bukid

Bukid sa Ehipto nga sa karaan gituohan nga Bukid sa Sinai.

Abril 18–24

Exodo 18–20

“Ang Tanan nga Giingon sa Ginoo Among Pagabuhaton”

Si Sister Michelle Craig mitudlo, “Isip matinud-anong disipulo ni [Jesukristo], makadawat ikaw og personal nga inspirasyon ug pagpadayag, nga uyon sa Iyang mga sugo, nga gipahaom alang kanimo” (“Espirituhanong Kapasidad,” Liahona, Nob. 2019, 21). Irekord ug lihoka ang inspirasyon nga imong nadawat samtang ikaw nagbasa sa Exodo 18–20.

Irekord ang Imong mga Impresyon

Ang pagpanaw sa mga Israelite gikan sa Ehipto ngadto sa tiilan sa bukid sa Sinai napuno sa mga milagro––dili ikalimud nga mga pagpakita sa dili katupngan nga gahum, gugma, ug kalooy sa Ginoo. Hinoon, ang Ginoo adunay mga panalangin nga giandam alang kanila nga labaw pa kay sa pagluwas kanila gikan sa Ehipto ug pagbusog sa ilang pisikal nga kagutom ug kauhaw. Siya gusto kanila nga mahimong Iyang mga katawhan sa pakigsaad, Iyang “kaugalingon nga bahandi,” ug usa ka “balaan nga nasud” (Exodo 19:5–6). Karon, ang mga panalangin niini nga pakigsaad milugway lapas sa usa lamang ka nasud o mga katawhan. Gusto sa Dios nga tanan sa Iyang mga anak mahimong Iyang mga katawhan sa pakigsaad, nga “magapatalinghug gayud sa [Iyang] tingog, ug magabantay sa [Iyang] pakigsaad” (Exodo 19:5), tungod kay Siya nagpakita sa Iyang kalooy “alang sa linibo kanila nga nahigugma [Kaniya], ug nagabantay sa [Iyang] mga sugo” (Exodo 20:6).

icon sa personal nga pagtuon

Mga Ideya alang sa Personal nga Pagtuon sa Kasulatan

Exodo 18:13–26

Makatabang ako nga “makalahutay” sa paghimo sa buhat sa Ginoo.

Samtang ikaw nagbasa sa tambag ni Moises nga nadawat gikan sa iyang ugangan nga lalaki, si Jetro, pamalandonga kon unsaon nimo nga mahimong sama sa “mga tawo sa kamatuoran” (usahay gihubad isip “kasaligan” nga mga tawo) nga gihulagway diha sa bersikulo 21. Unsaon nimo pagtabang nga “makayayong sa lulan” sa imong mga lider sa Simbahan? (bersikulo 22). Sama pananglit, unsaon kaha niini nga tambag paggamit nganha sa imong mga paningkamot sa pagpangalagad?

Mahimo usab nimong hunahunaon kon ikaw, usahay, sama ba ni Moises, naninghuha sa pagbuhat og daghan kaayo. Sa unsang paagi ang tambag ni Jetro magamit nganha kanimo?

Tan-awa usab sa Mosiah 4:27; Henry B. Eyring, “Ang Tig-amuma,” Liahona, Nob. 2012, 121–24.

lalaki nga nakiglamano sa usa ka babaye

Ang pagpangalagad ngadto sa uban usa ka paagi nga kita makaapil diha sa buhat sa Ginoo.

Exodo 19:3–6

Ang mga katawhan sa pakigsaad sa Ginoo mga bahandi ngadto Kaniya.

Hunahunaa unsay kahulugan nganha kanimo nga mahimong “kaugalingon nga bahandi” sa Ginoo (Exodo 19:5). Si Presidente Russell M Nelson mitanyag og usa ka pagpasabut niini nga hugpong sa mga pulong: “Diha sa Daang Tugon, ang termino nga Hebreohanon diin ang iyang kaugalingon gihubad og segullah, nga nagkahulugan og ‘bililhon nga kabtangan,’ o ‘bahandi.’ … Aron kita mailhan sa mga sulugoon sa Ginoo isip iyang kaugalingon nga mga katawhan mao ang usa ka labing taas nga pagdayeg” (“Children of the Covenant,” Ensign, Mayo 1995, 34). Sa unsang paagi nga ang pagkamahibalo nga ang pagsunod sa mga pakigsaad naghimo kanimo og usa ka “kaugalingong bahandi” nag-impluwensya sa paagi nga ikaw nagpuyo?

Tan-awa usab sa Gerrit W. Gong, “Pagkasakop diha sa Pakigsaad,” Liahona, Nob. 2019, 80–83.

Exodo 19:10–11, 17

Ang sagradong mga kasinatian nagkinahanglan og pagpangandam.

Ang Ginoo misulti ni Moises nga ang mga anak sa Israel nagkinahanglan nga mangandam sa dili pa sila makahimo sa “pagsugat sa Ginoo” (Exodo 19:10–11, 17) ug maghimo og pakigsaad uban Kaniya (tan-awa sa Exodo 19:5). Unsa ang imong buhaton sa pagpangandam alang sa sagradong mga kasinatian sa imong kinabuhi, sama sa pagtambong sa templo o sa pag-ambit sa sakramento? Unsa ang imong mabuhat aron mas hingpit nga maandam alang niini nga mga kasinatian? Paghunahuna og ubang espiritwal nga mga kalihokan nga nagkinahanglan og pagpangandam, ug pamalandonga kon unsaon sa imong pagpangandam pag-apekto sa matang sa kasinatian nga ikaw aduna.

Exodo 20

Ang Dios maloloy-on.

Samtang ikaw nagbasa sa Exodo 20, hunahunaa ang pagtimaan hain sa Napulo ka mga Sugo sa imong paminaw imong gisunod ug sa imong paminaw mas matinud-anon nimong masunod. Ikaw makapili og usa ka sugo nga imong paningkamutan sa pagsunod ug dayon tun-an kini nga mas detalyado pinaagi sa pagbasa og kalabut nga mga kasulatan (tan-awa ang Giya ngadto sa mga Kasulatan diha sa scriptures.ChurchofJesusChrist.org) o mga mensahe sa komperensya (tan-awa ang seksyon sa mga hilisgutan sa conference.ChurchofJesusChrist.org). Hunahunaa ang paglakip sa imong pagtuon sa mga panalangin nga moabut ngadto niadtong kinsa nagsunod sa sugo. Giunsa niini nga mga panalangin sa pagpakita sa kalooy ug guma sa Dios alang kanimo?

Tan-awa usab sa Carole M. Stephens, “Kon Nahigugma Kamo Kanako, Inyong Pagatumanon ang Akong mga Sugo,” Liahona, Nob. 2015, 118–120.

Exodo 20:1–7

Kini importante ang pagbutang og una sa Ginoo diha sa atong kinabuhi.

Ang pagbasa sa Exodo 20:1–7 mahimong mag-aghat kanimo sa paghunahuna mahitungod sa mga unahunon sa imong kinabuhi––ikaw gani makahimo sa paglista niini. Unsa ang posibleng mga “dios” o “[mga] larawan nga linilok” (Exodo 20:3–4) nga ikaw tingali matintal sa pagbutang nga una kay sa Dios? Unsaon nga ang pagbutang sa Ginoo og una makatabang kanimo sa ubang importante nga mga butang sa imong kinabuhi? Unsa ka nadasig sa pagbuhat aron sa pagdugang sa imong pagpunting sa Langitnong Amahan ug ni Jesukristo?

Tan-awa usab Dallin H. Oaks, “Dili Magbaton og Laing mga Dios,” Liahona, Nob. 2013, 72–75.

icon sa pamilya nga pagtuon

Mga Ideya alang sa Pamilya nga Pagtuon sa Kasulatan ug Family Home Evening

Exodo 18:8–12.Unsa ang epekto sa pagpamatuod ni Moises sa kaluwasan sa Dios diha ni Jetro? Unsa nga mahinungdanong mga butang ang gibuhat sa Ginoo alang sa atong pamilya? Kang kinsa kita makigbahin sa atong kasinatian? Unsaon nato sa pagpatunhay niadto nga mga kasinatian alang sa umaabut nga mga henerasyon?

Exodo 18:13–26.Kini nga mga bersikulo tingali makadasig sa imong pamilya sa paghunahuna mahitungod sa serbisyo sa imong lokal nga mga lider sa Simbahan, sama sa bishop, mga lider sa kabatan-onan, o mga magtutudlo sa Primary. Unsa nga mga responsibilidad sila aduna nga ingon og “mabug-at ra kaayo” (Exodo 18:18).alang sa usa ka tawo sa pagpas-an nga mag-inusara? Unsa ang atong mahimo aron makatabang sa pagpagaan sa ilang mga palas-anon?

Exodo 20:3–17.Paghunahuna og usa ka makahuluganong paagi sa paghisgot sa Napulo ka mga Sugo isip usa ka pamilya. Sama pananglit, mahimo nimong isulat ang mga sugo sa Exodo 20:3-17 diha sa napulo ka mga gilis sa papel. Ang mga sakop sa pamilya dayon makabahin niini ngadto sa duha ka mga kategoriya: (1) pagtahud sa Dios ug (2) paghigugma sa uban (tan-awa usab sa Mateo 22:36–40). Hunahunaa ang pagpili og usa ka sugo o duha sa matag adlaw niini nga semana ug sa paghisgot niini og dungan nga mas detalyado. Sama pananglit, sa unsa nga paagi nga ang pagsunod niini nga sugo naglig-on sa atong pamilya? Giunsa sa Manluluwas pagsunod niini?

Exodo 20:12.Aron mas masabtan og maayo ang Exodo 20:12, tingali makatabang kini kon ang imong pamilya mangita og mga pagpatin-aw sa pulong “pagtahud.” Dayon ang mga sakop sa pamilya makahimo og lista sa mga butang nga kita makahimo sa pagtahud sa atong mga ginikanan. Mahimo kamong mokanta og awit mahitungod sa pagtahud sa mga ginikanan, sama sa “Dali Ko nga Motuman” (Songbook sa mga Bata, 71), ug dayon gamita ang pipila ka mga ideya sa inyong lista sa pagsulat og bag-ong mga bersikulo sa awit.

Alang sa dugang nga mga ideya sa pagtudlo sa mga bata, tan-awa sa latid [outline] karong semanaha sa Dali, Sunod Kanako—Alang sa Primary.

Gisugyot nga awit: “Sunda ang Kasugoan,” Songbook sa mga Bata, 146–47.

Pagpalambo sa Personal nga Pagtuon

Pangita og oras nga maayo alang kanimo. Kini kasagaran mas sayon ang pagkat-on gikan sa mga kasulatan kon ikaw makatuon nga dili mabalda. Pangita og oras nga maayo alang kanimo, ug buhata ang imong labing maayo nga makapadayon sa pagtuon niana nga oras matag adlaw.

Moises naggunit sa mga papan nga bato

Paghulagway ni Moises nga Naggunit sa Napulo ka mga Sugo, ni Sam Lawlor