Kapitulo 35
Ang Maayo nga Samarianhon
Si Jesus misaysay og daghang mga istorya, o mga sambingay, aron sa pagtabang sa mga tawo nga makakat-on sa kamatuoran.
Usa ka adlaw ang usa ka pangulo sa mga Judeo nangutana kang Jesus kon unsay angay niyang buhaton aron makabaton og kinabuhing dayon. Ang Manluluwas nangutana kaniya kon unsay gisulti sa mga kasulatan. Ang pangulo miingon nga kinahanglan higugmaon sa tawo ang Dios ug higugmaon usab ang iyang silingan. Si Jesus miingon nga husto siya. Dayon nangutana ang pangulo, “Kinsa man ang akong silingan?”
Si Jesus mitubag pinaagi sa pagsaysay sa tawo og usa ka istorya. Usa ka adlaw niana usa ka Judeo ang naglakaw sa dalan paingon sa siyudad sa Jerico. Gitulis siya sa mga tulisan ug gipuspusan . Sila mibiya sa tawo diha sa dalan, nga himatyon.
Sa wala madugay ang usa ka pari nga Judeo miagi ug nakakita sa tawo. Ang pari mitipas sa pikas bahin sa dalan. Siya wala motabang sa tawo.
Laing Judeo kinsa mitrabaho sa templo ang miagi. Siya nakakita sa tawo nga samaran. Apan wala gihapon siya motabang sa tawo ug mitipas sa pikas bahin sa dalan.
Dayon usa ka Samarianhon ang miagi. Ang mga Judeo ug ang mga Samarianhon dili magkaduol. Apan sa dihang nakita sa Samarianhon ang tawo, siya naluoy kaniya. Iyang gitambalan ang mga samad sa tawo ug gisul-oban siya og sinina.
Lucas 10:33–34; Juan 4:9; Ang Giya ngadto sa mga Kasulatan, “Samarianhon, mga,” 230
Gidala sa Samarianhon ang tawo ngadto sa usa ka balay abutanan ug miatiman kaniya hangtud sa sunod adlaw. Sa dihang ang Samarianhon kinahanglan na nga mobiya, siya mihatag og kwarta sa tigdumala sa balay abutanan ug misugo kaniya sa pag-atiman sa tawo.
Human isaysay ni Jesus kini nga istorya, Siya nangutana sa pangulo sa mga Judeo kon kinsa sa tulo ka mga tawo ang silingan sa tawo nga samaran.
Ang pangulo miingon nga ang Samarianhon tungod kay iyang gitabangan ang tawo. Si Jesus miingon sa pangulo sa mga Judeo nga magpakasama sa Samarianhon.