Kapitulo 15
Ang Babaye didto sa Atabay
Si Jesus mibiya sa Jerusalem aron moadto sa Galilea. Siya miagi sa Samaria ug miabut sa usa ka atabay.
Siya gikapoy, ug mipahulay Siya duol sa atabay. Usa ka babaye nga Samarianhon ang miabut aron pagkuha og tubig. Si Jesus mihangyo kaniya nga hatagan Siya og mainom.
Tungod kay ang mga Judeo sa kasagaran dili makig-istorya sa mga Samarianhon, ang babaye nahibulong.
Si Jesus misulti sa babaye nga Siya makahatag kaniya og usa ka matang sa tubig nga makapahimo kaniya nga dili na gayud uhawon pag-usab. Iyang gipasabut nga Siya mao ang Manluluwas. Ang tubig nga Iyang mahatag kaniya mao ang “buhi nga tubig” sa kinabuhing dayon.
Ang babaye miadto sa siyudad ug misulti sa daghang mga tawo mahitungod kang Jesus. Miadto sila sa atabay ug sila mismo naminaw kang Jesus. Daghan kanila ang mituo sa Iyang mga pulong.