Kapitulo 28
Jesus Mipakaon sa 5,000 ka mga Tawo
Ang pipila ka mga higala ni Juan Bautista misulti kang Jesus nga si Juan gipatay sa hari.
Sa pagkadungog ni Jesus niini, Siya miadto sa usa ka dapit duol sa Dagat sa Galilea aron mag-inusara. Daghang mga tawo ang nasayud kon asa Siya. Labaw sa 5,000 ka mga tawo ang misunod Kaniya nga naglaum nga Siya motudlo kanila.
Si Jesus mitudlo kanila og daghang mga butang. Tingkaon na, apan kadaghanan sa mga tawo walay dalang pagkaon. Ang iyang mga disipulo gusto nga paadtoon ni Jesus ang mga tawo ngadto sa labing duol nga mga lungsod aron mopalit og pagkaon.
Si Jesus misugo sa mga disipulo sa pagpangita kon may tawo ba nga nakadala og pagkaon. Ilang nakit-an ang usa ka batang lalaki kinsa adunay lima ka piraso nga pan ug duha ka gagmay nga isda.
Si Jesus misugo sa tanang mga tawo nga manglingkod. Iyang gipanalanginan ang pan ug ang isda ug gipikas-pikas ang pagkaon.
Ang mga disipulo mihatag sa pagkaon ngadto sa mga katawhan. Dihay daghan pa alang sa tanan.