Paghulagway ni Jehova nga nagpakita ngadto ni Moises ug sa 70 ka kadagkoan sa Israel, pinaagi ni Jerry Harston

Abril 25–Mayo 1

Exodo 24; 31–34

“Ang Akong Presensya Mouban Kanimo”

Dili tanan nga makahuluganong baruganan diha sa mga kasulatan ang mahatagan og gibug-aton dinhi niini nga mga paglatid [outlines]. Paminaw sa Espiritu aron matabangan ka sa pagtutok sa mga kamatuoran nga imong gikinahanglan.

Irekord ang Imong mga Impresyon

Adunay rason nga magmalaumon nga ang mga anak sa Israel magpabilin nga matinuuron sa Dios human Siya mipadayag sa Iyang balaod ngadto kanila (tan-awa sa Exodo 20–23). Bisan og nagbagulbol ug nagduha-duha sila kaniadto, sa dihang gibasa ni Moises ang balaod didto sa tiilan sa Bukid sa Sinai, mihimo sila niini nga pakigsaad: “Buhaton namo ang tanang mga butang nga giingon sa Ginoo, ug magamatinumanon kami” (Exodo 24:7). Ang Dios dayon mitawag kang Moises ngadto sa bukid, misulti kaniya sa paghimo og tabernakulo “aron ako magapuyo sa taliwala nila” (Exodo 25:8; tan-awa sa mga kapitulo 25–30).

Apan samtang si Moises anaa didto sa ibabaw sa bukid nga nagkat-on kon sa unsang paagi ang mga Israelihanon makaangkon sa presensya sa Dios taliwala kanila, ang mga Israelita anaa sa ubos sa bukid nga naghimo hinoon og bulawan nga dios-dios aron simbahon. Bag-o lang silang misaad nga “dili … magbaton og lain nga mga dios,” apan “sila nahisimang sa hinanali” gikan sa mga sugo sa Dios (Exodo 20:3; 32:8; tan-awa usab sa Exodo 24:3). Wala kadto damha nga kausaban, apan nasayud kita gikan sa kasinatian nga ang pagtuo ug pagsalig usahay mabuntog sa kawalay pailub, kahadlok, o pagduhaduha. Samtang magtinguha kita sa presensya sa Ginoo sa atong kinabuhi, makadasig nga masayud nga ang Ginoo wala mohunong sa paggiya sa karaang Israel ug Siya dili mohunong sa paggiya kanato—tungod kay Siya “maloloy-on ug mapuangoron, mahinay sa pagkasuko, ug dako sa mahigugmaong kalolot ug kamatuoran” (Exodo 34:6).

Mga Ideya alang sa Personal nga Pagtuon sa Kasulatan

Exodo 24:1–11

Ang akong mga pakigsaad nagpakita sa akong kaandam sa pagsunod sa balaod sa Dios.

Samtang magbasa ka sa Exodo 24:3–8 mahitungod sa mga Israelihanon nga nakigsaad sa pagsunod sa balaod sa Dios, tingali makahunahuna ka sa mga pakigsaad nga imong gihimo uban sa Dios. Ang pakigsaad sa Israel naglakip og mga ritwal nga lahi sa unsay gipabuhat sa Dios karon, apan tingali makabantay ka og pipila ka pagkasusama, ilabi na kon imong hunahunaon ang mahangturon nga mga kamatuoran nga gisimbolohan niini nga mga ritwal.

Sama pananglit, ang mga bersikulo 4, 5, ug 8 naghisgot og halaran, mga pagsakripisyo og hayop, ug dugo. Unsa ang girepresentar niini nga mga butang, ug unsay kalabutan niini sa imong mga pakigsaad? Sa unsang paagi ang imong mga pakigsaad makatabang kanimo sa pagbuhat sa “tanang mga butang nga giingon sa Ginoo”? (bersikulo 7).

Tan-awa usab sa Moises 5:4–9; Becky Craven, “Mabinantayon batok Dili Kaayo Magtagad,” Liahona, Mayo 2019, 9–11.

Exodo 32–34

Ang sala mao ang pagpalayo gikan sa Dios, apan mitanyag Siya og paagi nga makabalik.

Pinaagi sa pagpamalandong kon sa unsang paagi ang mga Israelihanon dali kaayong “nanagdaot sa ilang kaugalingon” (Exodo 32:7) pinaagi sa pagsupak sa ilang mga pakigsaad, makalikay kita sa susama nga mga sayop. Samtang magbasa ka sa Exodo 32:1–8, sulayi sa paghunahuna sa imong kaugalingon nga usa ka Israelihanon nianang panahona—anaa ka sa kamingawan, 40 ka adlaw na nga wala si Moises, wala ka masayud kon mobalik pa o kanus-a siya mobalik, ug adunay umaabot kaninyo nga pakig-away batok sa mga Canaanhon mahitungod sa gisaad nga yuta (tan-awa usab sa Exodo 23:22–31). Ngano kaha nga ang mga Israelihanon gusto og bulawan nga dios-dios? Nganong bug-at man kaayo ang sala sa mga Israelihanon? Kini nga mga bersikulo mahimong makaaghat nimo sa pagpamalandong og mga paagi nga matintal ka sa pagbutang sa imong pagsalig sa usa ka tawo o usa ka butang gawas sa Manluluwas. Aduna bay usa ka butang nga giaghat ka sa pagbuhat aron mas hingpit nimong mauna ang Dios diha sa imong kinabuhi? Unsa ang nakadasig kanimo mahitungod sa pangamuyo ni Moises sa Ginoo diha sa Exodo 33:11–17?

Samtang bug-at ang sala sa mga Israelihanon, kini nga istorya naglakip usab og mensahe sa kalooy ug pagpasaylo sa Dios. Unsa ang gitudlo kanimo sa Exodo 34:1–10 mahitungod sa Manluluwas? Sa unsang paagi ang mga gipangbuhat ni Moises alang sa mga Israelihanon nagpahinumdom kanimo sa gibuhat ni Jesukristo alang sa tanang tawo? (tan-awa sa Exodo 32:30–32; Mosiah 14:4–8; 15:9; Doktrina ug mga Pakigsaad 45:3–5).

Hubad ni Joseph Smith, Exodo 34:1–2 (sa Giya ngadto sa mga Kasulatan)

Unsa ang kalainan tali sa duha ka hugpong sa mga papan nga bato nga gihimo ni Moises?

Sa dihang milugsong si Moises gikan sa bukid, gidala niya ang balaod nga nakasulat sa mga papan nga bato. Pagkakita nga ang mga Israelihanon misupak sa ilang pakigsaad, gipusgay ni Moises ang mga papan (tan-awa sa Exodo 31:18; 32:19). Wala madugay, ang Dios misugo kang Moises sa paghimo og laing hugpong sa mga papan nga bato ug dad-on kini og balik ngadto sa bukid (tan-awa sa Exodo 34:1–4). Ang Hubad ni Joseph Smith, Exodo 34:1–2 (sa Giya ngadto sa mga Kasulatan) nagklaro nga ang unang hugpong sa mga papan nga bato naglakip sa mga ordinansa sa “balaan nga kapunongan” sa Dios, o sa Melchizedek nga Pagkapari. Ang ikaduhang hugpong naglakip sa “kasugoan mahitungod sa lawasnon nga kagikanan.” Ubos kini nga balaod nga gidumala sa “ubos nga pagkapari” (tan-awa sa Doktrina ug mga Pakigsaad 84:17–27), nga gituyo sa pag-andam sa mga Israelihanon alang sa mas taas nga balaod ug mas taas nga pagkapari aron mas hingpit sila nga makasulod ngadto sa presensya sa Dios.

Mga Ideya alang sa Pamilya nga Pagtuon sa Kasulatan ug Family Home Evening

Exodo 31:12–13, 16–17.Human mabasa kini nga mga bersikulo, ang imong pamilya mahimong maghisgot sa pangutana ni Presidente Russell M. Nelson mahitungod sa atong mga kinaiya sa Igpapahulay: “Unsa nga timailhan ang inyong ihatag sa Ginoo sa pagpakita sa inyong gugma alang Kaniya?” (“Ang Igpapahulay usa ka Kahimut-an,” Liahona, Mayo 2015, 130). Ang imong pamilya pwedeng maghimo og pipila ka karatula nga ibutang sa palibot sa balay aron sa pagpahinumdom kaninyo kon unsaon ninyo sa pagpakita og gugma alang sa Ginoo sa Igpapahulay.

Pinaagi sa pagtahod sa Igpapahulay, atong mapakita ang atong gugma alang sa Ginoo.

Exodo 32:1–8.Aron matabangan ang imong pamilya sa paghisgot kon sa unsang paagi ang mga Israelihanon mipalayo sa Dios, ikonsiderar ang paghimo og agianan diha sa salog (o pangita og usa ka agianan duol sa inyong panimalay). Samtang maglakaw diha sa agianan, ang mga sakop sa pamilya mahimong maghisgot mahitungod sa mga tintasyon nga atong atubangon aron motipas “gikan sa dalan nga … gisugo [sa Ginoo].” Unsaon nato sa pagpabilin diha sa agianan? Kon natipas kita, unsaon nato sa pagbalik ngadto niini? Sa unsang paagi nga ang Manluluwas makatabang kanato?

Exodo 32:26.Human makita ang mga Israelihanon nga nagsimba og dios-dios, si Moises nangutana, “Kinsa ang dapig sa Ginoo?” Unsaon nato sa pagpakita nga dapig kita sa Ginoo?

Exodo 33:14–15.Ang mga sakop sa pamilya mahimong mopaambit og mga kasinatian sa dihang gibati nila kon unsa ang gisaad sa Dios kang Moises: “Ang akong presensya mouban kanimo, ug pagahatagan ko ikaw ug pagpahulay.” Mahimo kamong manganta og usa ka himno mahitungod sa atong pag-agad diha sa Dios, sama sa “Ubani Ako!” (Mga Himno, nu. 97).

Alang sa dugang nga mga ideya sa pagtudlo sa mga bata, tan-awa sa latid [outline] niining semanaha sa Dali, Sunod Kanako—Alang sa Primary.

Gisugyot nga awit: “Kinsay Dapig sa Dios?” Mga Himno, nu. 161.

Pagpalambo sa Atong Pagtudlo

Dapita ang Espiritu. Ikonsiderar kon sa unsang paagi ang sagrado nga musika, buhat sa arte, ug mga pagpahayag og gugma makaimpluwensya sa espirituhanong kahimtang sa inyong panimalay samtang magtudlo ka sa imong pamilya (tan-awa sa Pagtudlo sumala sa Pamaagi sa Manluluwas, 15).

Worship of the Calf [Pagsimba sa Nating Baka], ni W. C. Simmonds