Mayo 9–15

Numeros 11–14; 20–24

“Dili Lamang Unta Kamo Magmalalison batok sa Ginoo, Ni Mahadlok”

Kini nga latid naghatag og gibug-aton sa pipila sa daghang bililhong mga baruganan diha sa basahon sa Numeros. Himoa usab nga bukas ang imong kaugalingon ngadto sa uban nga tabangan ka sa Espiritu nga imong makita.

Irekord ang Imong mga Impresyon

Bisan kon maglakaw, dili kasagaran molungtad og 40 ka tuig ang pagbiyahe gikan sa kamingawan sa Sinai ngadto sa gisaad nga yuta diha sa Canaan. Apan ingon niana ang gidugayon nga gikinahanglan sa mga anak sa Israel, dili aron paglatas sa heyograpikanhong gilay-on apan aron paglatas sa espirituhanong gilay-on: ang gilay-on tali kon si kinsa sila kaniadto ug si kinsa sila nga gusto sa Ginoo nga mamahimo isip Iyang katawhan sa pakigsaad.

Ang basahon sa Numeros naghulagway og pipila sa nahitabo atol niadtong 40 ka tuig, lakip ang mga leksyon nga kinahanglang makat-onan sa mga anak sa Israel sa dili pa mosulod sa gisaad nga yuta. Nakakat-on sila mahitungod sa pagkahimong matinud-anon ngadto sa pinili nga mga sulugoon sa Ginoo (tan-awa sa Numeros 12). Nakakat-on sila mahitungod sa pagsalig sa gahom sa Ginoo, bisan kon ang umaabot daw walay paglaom (tan-awa sa Numeros 13–14). Ug nakakat-on sila nga ang pagkawalay pagtuo o walay pagsalig magdala og espirituhanong kadaot, apan mahimo silang maghinulsol ug modangop sa Manluluwas alang sa pagkaayo (tan-awa sa Numeros 21:4–9).

Kitang tanan susama sa mga Israelihanon sa pipila ka mga paagi. Kitang tanan nasayod kon sama sa unsa nga maanaa sa espirituhanong kamingawan, ug ang samang mga leksyon nga ilang nakat-onan makatabang kanato nga mangandam sa pagsulod sa atong kaugalingong gisaad nga yuta: kinabuhing dayon uban sa atong Langitnong Amahan.

Alang sa kinatibuk-ang pagsabut sa basahon sa Numeros, tan-awa ang “Numeros” diha sa Giya ngadto sa mga Kasulatan.

Mga Ideya alang sa Personal nga Pagtuon sa Kasulatan

Numeros 11:11–17, 24–29; 12

Ang pagpadayag anaa alang sa tanan, apan ang Dios mogiya sa Iyang Simbahan pinaagi sa Iyang propeta.

Sa Numeros 11:11–17, 24–29, timan-i ang problema nga giatubang ni Moises ug ang solusyon nga gitanyag sa Dios. Unsa kaha ang gipasabot ni Moises sa dihang miingon siya nga nanghinaot siya “nga ang tibook nga katawhan sa Ginoo mga manalagna”? (bersikulo 29). Samtang mamalandong ka niini nga mga bersikulo, ikonsiderar kini nga mga pulong ni Presidente Russell M. Nelson: “Ang Dios buot ba gayod makigsulti kaninyo? Oo! … “O, aduna pay daghang gusto sa inyong Amahan sa Langit nga inyong mahibaloan” (“Pagpadayag alang sa Simbahan, Pagpadayag alang sa atong mga Kinabuhi,” Liahona, Mayo 2018, 95–96).

Hinoon, ang pagsulti nga ang tanan pwede nga mahimong propeta wala magpasabot nga silang tanan makapangulo sa katawhan sa Dios sama sa gibuhat ni Moises. Ang panghitabo nga narekord diha sa Numeros 12 nagklaro niini. Samtang magbasa ka niini nga kapitulo, unsa nga mga pasidaan ang imong nakit-an? Unsa ang imong gibati nga gusto sa Ginoo nga imong masabtan mahitungod sa personal nga pagpadayag ug pagsunod sa propeta?

Tan-awa usab sa 1 Nephi 10:17; Doktrina ug mga Pakigsaad 28:1–7; Dallin H. Oaks, “Duha ka Linya sa Komunikasyon,” Liahona, Nob. 2010, 83–86.

Numeros 13–14

Uban sa pagtuo diha sa Ginoo, makaangkon ako og paglaom alang sa umaabot.

Samtang magbasa ka sa Numeros 13–14, sulayi sa paghunahuna nga anaa ka sa samang sitwasyon sa mga Israelihanon. Ngano kaha nga gusto nila nga “mamalik ngadto sa Ehipto”? (Numeros 14:3). Nakasulay ka ba nga nahimong sama niadtong dili masaligon mahitungod sa pagsulod sa gisaad nga yuta? Unsaon nimo paghulagway ang lain nga “espiritu” nga aduna si Caleb? (Numeros 14:24). Unsay dalaygon alang nimo mahitungod sa pagtuo ni Caleb ug Josue, ug sa unsang paagi nimo magamit ang ilang mga ehemplo sa mga sitwasyon nga imong giatubang?

Tan-awa usab sa Mga Pagtulun-an sa mga Presidente sa Simbahan: Gordon B. Hinckley (2016), 88–90.

Numeros 21:4–9

Kon ako motan-aw kang Jesukristo uban sa pagtuo, Siya makaayo kanako sa espirituhanong paagi.

Ang mga propeta sa Basahon ni Mormon nasayod sa istorya nga narekord diha sa Numeros 21:4–9 ug nakasabot sa espirituhanong kaimportante niini. Unsa ang nadugang sa 1 Nephi 17:40–41; Alma 33:18–22; ug Helaman 8:13–15 sa imong pagsabot niini nga istorya? Samtang magtuon ka niini nga mga tudling, hunahunaa ang espirituhanong pagkaayo nga imong gilaoman. Ang mga Israelihanon kinahanglang “[motan-aw] sa bitin nga tumbaga” (Numeros 21:9) aron mamaayo. Unsay gibati nimo nga gidasig ka nga buhaton aron mas hingpit nga “motan-aw sa Anak sa Dios uban sa hugot nga pagtuo”? (Helaman 8:15).

Tan-awa usab sa Juan 3:14–15; Doktrina ug mga Pakigsaad 6:36; Dale G. Renlund, “Magamadagayaon [Buhong] sa mga Panalangin,” Liahona, Mayo 2019, 70–73.

Ang mga Israelihanon naayo pinaagi sa pagtan-aw ngadto sa bitin nga tumbaga.

Numeros 22–24

Makasunod ako sa kabubut-on sa Dios, bisan kon ang uban maningkamot sa pag-agni kanako nga dili.

Sa dihang si Balac, ang hari sa Moab, nahibalo nga nagsingabot ang mga Israelihanon, gipatawag niya si Balaam, usa ka tawo nga naila nga mohatag og mga panalangin ug mga tunglo. Gusto ni Balac nga mapaluya niya ang mga Israelihanon pinaagi sa pagtunglo kanila. Tan-awa kon giunsa ni Balac pagsulay sa pag-agni si Balaam (tan-awa sa Numeros 22:5–7, 15–17), ug hunahunaa ang mga tintasyon nga imong giatubang aron mosupak sa kabubut-on sa Dios. Unsay dalaygon alang nimo mahitungod sa mga tubag ni Balaam diha sa Numeros 22:18, 38; 23:8, 12, 26; 24:13?

Makaguol lang, daw nadala si Balaam sa pagpamugos sa katapusan ug mibudhi sa Israel (tan-awa sa Numeros 31:16; Judas 1:11). Pamalandongi kon unsaon nimo sa pagpabiling matinud-anon sa Ginoo bisan pa sa pagpamugos sa uban.

Mga Ideya alang sa Pamilya nga Pagtuon sa Kasulatan ug Family Home Evening

Numeros 11:4–6.Ang atong kinaiya nahimo bang susama sa kinaiya sa mga Israelihanon nga gipahayag diha sa Numeros 11:4–6? Sa unsang paagi makatabang ang tambag diha sa Doktrina ug mga Pakigsaad 59:15–21?

Numeros 12:3.Giunsa pagpakita ni Moises nga siya “mapinaubsanon kaayo” diha sa Numeros 12 o sa ubang mga tudling sa kasulatan nga imong nabasa? Mahimo ninyong ribyuhon ang pagpasabot ni Elder David A. Bednar sa kaaghop diha sa iyang mensahe nga “Maaghop ug Mapaubsanon sa Kasingkasing” (Liahona, Mayo 2018, 30–33) o sa “Maaghop, Pagkamaaghop” sa Giya ngadto sa mga Kasulatan (scriptures.ChurchofJesusChrist.org). Unsa ang atong nakat-unan kon unsaon nato nga mahimong mas maaghop? Unsa nga mga panalangin ang moabot kon ato kining buhaton?

Numeros 13–14.Duha (o sobra pa) ka sakop sa imong pamilya mahimong magpakaaron-ingnon sa “pagpaniid” (Numeros 13:17) sa laing bahin sa inyong panimalay nga daw kini mao ang gisaad nga yuta. Dayon ang matag usa kanila mohatag og report nga gibase diha sa Numeros 13:27–33 o Numeros 14:6–9. Unsay atong nakat-unan bahin sa pagtuo gikan sa duha ka mga report niini nga mga bersikulo? Sa unsang paagi kita mahimong mas sama ni Caleb ug Josue?

Numeros 21:4–9.Human mabasa ang Numeros 21:4–9, lakip ang 1 Nephi 17:40–41; Alma 33:18–22; ug Helaman 8:13–15, ang inyong pamilya mahimong mohimo og bitin gikan sa papel o clay ug mosulat diha niini o sa papel sa pipila ka yanong butang nga inyong mahimo aron “motan-aw sa Anak sa Dios uban sa hugot nga pagtuo” (Helaman 8:15).

Alang sa dugang nga mga ideya sa pagtudlo sa mga bata, tan-awa sa latid niining semanaha sa Dali, Sunod Kanako—Alang sa Primary.

Gisugyot nga awit: “Jesus, ang Paghunahuna Ko Kanimo Katam-is,” Mga Himno, nu. 83.

Pagpalambo sa Atong Pagtudlo

Tabangi ang imong pamilya nga makapalambo og espirituhanong pagpaningkamot sa kaugalingon. “Imbis nga mohatag lamang og impormasyon, tabangi ang [mga sakop sa inyong pamilya] sa pagdiskobre sa mga kamatuoran sa ebanghelyo sa ilang mga kaugalingon diha sa mga kasulatan ug sa mga pulong sa mga propeta” (Pagtudlo sumala sa Pamaagi sa Manluluwas, 28).

Moses and the Brass Serpent [Si Moises ug ang Bitin nga Tumbaga], ni Judith A. Mehr