Kapitulo 12
Ang Kasal sa Cana
Si Jesukristo ug ang Iyang mga disipulo mitambong og kasal sa Cana. Si Maria, ang inahan ni Jesus, anaa didto. Siya misulti kang Jesus nga wala nay bino alang sa mga bisita.
Si Jesus nagtahud ug nahigugma sa Iyang inahan. Nangutana Siya kaniya kon unsay iyang gustong ipabuhat Kaniya.
Si Maria misulti sa mga sulugoon didto sa kasal sa pagbuhat sa bisan unsa nga ipabuhat ni Jesus kanila.
Si Jesus misugo sa mga sulugoon nga pun-on sa tubig ang unom ka banga. Ang kada banga masudlan og mga 18 ug 27 ka galon (68 ug 102 ka litro). Dayon Iyang gihimong bino ang tubig.
Siya misulti sa mga sulugoon sa pagdala sa bino gikan sa mga banga ug ihatag kini ngadto sa nagdumala sa kumbira.
Ang nagdumala sa kumbira nahibulong sa dihang iyang giinom ang bino. Ang labing lami nga bino kasagaran nga ihatag inig sugod sa kumbira. Apan niining higayona, ang labing lami nga bino maoy katapusan nga gihatag.
Mao kini ang unang narekord nga milagro nga gihimo ni Jesus panahon sa Iyang kinabuhi dinhi sa yuta. Siya mihimo niini aron sa pagtabang sa Iyang inahan. Kini usab nakatabang nga malig-on ang hugot nga pagtuo sa Iyang mga disipulo.