Kapitulo 29
Jesus Milakaw sa Tubig
Human sa pagpakaon sa 5,000, si Jesus mitungas sa usa ka bukid aron mag-ampo. Ang Iyang mga disipulo misakay og sakayan aron sa paglabang sa Dagat sa Galilea. Sa pag-abut sa kagabhion, ang hangin nag-anam og huros, ug midagko ang mga balud.
Sa pagkalawom nianang gabii, si Jesus miabut aron makig-uban sa Iyang mga disipulo. Siya milakaw sa tubig aron makaagpas sa sakayan.
Ang mga disipulo nakakita Kaniya nga naglakaw sa tubig. Sila nangahadlok. Nagtuo sila nga Siya usa ka espiritu. Si Jesus miingon ngadto kanila, “Ako kini; ayaw kamo kahadlok.”
Si Pedro gusto usab nga molakaw sa tubig. Si Jesus misulti kang Pedro sa pagduol Kaniya. Si Pedro nanaog sa sakayan. Misugod siya og lakaw sa tubig paingon sa Manluluwas.
Tungod kay kusog ang huros sa hangin, si Pedro nahadlok. Siya nag-anam og kaunlod sa tubig ug mitawag kang Jesus nga luwason siya.
Gigunitan sa Manluluwas ang kamot ni Pedro. Iyang gipangutana si Pedro kon nganong dili kaayo hugot ang iyang pagtuo.
Sa dihang miabut si Jesus ug si Pedro sa sakayan, ang unos mihunong. Ang tanang mga disipulo misimba sa Manluluwas. Sila nasayud nga Siya mao ang Anak sa Dios.