Kapitulo 49
Ang Unang Sakrament
Matag tuig ang mga Judeo adunay usa ka kasaulogan nga gitawag og Pagpalabay. Kini mitabang sa mga katawhang Judeo sa paghinumdom nga ang Dios miluwas sa ilang mga kaliwatan sa panahon ni Moises.
Si Jesus ug ang Napulog Duha ka mga Apostoles nagkinahanglan og usa ka dapit nga kakan-an sa pagsaulog sa Pagpalabay. Ang Manluluwas mipadala kang Pedro ug Juan aron sa pagpangita og usa ka lawak ug sa pagsiguro nga ang tanan andam na alang sa kasaulogan.
Nakakita sila og usa ka lawak ug giandam ang pagsaulog.
Si Jesus ug ang tanan nga mga Apostoles miadto didto. Sila nagdungan og pangaon sa pagsaulog sa Pagpalabay.
Gihatag ni Jesus sa Iyang mga Apostoles ang sakrament sa unang higayon. Siya mikuha og pan, gipanalanginan kini, ug dayon gipikas-pikas kini. Siya misugo sa mga Apostoles sa pagkaon sa pan.
Si Jesus misugo kanila sa paghinumdom sa Iyang lawas kon sila mokaon sa pan. Siya mihangyo kanila sa paghinumdom nga Siya magpakamatay alang kanila.
Si Jesus mibutang og bino sa kopa. Iyang gipanalanginan ang bino ug misugo sa mga Apostoles sa pag-inom niini.
Si Jesus misugo kanila sa paghinumdom sa Iyang dugo kon sila moinom sa bino. Siya mihangyo kanila sa paghinumdom nga Siya mopaagas sa Iyang dugo ug moantus alang sa mga sala sa tanang katawhan.
Si Jesus misulti usab sa mga Apostoles nga ang dautang mga tawo mopatay Kaniya sa dili madugay. Ang napulog usa sa mga Apostoles naguol kaayo. Sila nahigugma sa Manluluwas ug dili gusto nga Siya mamatay. Si Jesus nasayud nga usa sa mga Apostoles ang motabang sa dautan nga mga tawo. Ang iyang pangalan mao si Judas Iscariote.