Kapitulo 61
Pablo ug Silas Nabilanggo
Usa ka batang babaye may dautang espiritu nga misulod kaniya. Ang mga tawo gusto nga makadungog sa unsay gisulti sa dautang espiritu pinaagi kaniya. Ilang gibayran ang mga tawo nga iyang gitrabahoan aron makadungog sa dautang espiritu nga mosulti.
Bisan asa molakaw si Pablo ug si Silas, ang batang babaye mosunod kanila. Samtang siya nagbuhat niini, ang dautang espiritu misulti. Usa ka adlaw si Pablo mimando sa dautang espiritu sa pagbiya kaniya. Kini mibiya. Ang mga tawo nga iyang gitrabahoan nangasuko. Dili na sila karon makapangwarta.
Ang mga tawo midala ni Pablo ug ni Silas ngadto sa mga pangulo sa ilang siyudad. Sila miingon nga si Pablo ug si Silas kanunay naghimo og mga kagubot.
Gilatigo sa mga pangulo si Pablo ug si Silas ug gibilanggo.
Nianang gabhiona si Pablo ug si Silas nag-ampo ug nagkanta og mga himno ngadto sa Langitnong Amahan. Ang tanan nga anaa sa bilanggoan nakadungog kanila. Sa kalit ang yuta nauyog. Ang mga pultahan sa bilanggoan nangaabli.
Ang gwardya nakamata ug nakakita sa abli nga mga pultahan. Nagtuo siya nga ang mga binilanggo miikyas. Si Pablo misulti sa gwardya sa dili pagkabalaka. Ang tanan nga mga binilanggo anaa pa gihapon. Ang gwardya miluhod tupad ni Pablo ug ni Silas ug nangutana kon unsaon nga siya maluwas.
Si Pablo ug si Silas mitudlo sa ebanghelyo ngadto sa gwardya ug sa iyang pamilya. Nianang gabhiona ang gwardya ug ang iyang pamilya gibunyagan.
Sa pagkasunod adlaw si Pablo ug si Silas gipabuhian sa mga pangulo sa siyudad. Si Pablo ug si Silas miadto sa laing siyudad aron mohimo pa og misyonaryo nga buhat.