Paghulagway sa walay sulod nga lubnganan pinaagi ni Maryna Kriuchenko

Abril 11–17

Pasko sa Pagkabanhaw

“Gilamoy Niya ang Kamatayon hangtud sa Walay Katapusan”

Samtang mangandam ka sa pagtudlo, pamalundungi unsaon nimo sa pagtabang ang mga bata nga makabaton og mas lawom nga panabut ug pagpamatuod sa Pag-ula ni Jesukristo.

Irekord ang Imong mga Impresyon

Dapita ang Pagpaambit

Pangutan-a ang mga bata unsay gihimo sa ilang mga pamilya sa pagsaulog sa Pasko sa Pagkabanhaw. Unsay ilang gihimo sa paghinumdom sa Pagkabanhaw ni Jesukristo?

Itudlo ang Doktrina: Mas Gagmay nga mga Bata

Si Jesukristo mao ang akong Manluluwas.

Ang Pasko sa Pagkabanhaw usa ka maayong okasyon sa pagtudlo sa mga bata mahitungod sa Pag-ula sa Manluluwas diha sa Getsemani ug sa Iyang kamatayon sa krus. Makatabang kini kanila nga mobati sa gugma ni Jesus alang kanila.

Posible nga mga Kalihokan

• Ipakita ang mga litrato sa Manluluwas nga naa sa outline karong semanaha diha sa Dali, Sunod Kanako—Alang sa mga Indibidwal ug mga Pamilya o sa ubang mga litrato sa sakripisyo sa Manluluwas (tan-awa sa Libro sa mga Hulagway sa Ebanghelyo, mga nu. 56, 57, 58), ug paambita ang mga bata diha nimo kon unsay ilang nahibaloan mahitungod sa mga hitabo nga gipakita diha sa mga litrato. Suginli ang mga bata mahitungod sa pag-antus ni Jesus sa Getsemani ug sa krus (tan-awa sa Mateo 26:36–46; 27:35–50; Lucas 22:39–46; Juan 19:16–30; “Kapitulo 51: Jesus Nag-antus sa Tanaman sa Getsemani,” diha sa Mga Istorya sa Bag-ong Tugon, 129–32). Ihatag ang imong pagpamatuod nga si Jesus andam nga mag-antus ug mamatay alang kanato kay Siya nahigugma kanato. Dapita ang mga bata sa pagpaambit kon unsay ilang gibati mahitungod ni Jesukristo.

• Basaha ang Juan 10:9 ngadto sa mga bata, nga hatagan og gibug-aton ang mga pulong nga “Ako mao ang pultahan.” Tungod kay si Jesus nag-antus sa atong mga sala, namatay, ug nabanhaw, Siya mihimo nga posible nga ang matag usa kanato makapuyo og balik sa Dios. Gamita ang pultahan sa imong lawak-klasehanan sa pagtudlo nga si Jesus susama sa pultahan nga magtugot kanato nga makabalik ngadto sa Langitnong Amahan.

• Basaha ang Isaias 53:6 ngadto sa mga bata, ug pagpakita kanila og usa ka litrato o drowing sa usa ka karnero. Ipabutang sa usa ka bata ang litrato sa layo nga suok sa kwarto. Ipasabut nga kon mohimo kita og mga sayop nga pagpili, mapalayo kita sa Langitnong Amahan sama sa karnero nga nahisalaag. Dayon dapita ang bata sa pagdala og balik sa karnero, ug ihatag ang imong pagpamatuod nga tungod kay si Jesukristo nag-antus ug namatay, Siya makadala kanato og balik ngadto sa Langitnong Amahan. (Pwede kang makapakita og litrato ni Jesus isip usa ka magbalantay sa karnero, sama sa anaa sa hulagway 64 sa Libro sa mga Hulagway sa Ebanghelyo.)

• Kantaha uban sa mga bata ang awit mahitungod ni Jesukristo, sama sa “Gibati Ko ang Gugma sa Akong Manluluwas” (Songbook sa mga Bata, 42–43). Tabangi sila sa pagmatikod sa bisan unsang pagbati sa kalinaw ug gugma nga ilang bation samtang manganta sila. Ipasabut usab ang mga pulong sa kanta nga naghulagway sa Manluluwas. Sa unsang paagi nato mapaambit ang Iyang gugma ngadto sa uban?

Si Jesus namatay ug nabanhaw alang kanako.

Unsaon nimo sa pagtabang ang mga bata sa pagkat-on nga tungod sa Pagkabanhaw ni Jesukristo, kita ug ang atong mga minahal mabanhaw sa umaabut nga adlaw?

Grey Day Golgotha, ni J. Kirk Richards

Posible nga mga Kalihokan

• Suginli ang mga bata mahitungod sa Pagkamatay ug Pagkabanhaw ni Jesus (tan-awa sa Marcos 15–16). Gamita ang mga litrato dinhi sa outline karong semanaha, mga litrato 57–60 diha sa Libro sa mga Hulagway sa Ebanghelyo o sa “Kapitulo 54: Jesus Nabanhaw” anaa sa Mga Istorya sa Bag-ong Tugon (mga pahina 139–144) aron sa pagtabang sa mga kabataan nga mahanduraw [visualize] ang istorya.

• Tabangi ang mga bata nga makasabut nga ang pagkabanhaw nagpasabut nga human kita mamatay mabuhi kita pag-usab hangtud sa hangtud nga makabaton og hingpit nga pisikal nga lawas ug dili na mamatay pag-usab. Ipaambit ang imong pagpamatuod bahin sa Pagkabanhaw, ug patrabahoa ang mga bata diha niini nga pahina sa kalihokan karong semanaha. Dapita ang mga bata sa paggamit niini sa pagpaambit diha sa ilang mga pamilya sa istorya bahin sa Pagkabanhaw ni Jesus.

• Basaha ang Alma 40:23 ngadto sa mga bata. Ipakita kanila ang imong kamot sulod sa usa ka gwantis. Sultihi sila nga ang imong kamot susama sa usa ka espiritu ug ang gwantis susama sa pisikal nga lawas. Tangtanga ang gwantis sa pagpakita nga kon kita mamatay, ang atong espiritu mobiya sa atong lawas. Itaod og balik ang gwantis sa pagrepresentar sa Pagkabanhaw.

• Kantaha ang usa ka awit mahitungod sa Pagkabanhaw ni Jesukristo, sama sa “Nabuhi ba Gayud Pag-usab si Jesus?” o “Si Jesus Nabanhaw” (Songbook sa mga Bata, 45, 44). Ihatag ang imong pagpamatuod nga tungod ni Jesukristo kita mabuhi pag-usab ug makabaton og hingpit nga lawas human kita mamatay.

Itudlo ang Doktrina: Mas Dagko nga mga Bata

Si Jesus nag-antus alang kanako.

Samtang magtuon ka sa Pag-ula sa Manluluwas, pamalandungi unsaon nimo sa pagtabang ang mga bata nga makasabut kon sa unsang paagi ang Manluluwas mopanalangin ug molig-on kanila.

Posible nga mga Kalihokan

• Bahina ang mga bata ngadto sa tulo ka grupo, ug hatagi ang matag grupo og usa sa mosunod nga mga tudling sa kasulatan: Isaias 53:4–12; Alma 7:11–13; ug Doktrina ug mga Pakigsaad 19:16–19. Dapita ang mga bata sa pagpangita sa mga pulong ug hugpong sa mga pulong nga naghulagway sa mga butang nga giantus ni Jesukristo alang kanato. Hangyoa sila sa pagsulat sa ilang mga tubag diha sa pisara ug sa pagpaambit kon unsay ilang gibati mahitungod sa Manluluwas human mabasa kini nga mga kasulatan.

• Pag-andam og mga piniraso nga papel. Diha sa katunga nga bahin niini, isulat ang mga pakisayran sa kasulatan [scripture references] sa Daang Tugon bahin sa mga panagna mahitungod ni Jesukristo. Sa laing katunga, isulat ang katugma nga pakisayran sa kasulatan sa Bag-ong Tugon mahitungod kon sa unsang paagi natuman kini nga mga panagna. (Outline karong semanaha sa Dali, Sunod Kanako—Alang sa mga Indibidwal ug mga Pamilya paglista og pipila ka mga ehemplo.) Dapita ang mga bata sa pagbasa sa mga bersikulo ug itugma kini sa mga panagna ngadto sa mga katumanan niini.

• Tabangi ang mga bata nga makasag-ulo sa ikatulo nga artikulo sa hugot nga pagtuo. Unsa ang gitudlo niini nga kasulatan kanato mahitungod sa Pag-ula ni Jesukristo ug sa plano sa Langitnong Amahan alang sa Iyang mga anak?

• Pangutan-a ang mga bata kon unsaon nila sa paghulagway ang Pag-ula ni Jesukristo ngadto sa usa ka tawo. Awhaga sila sa paggamit og mga kasulatan, mga himno, o mga litrato sa pagpahayag unsay ipasabut sa maulaon nga sakripisyo sa Manluluwas diha kanila. Sa unsang paagi kita napanalanginan tungod sa Pag-ula sa Manluluwas?

Si Jesus namatay ug nabanhaw alang kanako.

Ang reyalidad sa Pagkabanhaw ni Jesukristo makahatag kanato og dakong paglaum ug kalipay—ilabina kon makasinati kita sa kamatayon sa usa ka minahal. Unsaon nimo sa pagtabang ang mga bata sa pagpangita og kahupayan diha sa Pagkabanhaw?

Posible nga mga Kalihokan

• Ipakita ang mga litrato 57–59 nga naa sa Libro sa mga Hulagway sa Ebanghelyo. Hangyoa ang mga bata sa pagtugma sa mga litrato diha sa mosunod nga mga tudling: Mateo 27:29–38; Mateo 27:59–60; ug Juan 20:10–18. Dayon dapita ang mga bata sa pagsugilon sa istorya bahin sa kamatayon ni Jesus, paglubong, ug Pagkabanhaw sa kaugalingon nilang mga pulong.

• Basaha ang Job 14:14 uban sa mga bata. Dapita ang mga bata sa pagpaambit kon unsaon nila sa pagtubag ang pangutana ni Job. Tabangi sila sa pagpangita og mga kasulatan nga nagpamatuod bahin sa Pagkabanhaw (tan-awa sa Ang Giya ngadto sa mga Kasulatan, “Pagkabanhaw,” scriptures.ChurchofJesusChrist.org).

• Basaha ang Moises 1:39 uban sa mga bata. Pangutan-a sila kon sila nahibalo ba sa kalainan tali sa “pagka-imortal” ug sa “kinabuhing dayon.” Kinsa ang makadawat og pagka-imortal? Unsa ang gikinahanglan aron makadawat og kinabuhing dayon? Ihatag ang imong pagpamatuod nga kining duha ka bililhong mga gasa posible tungod sa Pag-ula ni Jesukristo.

• Kantaha og dungan ang usa ka awit sa Pasko sa Pagkabanhaw o himno, sama sa “Mipadala sa Bugtong Anak” (Songbook sa mga Bata, 20–21) o “Siya Nabanhaw!” (Mga Himno, nu. 118). Dapita ang mga bata sa pagpaambit kon unsay ilang gibati dihang gikanta nila kini nga mga awit. Unsay gitudlo niini nga mga awit kanato mahitungod sa Langitnong Amahan ug ni Jesukristo? Dapita ang mga bata sa pagsulat sa ilang mga pagpamatuod bahin sa Manluluwas aron maambit ngadto sa ilang panimalay uban sa ilang mga pamilya.

Awhaga ang Pagkat-on diha sa Panimalay

Aron matabangan ang mga bata nga makapaambit sa ilang mga pamilya unsay ilang nakat-unan sa klase, awhaga sila sa pagkanta og awit diha sa panimalay karong semanaha mahitungod sa Pag-ula ni Jesukristo.

Pagpalambo sa Atong Pagtudlo

Ang mga bata makamatikod sa impluwensya sa Espiritu. Tudloi ang mga bata nga ang mga pagbati nga anaa kanila kon sila maghisgot o manganta mahitungod ni Jesukristo ug sa Iyang ebanghelyo naggikan sa Espiritu Santo ug nga kini nga mga pagbati makapalig-on sa ilang mga pagpamatuod.