Kapitulo 10
Jesus Gibunyagan
Si Juan nagpuyo sa disyerto sulod sa daghang mga katuigan. Ang iyang sinina hinimo gikan sa buhok sa kamelyo, ug siya nagkaon og dugos ug mga lukton. Ang mga tawo nangabut gikan sa mga siyudad aron maminaw kaniya nga magtudlo. Siya nailhan nga si Juan Bautista.
Si Juan Bautista nagtudlo sa mga tawo mahitungod kang Jesukristo. Siya nagsulti kanila nga maghinulsol sa ilang mga sala ug magpabunyag. Si Juan mibunyag niadtong kinsa naghinulsol sa ilang mga sala.
Ang mga tawo nangutana kang Juan Bautista kon unsaon sa pagpuyo og mas maayo nga kinabuhi. Siya miingon kanila nga makigbahin sa mga kabus, mosulti sa tinuod, ug magmakiangayon sa uban. Siya miingon nga si Jesukristo moabut sa dili madugay. Si Jesus mohatag kanila sa gasa sa Espiritu Santo.
Usa ka adlaw niana sa dihang si Juan Bautista namunyag sa mga tawo didto sa Suba sa Jordan, si Jesukristo miduol kaniya. Siya mihangyo kang Juan sa pagbunyag Kaniya. Si Juan nasayud nga si Jesus kanunay nga nagsunod sa mga sugo sa Dios ug wala magkinahanglan nga maghinulsol. Si Juan naghunahuna nga si Jesus dili kinahanglan nga bunyagan.
Apan ang Dios misugo sa tanang mga tawo nga magpabunyag, mao nga si Jesus misulti kang Juan sa pagbunyag Kaniya. Si Jesus mipakita og ehemplo alang kanato pinaagi sa pagsunod sa sugo sa Dios nga magpabunyag.
Sa dihang mikawas si Jesus gikan sa tubig, ang Espiritu Santo mikunsad Kaniya. Ang Dios namulong gikan sa langit, nag-ingon, “Kini mao ang akong Anak nga pinalangga, kaniya may kalipay ako.” Si Juan Bautista nagpamatuod usab nga si Jesus mao ang Anak sa Dios.
Mateo 3:16–17; Juan 1:33–36; Jesus the Christ, 150