Kapitulo 51
Jesus Nag-antus sa Tanaman sa Getsemani
Si Jesus ug ang mga Apostoles miadto sa Tanaman sa Getsemani. Si Judas wala mokuyog kanila. Siya miadto aron pagsulti sa mga pangulo sa mga Judeo kon asa si Jesus.
Ang Manluluwas mihangyo ni Pedro, Santiago, ug Juan nga mokuyog Kaniya ngadto sa tanaman. Siya mihangyo kanila sa paghulat samtang Siya milakaw aron mag-ampo.
Si Jesus nasayud nga Siya kinahanglang mag-antus alang sa mga sala sa tanang katawhan. Siya dili gusto nga mag-antus, apan Iyang gipili nga mosunod sa Langitnong Amahan.
Si Pedro, Santiago, ug Juan nakatulog samtang si Jesus nag-ampo. Si Jesus miabut ug nakita sila nga nangatulog. Siya mihangyo kanila sa pagmata.
Milakaw na usab Siya aron mag-ampo. Si Pedro, Santiago, ug Juan gusto nga magmata, apan gikapoy kaayo sila. Nakatulog na usab sila. Nakita na usab sila ni Jesus nga nangatulog. Siya milakaw ug nag-ampo sa ikatulong higayon.
Samtang si Jesus nag-ampo, Siya misugod sa pagpangurog tungod sa kasakit. Usa ka anghel ang miabut aron sa paglig-on Kaniya. Hilabihan ang Iyang pag-antus nga Siya gisingot og dugo. Siya nag-antus alang sa tanan natong mga sala aron kita mapasaylo kon kita maghinulsol.
Gipukaw ni Jesus si Pedro, Santiago, ug Juan. Siya misulti kanila nga Siya budhian ug patyon. Si Jesus miingon nga ang dautang mga tawo moabut aron sa pagdakop Kaniya.