Kapitulo 32
Pedro Mipamatuod kabahin kang Kristo
Si Jesus nangutana sa Iyang mga disipulo kon si kinsa Siya sa hunahuna sa mga tawo.
Ang mga disipulo mitubag nga ang uban nga mga tawo naghunahuna nga si Jesus mao si Juan Bautista. Ang uban naghunahuna nga Siya usa ka propeta sa Daang Tugon kinsa mibalik gikan sa mga patay.
Si Jesus nangutana sa Iyang mga disipulo kon si kinsa Siya sa ilang hunahuna. Si Pedro miingon, “Ikaw mao ang Kristo, ang Anak sa Dios nga buhi.”
Si Jesus mipasabut nga ang pagpamatuod ni Pedro dili gikan sa kahibalo sa tawo. Ang Iyang pagpamatuod miabut pinaagi sa pagpadayag gikan sa Dios.
Si Jesus misaad kang Pedro nga Siya mohatag kaniya sa priesthood ug sa awtoridad sa pagpangulo sa Iyang Simbahan. Dayon si Pedro ug ang mga disipulo makabaton og awtoridad sa pagpahimutang sa Simbahan ni Jesus dinhi sa yuta.
Si Jesus miingon sa Iyang mga disipulo nga dili pa una isulti ni bisan kinsa nga Siya mao ang Kristo. Una kinahanglan Siya nga mag-antus, patyon, ug mobangon gikan sa mga patay sa ikatulong adlaw.