Kapitulo 53
Jesus Gilansang sa Krus
Ang mga sundalo mibunal kang Jesus sa mga latigo. Gisul-uban nila Siya og kapa nga pula. Mihimo sila og korona nga mga tunok ug gibutang sa ulo ni Jesus. Gikataw-an nila Siya ug gilud-an Siya. Sila mitawag Kaniya og “Hari sa mga Judeo.”
Daghang mga tawo ang misunod sa mga sundalo samtang ilang gidala si Jesus ngadto sa usa ka bungtod duol sa Jerusalem. Sila mipapas-an Kaniya sa Iyang kaugalingong krus. Gilansang nila ang Iyang mga kamot ug mga tiil sa krus ug gipabarug kini. Gilansang usab nila ang laing duha ka tawo, kinsa mga kawatan.
Si Jesus nag-ampo. Siya mihangyo sa Langitnong Amahan nga pasayloon ang mga sundalo kinsa milansang Kaniya. Sila wala masayud nga Siya mao ang Manluluwas.
Si Maria, ang inahan ni Jesus, nagbarug duol sa krus. Si Apostol Juan diha usab. Si Jesus misugo ni Juan sa pag-atiman sa Iyang inahan. Gidala ni Juan ang inahan ni Jesus ngadto sa iyang panimalay.
Ang kangitngit mitabon sa yuta. Ang Manluluwas nag-antus sa krus sulod sa daghang mga oras. Sa katapusan ang Iyang espiritu mibiya sa Iyang lawas, ug Siya namatay.
Sa dihang Siya namatay, usa ka linog ang mibuak sa dagkong mga bato. Ang tabil sa templo, nga gitawag og bilo, natunga og kagisi. Ang mga sundalo nga Romano nangahadlok.
Usa sa mga disipulo ni Jesus ang mikuha sa lawas ni Jesus gikan sa krus. Giputos niya kini sa usa ka panapton ug gibutang kini sa sulod sa usa ka lubnganan, usa ka dapit diin ang mga tawo gilubong. Usa ka dakong bato ang gibutang atubangan sa lubnganan.