Ang Pulang Dagat

Abril 4–10

Exodo 14–17

“Dili Kamo Maglihok, ug Tan-awa Ninyo ang Kaluwasan sa Ginoo”

Ang Ginoo misugo ni Moises sa pagsulat mahitungod sa iyang mga kasinatian og “usa ka handumanan diha sa usa ka basahon, ug sublion” ngadto ni Josue” (Exodo 17:14). Sa susamang paagi, ang pagrekord sa imong erspiritwal nga mga kasinatian motabang kanimo ug sa imong mga hinigugma sa paghinumdom sa kamaayo sa Ginoo.

Irekord ang Imong mga Impresyon

Ang mga Israelite nalibutan. Ang Pulang Dagat diha sa usa ka kilid, ug ang kasundalohan ni Paraon nagkaduol sa pikas. Ang ilang paglayas gikan sa Ehipto, kini maingon og, wala magdugay. Apan ang Dios dihay usa ka mensahe alang sa mga Israelite nga Siya gusto kanila nga mohinumdom sulod sa mga henerasyon: “Ayaw kahadlok. … Ang Ginoo makig-away alang kaninyo” (Exodo 14:13–14).

Sukad niana nga panahon, kon ang mga katawhan sa Dios nagkinahanglan og hugot nga pagtuo ug kaisug, kasagaran sila modangup ngadto niini nga asoy sa milagrosong kaluwasan sa Israel. Sa dihang si Nephi gusto nga modasig sa iyang igsoong mga lalaki, miingon siya, “Kita maglig-on sama ni Moises; kay siya sa pagkatinuod namulong ngadto sa tubig sa Pulang Dagat ug sila nabahin ngadto ug ngari, ug ang atong mga amahan nakaagi, gikan sa pagkabinihag, sa ugá nga yuta” (1 Nephi 4:2). Sa dihang si Haring Limhi gusto sa iyang binihag nga mga tawo nga “ihangad ang [ilang] mga ulo ug [m]aglipay,” siya mipahinumdom kanila kabahin niining sama nga istorya (Mosiah 7:19). Sa dihang si Alma gusto nga magpamatuod ngadto sa iyang anak nga lalaki kabahin sa gahum sa Dios, siya usab midangup ngadto niini nga istorya (tan-awa sa Alma 36:28). Ug kon nagkinahanglan kita og kaluwasan––kon nagkinahanglan kita og dugang pang gamay nga hugot nga pagtuo, kon nagkinahanglan kita nga “dili maglihok, ug [mo] tan-aw sa kaluwasan sa Ginoo”––kita makahinumdom sa unsang paagi “giluwas sa Ginoo ang Israel niadtong adlawa gikan sa kamot sa mga Ehiptohanon” (Exodo 14:13, 30).

Mga Ideya alang sa Personal nga Pagtuon sa Kasulatan

Exodo 14

Ang Dios adunay gahum sa pagluwas kanako.

Samtang ikaw nagbasa sa Exodo 14:1–10, handurawa kon unsa kaha ang gibati sa mga Israelite samtang ilang nakita ang kasundalohan ni Paraon nga nagkaduol. Tingali gibati nimo nga ikaw nanginahanglan og milagro aron maluwas sa usa ka malisud nga hagit nga imong giatubang. Unsa ang imong nakat-unan gikan sa Exodo 14:13–31 nga makatabang kanimo sa pagtinguha sa kaluwasan sa Dios sa imong kinabuhi? Unsa ang imong nakat-unan mahitungod sa mga paagi nga ang Dios naghatag og kaluwasan gikan sa kasakit? Pamalandonga kon giunsa nimo pagkakita ang Iyang gahum sa pagluwas diha sa imong kinabuhi.

Tan-awa usab sa Doktrina ug mga Pakigsaad 8:2–3; L. Tom Perry, “Ang Gahum sa Pagluwas,” Liahona, Mayo 2012, 94–97; Mga Mapa sa Biblia nu. 2, “Ang Exodo sa Israel gikan sa Ehipto ug ang Pagsulod ngadto sa Canaan.”

Exodo 15:22–27

Ang Ginoo makahimo sa pait nga mga butang nga matam-is.

Samtang ikaw nagbasa sa Exodo 15:22–27 mahitungod sa mga pagbiyahe sa Israel padulong sa gisaad nga yuta, paghunahuna mahitungod sa mga butang sa imong kinabuhi nga maingon og “mapait” sama sa mga tubig sa Mara. Hunahunaa ang mosunod nga mga pangutana samtang ikaw mamalandong niini nga mga bersikulo: Unsaon sa Ginoo paghimo sa mapait nga mga butang sa imong kinabuhi nga matam-is? Unsa ang bili niini nga mga kasinatian diha sa imong kinabuhi? Unsa ang gisugyot sa mga bersikulo 26 ug 27 mahitungod kon giunsa kita sa pagpanalangin sa Ginoo kon mopatalinghug kita ngadto sa Iyang tingog?

Exodo 15:23–27; 16:1–15; 17:1–7

Ako makasalig sa Ginoo, bisan atol sa malisud nga mga panahon.

Kini makatintal ang pagpanaway sa mga Israelite tungod kay sila mibagulbol o gamulo sa dihang ang ilang mga kahimtang nahimong malisud, bisan human sa tanang nahimo sa Dios alang kanila. Apan samtang ikaw nagbasa sa Exodo 15:23–27; 16:1–15; 17:1–7, hunahunaa kon ikaw nakahimo ba sukad sa samang butang. Unsa ang imong nakat-unan gikan sa mga kasinatian sa mga Israelite nga makatabang kanimo nga dili kaayo mobagulbol ug mosalig pa sa hingpit diha sa Dios? Sama pananglit, unsa nga mga kalainan ang imong namatikdan mahitungod sa paagi ang mga Israelite mitubag sa mga kalisud ug sa paagi nga si Moises mitubag? Unsa ang gitudlo niini nga mga bersikulo kanimo mahitungod sa Dios?

Tan-awa usab sa 1 Nephi 2:11–12.

Ang manna gikan sa Dios nagpakaon sa Israel sa pisikal nga paagi; kita usab nagkinahanglan og inadlaw nga espiritwal nga pagkaon. Fresco ni Leopold Bruckner

Exodo 16

Ako kinahanglan nga maningkamot og espiritwal nga pagkaon.

Kita adunay daghang espiritwal nga mga leksyon nga atong makat-unan gikan sa milagro sa manna, nga makaplagan diha sa Exodo 16. Tan-awa ang detalyado nga mga panudlo nga ang mga Israelite gihatagan mahitungod kon unsaon sa pagpanguha, paggamit, ug pagtipig sa manna (tan-awa sa Exodo 16:16, 19, 22–26). Unsa ang imong nakaplagan dinhi niini nga mga panudlo nga imong naggamit samtang ikaw naningkamot og espiritwal nga pagkaon sa matag adlaw?

Tan-awa usab sa Juan 6:31–35, 48–58.

Exodo 17:1–7

Si Jesukristo mao ang akong espiritwal nga bato ug buhi nga tubig.

Paghunahuna mahitungod sa Manluluwas samtang ikaw nagbasa sa Exodo 17:1–7. Sa unsa nga paagi si Jesukristo sama sa usa ka bato nganha kanimo? (tan-awa sa Salmo 62:6-7; Helaman 5:12). Sa unsa nga paagi Siya sama sa tubig? (tan-awa sa Juan 4:10–14; 1 Mga Taga-Corinto 10:1–4; 1 Nephi 11:25).

Mga Ideya alang sa Pamilya nga Pagtuon sa Kasulatan ug Family Home Evening

Exodo 14:13–22.Ang imong sakop sa pamilya tingali malingaw sa pagsulay og “bahin” sa tubig diha sa usa ka panaksan o duwang kaligoanan [bathtub], sama nga si Moises mibahin sa Pulang Dagat. Tabangi sila sa pagsabut nga ang Pulang Dagat dili mabahin nga wala ang gahum sa Dios. Giunsa nato pagkakita sa gahum sa Dios diha sa atong mga kinabuhi ug sa mga kinabuhi sa atong mga katigulangan?

Exodo 15:1–21.Human sa milagrosong pagtabok sa Pulang Dagat, ang mga Israelite mikanta og awit sa pagdayeg nga nailhan isip ang awit ni Moises, makaplagan diha sa Exodo 15:1–21. Isip usa ka pamilya, siksika kini nga mga bersikulo nga nagpamatuod sa unsay gibuhat sa Dios alang sa mga Israelite ug ang ubang makahuluganong mga hugpong sa mga pulong. Dayon mahimo kang makakanta og usa ka himno nga nagpahinumdom sa inyong pamilya sa unsay nabuhat sa Dios kaninyo.

Exodo 16:1–5; 17:1–7.Ang pagbasa sa Exodo 16:1–5 ug sa 17:1–7 makagiya ngadto sa usa ka panaghisgot mahitungod sa Manluluwas isip ang Pan sa Kinabuhi, isip ang Buhing Tubig, ug isip atong Bato. Giunsa niini nga mga istorya sa pagpahinumdom kanato sa unsay nahimo ni Jesukristo alang kanato? Isip kabahin sa inyong panaghisgot, kamo mahimong mobasa sa Juan 4:10–14; 6:29–35, 48–51; Helaman 5:12; Doktrina ug mga Pakigsaad 20:77, 79.

Exodo 17:8–16.Mahimo ninyong i-aksyon ang istorya ni Aaron ug Hur nga naggunit pataas sa mga kamot ni Moises ug sa paghisgot giunsa niini pagsimbolo kon unsaon nato sa pagpaluyo niadtong kinsa gitawag sa Dios sa paggiya kanato. Mahimo nimong ipakita ang kalainan sa ehemplo ni Aaron ug Hur ngadto sa pagbagulbol sa mga Israelite batok ni Moises (nga gihulagway sa tibuok nga mga kapitulo 15–17). Unsa ang pipila ka mga paagi kita makatabang ug makapaluyo sa atong mga lider? Unsa nga mga panalangin ang moabut kanato ug sa atong mga lider samtang atong gibuhat?

Alang sa dugang nga mga ideya sa pagtudlo sa mga bata, tan-awa sa latid [outline] karong semanaha sa Dali, Sunod Kanako—Alang sa Primary.

Gisugyot nga awit: “Manunubos sa Israel,” Mga Himno, nu. 6.

Pagpalambo sa Personal nga Pagtuon

Tinguhaa ang imong kaugalingong espirituhanong mga panabut. Sa imong personal ug pamilya nga pagtuon, ayaw limitahe ang imong kaugalingon sa mga bersikulo nga gipatataw dinhi niini nga mga latid sa pagtuon. Ang Ginoo malagmit adunay mga mensahe alang kanimo niini nga mga kapitulo nga wala gipatataw dinhi. Mainampuong pagtinguha alang sa inspirasyon.

Hulagway ni Moises nga nagbahin sa Pulang Dagat, ni Robert T. Barrett