Kapitulo 63
Pablo Mitapos sa Iyang Misyon
Si Pablo miadto sa templo sa Jerusalem. Usa ka grupo sa mga Judeo nagtuo nga si Pablo nagdala og mga tawo nga dili mga Judeo ngadto sa templo. Mao kini ang nakapasuko sa mga katawhang Judeo. Ilang gidala sa gawas sa templo si Pablo ug gilatigo siya.
Gidakop sa Romano nga mga sundalo si Pablo. Sila mitugot kaniya pagsulti ngadto sa mga katawhang Judeo. Si Pablo mipamatuod ngadto sa mga tawo nga siya nakakita og kahayag gikan sa langit ug nakadungog sa tingog sa Manluluwas. Siya miingon nga si Jesus misugo kaniya sa pagsangyaw sa ebanghelyo.
Ang mga tawo wala motuo ni Pablo. Sila gusto nga mopatay kaniya. Ang mga sundalo mibilanggo ni Pablo sulod sa usa ka gabii.
Ang Manluluwas miduaw ni Pablo sa bilanggoan ug misulti kaniya nga dili mahadlok. Siya miingon nga si Pablo moadto sa Roma ug motudlo sa ebanghelyo didto.
Aron mapanalipdan si Pablo, gipadala siya sa mga Romano ngadto sa laing siyudad. Si Hari Agripa atua didto. Si Pablo misulti ni Hari Agripa nga kaniadto usa siya ka Pariseo ug nasilag sa mga tawo nga mituo kang Jesus. Gani siya mipabilanggo kanila. Dayon si Pablo nakakita og usa ka kahayag gikan sa langit ug nakadungog sa tingog sa Manluluwas. Karon siya mituo na kang Jesus.
Si Pablo mipamatuod ngadto ni Hari Agripa nga ang ebanghelyo tinuod. Siya miingon nga si Jesus nabanhaw. Diha sa usa ka panan-awon, si Jesukristo misulti ni Pablo sa pagsangyaw sa Iyang ebanghelyo. Tungod kay si Pablo misunod, daghang mga tawo ang nasilag ni Pablo.
Si Hari Agripa miingon nga tungod sa gisulti ni Pablo hapit gayud siya motuo kang Jesus. Ang hari wala motuo nga si Pablo kinahanglang patyon. Apan siya kinahanglang mopadala kang Pablo ngadto sa Roma, diin si Pablo husayon.
Nabilanggo si Pablo sulod sa duha ka tuig. Daghang mga tawo ang miduaw kaniya. Siya mitudlo kanila sa ebanghelyo. Si Pablo misulat ngadto sa mga Santos sa uban nga mga dapit. Ang pipila niini nga mga sulat, gitawag og mga sinulat, anaa sa Bag-ong Tugon.
Si Pablo nasayud nga siya patyon. Wala siya mahadlok. Iyang gisunod ang mga sugo sa Dios. Iyang gitudlo ang ebanghelyo. Iyang gitapos ang iyang misyon. Si Pablo nasayud nga ang Langitnong Amahan nahigugma kaniya. Nasayud usab siya nga human sa iyang pagkamatay, siya mopuyo uban sa Langitnong Amahan ug ni Jesukristo.