Kapitulo 38
Ang Pariseo ug ang Magbubuhis
Usa ka adlaw niana ang Manluluwas nakigsulti sa pipila ka mga tawo kinsa naghunahuna nga sila mas matarung kay sa ubang mga tawo. Si Jesus miasoy kanila og usa ka istorya.
Duha ka tawo ang misulod sa templo aron mag-ampo. Ang usa Pariseo. Ang usa magbubuhis, nga tigkolekta og buhis. Ang mga tawo dili gusto sa mga tigkolekta og buhis. Sila mituo nga ang mga tigkolekta og buhis dili matinuoron.
Ang Pariseo mibarug sa atubangan sa uban aron mag-ampo. Siya mipasalamat sa Dios nga siya mas maayo kay sa ubang mga tawo. Siya miingon nga mipuasa siya og kaduha sa matag semana ug mibayad sa iyang ikapulo. Ang magbubuhis mibarug nga nag-inusara, miduko sa iyang ulo, ug nag-ampo, “O Dios, kaloy-i ako nga makasasala.”
Ang Pariseo mituo nga siya hingpit ug wala magkinahanglan sa panabang sa Dios. Apan ang magbubuhis nasayud nga siya dili hingpit ug nanginahanglan og panabang sa Dios. Siya mapainubsanon ug mihangyo sa Dios nga pasayloon siya.
Si Jesus miingon nga ang mga tawo kinahanglang mahisama sa magbubuhis. Kinahanglang dili sila maghunahuna nga sila mas maayo kay sa ubang mga tawo. Sila kinahanglan nga maghinulsol sa ilang mga sala ug mohangyo sa Dios nga pasayloon sila.