“Mayo 16–22. Deuteronomio 6–8; 15; 18; 29–30; 34: ‘Magabantay Ka Aron Dili Ka Mahikalimot sa Ginoo,’” Dali, Sunod Kanako—Alang sa mga Indibidwal ug mga Pamilya: Daang Tugon 2022 (2021)
“Mayo 16–22. Deuteronomio 6–8; 15; 18; 29–30; 34,” Dali, Sunod Kanako—Alang sa mga Individual ug mga Pamilya: 2022
Paghulagway ni Moises diha sa Bukid sa Nebo, © Providence Collection/gilisensyahan gikan sa goodsalt.com
Mayo 16–22
Deuteronomio 6–8; 15; 18; 29–30; 34
“Magabantay Ka Aron Dili Ka Mahikalimot sa Ginoo”
Si Moises misugo sa mga anak sa Israel sa pagtudlo sa mga pulong sa Ginoo ngadto sa ilang mga anak (tan-awa sa Deuteronomio 6:7). Samtang magtuon ka sa Deuteronomio karong semanaha, pangita og mga paagi nga mapaambit ang imong nakat-onan ngadto sa mga sakop sa imong pamilya.
Irekord ang Imong mga Impresyon
Ang kalibutanong pangalagad ni Moises nagsugod diha sa usa ka bukid, sa dihang ang Dios namulong kaniya gikan sa usa ka nagdilaab nga sampinit (tan-awa sa Exodo 3:1–10). Natapos usab kini didto sa usa ka bukid, paglabay sa sobra sa 40 ka tuig, sa dihang ang Dios mihatag kang Moises og daklit nga panglantaw sa gisaad nga yuta gikan sa tumoy sa Bukid Nebo (tan-awa sa Deuteronomio 34:1–4). Gigahin ni Moises ang iyang kinabuhi sa pag-andam sa mga anak sa Israel sa pagsulod sa gisaad nga yuta, ug ang basahon sa Deuteronomio nagrekord sa iyang katapusan nga mga instruksyon, mga pahinumdom, mga pag-awhag, ug mga pangamuyo ngadto sa mga Israelihanon. Maklaro sa pagbasa sa iyang mga pulong nga ang tinuod nga tumong sa pagpangalagad ni Moises—ang pagpangandam nga gikinahanglan sa katawhan—dili ang mahitungod sa pagkaluwas diha sa kamingawan, pagbuntog og mga nasod, o pagtukod og komunidad. Mahitungod kini sa pagkat-on sa paghigugma sa Dios, pagsunod Kaniya, ug pagpabiling maunungon ngadto Kaniya. Kana ang pagpangandam nga gikinahanglan natong tanan aron makasulod sa gisaad nga yuta sa kinabuhing dayon. Mao nga samtang wala makatunob sa Moises sa “yuta nga nagapaagay sa gatas ug dugos” (Exodo 3:8), tungod sa iyang pagtuo ug pagkamatinud-anon, nakasulod siya sa gisaad nga yuta nga giandam sa Dios alang sa tanan niadtong mosunod Kaniya.
Alang sa kinatibuk-ang pagpasabut sa Deuteronomio, tan-awa sa “Deuteronomio” sa Giya ngadto sa mga Kasulatan.
Mga Ideya alang sa Personal nga Pagtuon sa Kasulatan
Deuteronomio 6:4–7; 8:2–5, 11–17; 29:18–20; 30:6–10, 15–20
Gusto sa Ginoo nga mohigugma ako Kaniya sa tibuok nakong kasingkasing.
Sa iyang kataposang mga pagtulun-an, si Moises mipahinumdom sa mga anak sa Israel, “Niining kap-atan ka tuig ang Ginoo nga imong Dios nag-uban kanimo; walay bisan unsa nga nakulang kanimo,” bisan didto sa kamingawan (Deuteronomio 2:7). Karon nga ang mga Israelihanon mosulod na sa gisaad nga yuta, nga adunay “mga siyudad, nga wala [sila mo]tukod, ug mga balay nga nadasok sa tanang mga maayong butang, nga wala [nila] pagapun-a” (Deuteronomio 6:10–11), si Moises nahadlok nga magpatig-a sila sa ilang mga kasingkasing ug malimot sa Ginoo.
Ikonsiderar ang kahimtang sa imong kaugalingong kasingkasing samtang magbasa ka sa tambag ni Moises. Mahimo nimong tutokan ang mosunod nga mga bersikulo ug isulat ang imong mga impresyon:
Unsa ang imong mabuhat aron mapugngan ang imong kasingkasing sa pagkahimong tig-a ug sa paghigugma sa Ginoo sa tibuok nimong kasingkasing? Unsa nga koneksyon ang imong makita tali sa Deuteronomio 6:5–6 ug Mateo 22:35–40? (tan-awa usab sa Levitico 19:18).
Tan-awa usab sa Dieter F. Uchtdorf, “Tinguha alang sa Panimalay,” Liahona, Nob. 2017, 21–24.
“Magabantay ka aron dili ka mahikalimot sa Ginoo.”
Kadaghanan sa henerasyon sa mga Israelihanon nga mosulod sa gisaad nga yuta wala makasaksi sa mga hampak sa Ehipto o makatabok sa Pulang Dagat. Si Moises nasayod nga sila—ug ang umaabot nga mga henerasyon—kinahanglang mahinumdom sa mga milagro sa Dios ug mga balaod sa Dios aron magpabilin silang katawhan sa Dios.
Unsa nga tambag ang gihatag ni Moises diha sa Deuteronomio 6:4–12, 20–25 nga makatabang kanimo nga mahinumdom sa dagkong mga butang nga gihimo sa Dios alang kanimo? Unsay nadasig ka sa pagbuhat aron ang pulong sa Ginoo sa matag adlaw “magapaibabaw sa imong kasingkasing”? (bersikulo 6).
Unsaon nimo sa pagpasa sa imong pagtuo ngadto sa umaabot nga mga henerasyon?
Tan-awa usab sa Deuteronomio 11:18–21; Gerrit W. Gong, “Kanunay nga Mohinumdom Kaniya,” Liahona, Mayo 2016, 108–11.”
Ang pagtabang sa mga nanginahanglan naglakip og manggihatagon nga mga kamot ug andam nga mga kasingkasing.
Ang Deuteronomio 15:1–15 naghatag og tambag mahitungod sa pagtabang sa mga kabos ug nanginahanglan, lakip sa pipila ka piho nga mga binuhatan nga wala na sunda karon. Apan timan-i kon unsa ang gitudlo niini nga mga bersikulo kon nganong kinahanglan natong motabang sa mga kabos ug sa unsang paagi nga ang atong mga kinaiya mahitungod sa pagtabang kanila importante ngadto sa Ginoo. Unsay imong gibati nga gusto sa Ginoo nga imong makat-onan gikan niini nga mga bersikulo mahitungod sa pagserbisyo sa uban?
Tan-awa usab sa Russell M. Nelson, “Ang Daku ug Ikaduhang Sugo,” Liahona, Nob. 2019, 96–100.
Si Jesukristo mao ang Propeta nga ipadala sama kang Moises.
Si Pedro, Nephi, Moroni, ug ang Manluluwas Mismo nakakomentaryo tanan mahitungod sa panagna diha sa Deuteronomio 18:15–19 (tan-awa sa Mga Buhat 3:20–23; 1 Nephi 22:20–21; Joseph Smith—Kasaysayan 1:40; 3 Nephi 20:23). Unsay imong nakat-unan mahitungod sa Manluluwas gikan niini nga mga bersikulo? Sa unsang paagi ang Manluluwas “sama” kang Moises? (Deuteronomio 18:15).
Si Jesukristo mao ang propeta nga sama kang Moises.
Unsay nahitabo kang Moises?
Bisan og ang Deuteronomio 34:5–8 nagsulti nga si Moises namatay, ang pagsabot sa ulahing adlaw nagklaro nga siya wala moagi og kamatayon, o giusab aron dili siya mag-antos og kasakit o kamatayon hangtod nga mabanhaw (tan-awa sa Alma 45:18–19; Giya ngadto sa mga Kasulatan, “Moises”; Giya ngadto sa mga Kasulatan, “Nabalhin sa Pagkahimaya nga mga Binuhat,” scriptures.ChurchofJesusChrist.org). Kinahanglan nga dili moagi og kamatayon si Moises tungod kay nagkinahanglan siya og pisikal nga lawas aron mahatag ang mga yawe sa pagkapari ngadto ni Pedro, Santiago, ug Juan didto sa Bukid sa Transpigurasyon (tan-awa sa Mateo 17:1–13).
Mga Ideya alang sa Pamilya nga Pagtuon sa Kasulatan ug Family Home Evening
-
Deuteronomio 6:10–15.Kini nga mga bersikulo mahimong makaaghat sa mga sakop sa imyong pamilya sa paghunahuna og mga paagi nga napanalanginan ang inyong pamilya. Unsaon nato pagsunod sa tambag nga “magabantay ka aron dili ka mahikalimot sa Ginoo”? (Deuteronomio 6:12). Mahimo ninyong irekord ang inyong mga pagbati mahitungod sa inyong mga panalangin, tingali diha sa usa ka journal o diha sa FamilySearch.
-
Deuteronomio 6:13, 16; 8:3.Kini nga mga bersikulo nakatabang sa Manluluwas atol sa usa ka importanting higayon sa Iyang kinabuhi; aron makita kon sa unsang paagi, basaha og dungan ang Mateo 4:1–10. Unsa nga mga tudling sa kasulatan ang nakatabang kanato sa mga panahon sa panginahanglan?
-
Deuteronomio 7:6–9.Pagbuhat og usa ka butang aron sa pagtabang sa mga sakop sa inyong pamilya nga mobati nga espesyal, sama sa pag-andam og paboritong pagkaon. Dayon mahimo ninyong basahon ang Deuteronomio 7:6–9 ug hisgutan kon unsay inyong gibati nga gipasabot sa pagkahimong “usa ka katawhan” (bersikulo 6) ngadto sa Ginoo.
-
Deuteronomio 29:12–13.Ang paghisgot mahitungod sa Deuteronomio 29:12–13 naghatag og oportunidad alang sa mga sakop sa inyong pamilya sa paghisgot sa mga pakigsaad nga ilang himoon o nahimo na ngadto sa Langitnong Amahan. Unsay buot ipasabut sa pagkahimong katawhan sa Dios? Sa unsang paagi ang atong mga pakigsaad “magapalig-on [kanato] … ingon nga usa ka katawhan alang sa [Dios]”? (bersikulo 13).
Alang sa dugang nga mga ideya sa pagtudlo sa mga bata, tan-awa sa latid niining semanaha sa Dali, Sunod Kanako—Alang sa Primary.
Gisugyot nga awit: “Gusto ko nga Mosunod sa Ebanghelyo,” Songbook sa mga Bata, 72.
Pagpalambo sa Personal nga Pagtuon
Tinguhaa ang imong kaugalingong espirituhanong mga panabut. Kini nga latid nagsugyot og mga tudling ug mga baruganan nga matutukan, apan ayaw tuguti kana nga molimitar sa imong pagtuon. Samtang magtuon ka, posible nga makakat-on ka og usa ka baruganan nga wala hisguti dinhi. Tugoti ang Espiritu nga mogiya kanimo sa unsay kinahanglan nimong makat-onan.
The Lord Shewed Him All the Land [Ang Ginoo Mipakita Kaniya sa Tanang Yuta], ni Walter Rane