Kapitulo 42
Ang Batan-ong Tawo nga Adunahan
Usa ka adlaw niana usa ka batan-ong tawo nga adunahan ang miduol kang Jesus ug nangutana Kaniya kon unsay iyang angay nga buhaton aron makaadto sa langit.
Ang Manluluwas misulti kaniya nga higugmaon ug tahuron ang iyang amahan ug inahan ug dili mopatay bisan kinsa o mamakak o mangawat. Ang batan-ong tawo nga adunahan miingon nga sa kanunay iyang gisunod ang mga sugo.
Si Jesus misulti ngadto sa batan-ong tawo nga siya kinahanglan nga mobuhat pa og usa ka butang. Kinahanglan niya nga ibaligya ang tanan nga anaa kaniya ug ang halin ihatag ngadto sa mga pobre. Dayon ang batan-ong tawo kinahanglang mosunod Kaniya.
Ang batan-ong tawo nga adunahan dili gusto nga ihatag ang tanan nga anaa kaniya. Iyang gihigugma ang mga butang nga iyang gipanag-iya labaw pa sa iyang paghigugma sa Dios. Ang batan-ong tawo mibiya nga magul-anon.
Ang Manluluwas misulti sa Iyang mga disipulo nga kini lisud alang niadtong kinsa nahigugma sa mga bahandi nga makaadto sa langit. Ang mga disipulo wala makasabut. Sila nangutana kon kinsa ang makapuyo uban sa Dios. Si Jesus miingon nga ang mga tawo kinsa misalig sa Dios ug nahigugma Kaniya labaw pa sa bisan unsa nga butang ang makapuyo uban Kaniya didto sa langit.