible nga mga Kalihokan

• Pagdala nganha sa klase og usa ka butang nga gahi, sama sa bato, ug ang lain kana nga humok, sama sa espongha. Basaha dungan sa mga bata ang pipila ka mga bersikulo nga naghulagway kon sa unsang paagi gisanong ni Paraon ang mga kasakitan nga gipadala sa Ginoo (tan-awa sa Exodo 8:28–32; 9:7), ug pangutan-a ang mga bata asa sa butang ang mas nagrepresentar sa kasingkasing ni Paraon o kinaiya. Unsay buot ipasabut sa pagbaton og humok nga kasingkasing (tan-awa sa Mosiah 3:17).

• Kauban sa klase, paghimo og lista sa pipila ka mga aksyon nga tingali makapakita nga kita adunay gahi nga kasingkasing (sama pananglit, pakig-away sa usa ka igsoon o dili ganahan nga mag-ampo). Unsaon nato sa pagpakita sa Ginoo nga kita gustong makabaton og humok nga kasingkasing?

Exodo 11:5–6; 12:1–13

Ang Pagpalabay nagsimbolo sa makatubos nga gahum ni Jesukristo.

Ang Pagpalabay mitudlo sa mga anak sa Israel nga ang Ginoo mihaw-as kanila gikan sa Ehipto. Ang Pagpalabay nagsimbolo usab sa makatubos nga sakripisyo ni Jesukristo, diin naghaw-as kanato gikan sa sala ug kamatayon. Karon, ang sakramento makatabang kanato sa paghinumdom sa sakripisyo ni Jesukristo para kanato. Ang pagtudlo sa mga bata mahitungod sa Pagpalabay makatabang kanila nga makabaton og dugang nga makahuluganong kasinatian sa sakramento.

Posible nga mga Kalihokan

• Hangyoa ang pipila ka mga bata sa pagbasa sa Exodo 11:5–6 sa pagkat-on mahitungod sa katapusang kasakitan nga gipadala sa Ginoo ngadto sa mga Ehiptuhanon. Hangyoa ang ubang mga bata sa pagbasa sa Exodo 12:3, 5–7, 13 sa pagkat-on mahitungod kon sa unsang paagi ang mga anak sa Israel naluwas gikan sa kasakitan.

• Aron matabangan ang mga bata sa pagsabut nga ang Manluluwas mao ang Kordero kinsa miluwas kanato, pagpakita og usa ka litrato sa karnero. Dapita ang mga bata sa pagbasa sa Exodo 12:3–7 sa pagsusi kon unsa nga matang sa nating karnero ang gusto sa Dios nga gamiton sa mga tawo alang sa panihapon sa Pagpalabay. Sa unsang paagi kini nga nating karnero sama kang Jesukristo? (Sama pananglit, si Jesus hingpit, ug si Jesus mipaagas sa Iyang dugo sa pagluwas kanato.) Unsa ang uban pang simbolo ang makatabang kanato sa paghunahuna mahitungod ni Jesukristo?

• Basaha og dungan ang mga pag-ampo sa sakramento (tan-awa sa Doktrina ug mga Pakigsaad 20:77, 79). Sa unsang paagi ang sakramento susama sa Pagpalabay? Unsay atong mabuhat sa paghunahuna mahitungod kang Jesus panahon sa sakramento?

• Ipaambit ngadto sa mga bata ang usa sa paborito nimong mga himno sa sakramento (tan-awa sa Mga Himno, nu. 98–107), ug hisguti kon sa unsang paagi kini makatabang kanimo sa paghinumdom sa sakripisyo sa Manluluwas. Dapita ang mga bata sa pagpaambit og usa ka himno nga parehas og epekto ngadto kanila.

Awhaga ang Pagkat-on diha sa Panimalay

Dapita ang mga bata sa pagpaambit ngadto sa ilang mga pamilya og butang nga ilang nakat-unan mahitungod ni Jesukristo atol sa Primary karon.

Pagpalambo sa Atong Pagtudlo

Tabangi ang mga bata nga mahanduraw ang istorya. Kon ang mga bata adunay biswal nga hulagway sa kon unsay ilang nakat-unan, mas mahinumduman nila kini. Pangita og mga paagi sa pagtabang sa mga bata nga makahanduraw sa mga istorya diha sa mga kasulatan gamit ang biswal nga mga tabang sama sa mga litrato, mga drowing, mga video, mga puppet, o pagdrama-drama.