Pasiuna
Ang Plano sa Atong Langitnong Amahan
Kita mipuyo sa langit uban sa Langitnong Amahan sa wala pa kita moanhi sa yuta. Kita Iyang mga anak nga espiritu ug adunay espiritu nga mga lawas. Kita nahigugma Kaniya, ug Siya nahigugma kanato.
Teachings of the Prophet Joseph Smith, 354
Ang Langitnong Amahan mitudlo kanato mahitungod sa Iyang plano alang kanato. Kini gitawag og ang plano sa kaluwasan. Kon kita mosunod sa Iyang plano, kita mahimong sama sa Langitnong Amahan. Ang plano mao nga kita moanhi sa yuta ug makabaton og mga lawas nga adunay unod ug dugo. Pagasulayan kita aron masuta kon kita mopili ba sa pagsunod sa mga sugo sa Dios.
Ang plano sa kaluwasan naghatag og paagi alang kanato nga makapuyo og balik uban sa Langitnong Amahan. Nagkinahanglan nga kita mosunod sa mga sugo. Apan nagkinahanglan usab kita og tabang. Nagkinahanglan kita nga ang atong mga sala makuha, ug nagkinahanglan kita og nabanhaw nga mga lawas. Tungod kay kita dili makahimo sa pagkuha sa atong kaugalingong mga sala o makahimo sa pagbanhaw sa atong kaugalingong mga lawas, kita nagkinahanglan og usa ka Manluluwas sa pagbuhat niini alang kanato.
Ang Langitnong Amahan mipili kang Jesukristo nga mahimo natong Manluluwas. Si Jesus nahigugma sa Langitnong Amahan. Si Jesus nahigugma usab kanato. Siya miuyon nga moanhi sa yuta aron ipakita kanato kon unsaon nga mahimong matarung. Siya mohatag og paagi alang kanatong tanan aron maluwas. Siya miuyon nga mag-antus alang sa atong mga sala. Siya usab mamatay ug mabanhaw aron kita usab mabanhaw.
Si Satanas gusto usab nga mahimo natong manluluwas. Apan wala siya mahigugma sa Langitnong Amahan. Siya wala mahigugma kanato. Gusto niya nga usbon ang plano sa Langitnong Amahan aron iyang maangkon ang gahum ug ang himaya sa Langitnong Amahan.
Ang pipila sa mga anak nga espiritu sa Langitnong Amahan mipili nga mosunod kang Satanas. Kini nakapaguol kaayo sa Langitnong Amahan. Siya mipapahawa ni Satanas ug sa iyang mga sumusunod sa pagbiya sa langit. Si Satanas mao ang yawa. Siya ug ang mga espiritu nga misunod kaniya gusto nga kita makasala.
Ang Langitnong Amahan misugo kang Jesus sa paghimo og yuta alang kanato. Si Jesus mituman. Iyang gihimo ang adlaw, ang buwan, ug ang mga bitoon. Siya mibutang og mga tanum ug mga hayop sa yuta. Karon kita aduna nay usa ka yuta nga maadtoan diin kita makabaton og mga lawas nga adunay unod ug dugo.
Daghang mga tawo ang mianhi aron mopuyo sa yuta. Ang uban kanila mipili nga mosunod sa mga sugo sa Dios; ang uban wala. Ang karaang mga propeta mitudlo sa mga tawo mahitungod sa plano sa Langitnong Amahan ug mahitungod kang Jesukristo.
Ang mga propeta nag-ingon nga ang amahan ni Jesus mao ang Langitnong Amahan. Ang iyang inahan usa ka buotan kaayo nga babaye nga ginganlan og Maria. Siya matawo sa Bethlehem.
Ang mga propeta nag-ingon nga daghang mga tawo ang dili motuo nga si Jesus mao ang Manluluwas. Siya sama ra sa uban nga mga tawo ug dili dato. Daghang mga tawo ang masilag Kaniya.
Ang mga propeta nagsulti usab mahitungod kang Juan Bautista. Siya mag-una og abut kay kang Jesus aron sa pagsulti sa mga tawo mahitungod Kaniya. Si Juan mobunyag kang Jesus.
Ang mga propeta miingon nga si Jesus magmabination ug maghimo og daghang milagro. Sa dili pa Siya mamatay, si Jesus mag-antus alang sa mga sala sa tanang katawhan aron sila dili mag-antus kon sila maghinulsol.
Daghang mga propeta ang nasayud nga si Jesukristo, ang atong Manluluwas, ilansang sa krus. Siya ilansang sa usa ka krus nga kahoy ug mohatag sa iyang kinabuhi alang kanato.
Human sa tulo ka adlaw, Siya mabanhaw. Ang Iyang espiritu mobalik og sulod sa Iyang lawas. Tungod kay si Jesus mamatay ug mabanhaw, kitang tanan mabanhaw usab.
Ang Bag-ong Tugon nagpakita nga ang mga pulong sa mga propeta tinuod. Kini mao ang istorya kabahin kang Jesukristo ug sa Iyang mga Apostoles. Sila mipuyo sa Balaan nga Yuta. Kadaghanan sa mga tawo kinsa mipuyo didto gitawag og mga Judeo. Ang mga Romano mibuntog sa Balaan nga Yuta, ug sila ang mihari sa mga Judeo.