Kapitulo 55
Ang mga Apostoles Nangulo sa Simbahan
Human sa Iyang pagkabanhaw, si Jesus nakig-uban sa Iyang mga Apostoles sulod sa 40 ka adlaw. Iyang gitudlo kanila ang daghang mga butang mahitungod sa ebanghelyo ug sa Iyang Simbahan.
Siya misugo kanila nga itudlo ang ebanghelyo ngadto sa tanang mga katawhan. Siya miingon usab kanila nga Siya mobiya kanila sa dili madugay, apan ang Espiritu Santo moabut aron sa pagtabang kanila.
Ang mga Apostoles mitan-aw kang Jesus nga mikayab paingon sa langit. Duha ka mga anghel nga nagsul-ob og puti nga sinina misulti sa mga Apostoles nga si Jesus mobalik gikan sa langit sa umaabut.
Ang mga Apostoles mao na karon ang mga pangulo sa Simbahan ni Jesukristo dinhi sa yuta. Si Pedro mao ang Presidente, ug si Santiago ug si Juan mao ang iyang mga magtatambag.
Mateo 16:18–19; Doktrina ug mga Pakigsaad 81:1–2; Jesus the Christ, 219–20
Adunay napulog usa na lamang ka mga Apostoles—si Judas patay na. Ang Langitnong Amahan misugo sa mga Apostoles nga pilion si Matias nga mahimong usa sa Napulog Duha ka mga Apostoles. Ang tanang mga Apostoles adunay espesyal nga tawag diha sa priesthood.
Ang mga Apostoles ug ang uban nga mga disipulo adunay hugot nga pagtuo sa Ginoo. Sila misunod sa Iyang mga sugo. Sila mihigugma sa usag usa.
Uban sa priesthood ug sa gahum sa Espiritu Santo, ang mga Apostoles makahimo og daghang mga butang. Ilang giayo ang mga masakiton ug sila mga misyonaryo. Mitudlo sila mahitungod ni Jesukristo ug sa Iyang ebanghelyo. Daghang mga tawo ang mituo sa mga pulong sa mga Apostoles ug mipasakop sa Simbahan. Ang mga miyembro sa Simbahan gitawag og mga Santos.