Kapitulo 5
Jesukristo Natawo
Ang emperador sa mga Romano mihimo og usa ka balaod nga ang tanan kinahanglan gayud nga mobayad og buhis. Si Jose ug si Maria mipuyo sa Nazaret. Kinahanglan sila nga molakaw og 65 ka milya (105 km) ngadto sa Bethlehem aron sa pagbayad sa ilang mga buhis.
Dili sayon alang kang Maria nga mobiyahe ngadto sa Bethlehem. Hapit na siya manganak.
Sa dihang miabut si Jose ug si Maria sa Bethlehem, ang tanang mga lawak puno na sa mga tawo. Si Maria ug si Jose napugos og pahulay sa usa ka pasungan. Ang pasungan usa ka dapit nga butanganan sa mga hayop.
Didto natawo ang bata. Si Maria miputos Kaniya og habol ug mipahiluna Kaniya sa pasungan. Ginganlan ni Jose ug ni Maria ang bata og Jesus.
Nianang gabhiona nga si Jesus natawo, ang mga magbalantay sa karnero nag-atiman sa ilang mga karnero diha sa kapatagan duol sa Bethlehem. Usa ka anghel miduaw kanila. Ang mga magbalantay sa karnero nangahadlok.
Ang anghel miingon kanila nga dili mahadlok. Siya adunay maanindot nga balita: Ang Manluluwas, nga si Jesukristo, natawo sa Bethlehem. Sila makakita Kaniya nga naghigda sa usa ka pasungan.
Ang mga magbalantay sa karnero miadto sa Bethlehem, diin ilang nakita ang bata nga si Jesus.
Ang mga magbalantay sa karnero malipayon nga nakakita sa Manluluwas. Gisultihan nila ang ubang mga tawo sa tanan nga ilang nadungog ug nakita.